Low Visibility in Delhi due to Fog and Pollution : राजधानी दिल्ली सध्या दाट धुक्याच्या आणि विषारी हवेच्या विळख्यात अडकली असून, हवामान खात्याने (IMD) मंगळवारी सकाळी 'ऑरेंज अलर्ट' जारी केला आहे. धुक्यामुळे जनजीवन विस्कळीत झाले असून विमान वाहतुकीवरही याचा मोठा परिणाम झाला आहे.
विमानतळावर कमी दृश्यमानता
मंगळवारी सकाळी दिल्लीच्या पालम परिसरात दृश्यमानता केवळ 100 मीटर इतकी नोंदवण्यात आली, तर सफदरजंग भागात ती 150 मीटर होती. पालममध्ये सकाळी 8:30 वाजता ताशी 5 किलोमीटर वेगाने वारे वाहत होते. या दाट धुक्यामुळे दिल्ली विमानतळाने प्रवाशांसाठी विशेष सूचना जारी केली असून, विमानांची उड्डाणे 'श्रेणी II' (Category II) अंतर्गत चालवली जात आहेत. धुक्यामुळे अनेक विमानांना उशीर होत असून काही उड्डाणे रद्द होण्याचीही शक्यता असल्याने प्रवाशांना संबंधित विमान कंपन्यांशी संपर्क साधण्याचे आवाहन करण्यात आले आहे.
हवेची गुणवत्ता 'अत्यंत गंभीर' स्तरावर
धुक्यासोबतच दिल्लीकरांना प्रदूषणाचाही सामना करावा लागत आहे. केंद्रीय प्रदूषण नियंत्रण बोर्डाच्या (CPCB) आकडेवारीनुसार, सकाळी 9 वाजता दिल्लीचा एकूण वायु गुणवत्ता निर्देशांक (AQI) 415 नोंदवण्यात आला, जो 'गंभीर' श्रेणीत मोडतो. आनंद विहारमध्ये सर्वाधिक 470 इतका AQI नोंदवला गेला असून नेहरू नगर (463), ओखला (459) आणि मुंडका (459) यांसारख्या भागात प्रदूषणाने धोक्याची पातळी ओलांडली आहे. दिल्लीतील 40 पैकी 27 देखरेख केंद्रांवर AQI चा स्तर 400 च्या वर आहे.
तापमान आणि हवामानाचा अंदाज
दिल्लीचे किमान तापमान 8.8 अंश सेल्सिअस नोंदवण्यात आले आहे, जे सरासरीपेक्षा 1.3 अंशांनी जास्त आहे. दिवसभर शहरात दाट धुक्याची चादर कायम राहण्याची शक्यता असून, कमाल तापमान 23 अंश सेल्सिअसच्या आसपास राहण्याचा अंदाज वर्तवण्यात आला आहे. कडाक्याची थंडी आणि प्रदूषणाच्या मिश्रणामुळे ज्येष्ठ नागरिक आणि श्वसनाचे आजार असलेल्या नागरिकांसाठी परिस्थिती अधिकच धोकादायक बनली आहे.
हेही वाचा – AI Developer Sweeping Streets: भारतीय इंजिनिअर तरुणाने रशियात मारला झाडू, कारण वाचून नेटीझन्स झाले भावूक
