Nithari Killings Case : देशभरात प्रचंड गाजलेल्या निठारी हत्याकांडाशी संबंधित सुरेंद्र कोळी याचा उत्तराखंडमधील हरिद्वार येथे संशयास्पद परिस्थितीत मृत्यू झाला आहे. उत्तर हरिद्वारमधील 'सप्त सरोवर' परिसरातील लालमाता मंदिरासमोर असलेल्या एका चहाच्या टपरीवर त्याचा मृतदेह फासावर लटकलेल्या अवस्थेत आढळून आल्याने परिसरात एकच खळबळ उडाली आहे. घटनेची माहिती मिळताच पोलिसांनी तातडीने घटनास्थळी धाव घेऊन तपास सुरू केला आहे. अल्मोडा येथे राहणाऱ्या त्याच्या कुटुंबीयांनाही या घटनेची माहिती देण्यात आली आहे.
हरिद्वारमध्ये चालवत होता चहाची टपरी
सप्त ऋषी पोलीस चौकीला (सिटी कोतवाली) मिळालेल्या माहितीनुसार, पोलीस पथकाने घटनास्थळी पोहोचून मृत व्यक्तीची ओळख सुरेंद्र कोळी (रा. मंगरुखाल गाव, भिकियासैन, अल्मोडा) अशी पटवली. कोळी गेल्या काही काळापासून हरिद्वारमध्ये भाड्याने घेतलेल्या जागेवर चहाची टपरी चालवून आपले जीवन जगत होता. प्राथमिक तपासात पोलिसांना तेथे कोणतीही सुसाईड नोट सापडलेली नाही. सिटी स्टेशन हाऊस ऑफिसर (SHO) कुंदन सिंग राणा यांनी मृत व्यक्ती निठारी प्रकरणातील मुख्य आरोपींपैकी एक असलेला सुरेंद्र कोळीच असल्याचे स्पष्ट केले असून शवविच्छेदन अहवालानंतरच मृत्यूचे नेमके कारण समोर येईल असे सांगितले आहे.
2005-2006 मधील निठारी हत्याकांड अन् सर्वोच्च न्यायालयाचा निकाल
नोएडाच्या निठारी गावात 2005 ते 2006 या काळात अनेक मुले आणि तरुणी बेपत्ता झाल्या होत्या. सेक्टर-31 मधील उद्योगपती मोनिंदर सिंग पंढेर यांच्या बंगल्यामागील गटारात मोठ्या संख्येने मानवी सांगाडे सापडल्यानंतर 2006 मध्ये या भीषण हत्याकांडाचा पर्दाफाश झाला होता. पंढेर यांच्याकडे घरकामासाठी असलेल्या सुरेंद्र कोळीला यामध्ये अटक करण्यात आली होती. दीर्घ कायदेशीर लढाईनंतर जुलै 2025 मध्ये सर्वोच्च न्यायालयाने त्याला 12 प्रकरणांतून निर्दोष मुक्त करण्याचा निर्णय कायम ठेवला होता. त्यानंतर, नोव्हेंबर 2025 मध्ये सर्वोच्च न्यायालयाने त्याच्याविरुद्धच्या शेवटच्या प्रलंबित खटल्यातील दोषसिद्धीही रद्द करत त्याला सर्व प्रकरणांतून निर्दोष मुक्त करून कारागृहातून सोडण्याचे आदेश दिले होते.
सर्व बाजूंनी तपासाला सुरुवात; स्थानिक लोकांची चौकशी
निर्दोष मुक्ततेनंतर नव्याने आयुष्य सुरू करण्याचा प्रयत्न करणाऱ्या सुरेंद्र कोळीचा असा संशयास्पद रीतीने मृत्यू झाल्याने पोलीस यंत्रणा सतर्क झाली आहे. स्थानिक लोकांकडून माहिती गोळा केली जात असून घटनेचा सर्व बाजूंनी सखोल तपास केला जात आहे. तपास पथकानेही घटनास्थळावरून काही नमुने गोळा केले असून शवविच्छेदन अहवालानंतर या गूढ मृत्यूचा उलगडा होण्याची शक्यता आहे.
