8th Pay Commission HRA: केंद्रीय सरकारी कर्मचारी आणि निवृत्तीवेतनधारकांमध्ये आठव्या वेतन आयोगाच्या (8th Pay Commission) अंमलबजावणीबाबत सध्या जोरदार चर्चा सुरू आहे. कर्मचारी संघटनांकडून फिटमेंट फॅक्टर (Fitment Factor) वाढवण्याची मागणी सातत्याने केली जात आहे. जर सरकारने आठव्या वेतन आयोगात 3.0 फिटमेंट फॅक्टर मंजूर केला, तर पे लेव्हल-7 च्या अधिकाऱ्यांच्या वेतनात मोठी वाढ होऊन त्यांचा हाऊस रेंट अलाउन्स (HRA) दरमहा थेट 40,000 रुपयांच्या पार पोहोचू शकतो.
मूळ वेतनात (Basic Salary) संभाव्य तिप्पट वाढ
सातव्या वेतन आयोगात पे लेव्हल-7 मधील अधिकाऱ्यांचे सुरुवातीचे मूळ वेतन 44,900 रुपये आहे. या श्रेणीत विविध सरकारी विभागांचे इन्स्पेक्टर आणि सेक्शन ऑफिसर येतात. आठव्या वेतन आयोगात जर 3.0 चा फिटमेंट फॅक्टर लागू झाला, तर हे मूळ वेतन थेट 3 पट वाढून दरमहा 1,34,700 रुपये होईल. मूळ वेतनात मोठी वाढ झाल्यामुळे त्यावर आधारित असणाऱ्या गृहभाडे भत्त्याची (HRA) रक्कमही आपोआप वाढणार आहे.
शहरांच्या श्रेणीनुसार असा असेल संभाव्य HRA
गृहभाडे भत्त्याची गणना मूळ वेतनाच्या आधारे केली जाते आणि हे दर कर्मचाऱ्यांच्या नियुक्तीच्या शहरावर अवलंबून असतात. सध्या मेट्रो शहरांसाठी ('X' श्रेणी) 30 टक्के, टियर-2 शहरांसाठी ('Y' श्रेणी) 20 टक्के आणि लहान शहरांसाठी ('Z' श्रेणी) 10 टक्के HRA निश्चित आहे. फिटमेंट फॅक्टरच्या विविध पर्यायांनुसार सुधारित बेसिक पे आणि HRAची आकडेवारी अशी असू शकेल –
3.0x फिटमेंट फॅक्टर लागू झाल्यास: सुधारित मूळ वेतन 1,34,700 रुपये होईल. यानुसार 'X' श्रेणीतील शहरांमध्ये दरमहा 40,410 रुपये, 'Y' श्रेणीत 26,940 रुपये आणि 'Z' श्रेणीत 13,470 रुपये HRA मिळेल.
2.5x फिटमेंट फॅक्टर लागू झाल्यास: मूळ वेतन 1,12,250 रुपये होईल. यानुसार 'X' श्रेणीत 33,675 रुपये, 'Y' श्रेणीत 22,450 रुपये आणि 'Z' श्रेणीत 11,225 रुपये HRA मिळेल.
2.0x फिटमेंट फॅक्टर लागू झाल्यास: मूळ वेतन 89,800 रुपये होईल. यानुसार 'X' श्रेणीत 26,940 रुपये, 'Y' श्रेणीत 17,960 रुपये आणि 'Z' श्रेणीत 8,980 रुपये HRA मिळेल.
8 व्या वेतन आयोगाच्या निर्णयाकडे सर्वांचे लक्ष
कर्मचारी संघटनांनी फिटमेंट फॅक्टर वाढवण्यासाठी सरकारवर दबाव वाढवला आहे. जर 2.5x किंवा 3.0x यांपैकी कोणताही पर्याय निवडला गेला, तरी केंद्रीय कर्मचाऱ्यांच्या हातात येणाऱ्या एकूण पगारात (In-hand Salary) भरघोस वाढ होणार आहे. सध्या तरी केंद्र सरकार आठव्या वेतन आयोगाच्या स्थापनेबाबत आणि फिटमेंट फॅक्टरच्या अंतिम दराबाबत काय अधिकृत घोषणा करते, याकडे सर्व कर्मचाऱ्यांचे लक्ष लागले आहे.
