Delhi building collapse : ‘मला वाचवा…’ ढिगाऱ्याखालून विद्यार्थ्याचा व्हिडिओ कॉल; इमारत दुर्घटनेत मृतांचा आकडा 7 वर, 12 विद्यार्थ्यांना वाचवण्यात यश

Delhi building collapse: दक्षिण दिल्लीतील दिल्ली विद्यापीठाच्या (DU) साऊथ कॅम्पसजवळ असलेल्या सत्य निकेतन भागात रविवारी दुपारी 1:30 वाजता 'हॉस्टेल डेझ' (Hostel Daze) नावाची 5 मजली बॉईज पीजी इमारत अचानक कोसळली. सुमारे 50 वर्षे जुन्या असलेल्या या इमारतीच्या तळघरात आणि तळमजल्यावर दुरुस्ती व बांधकामाचे काम सुरू होते. पावसाचे पाणी साचल्यामुळे आधीच कमकुवत झालेल्या पायावर झालेल्या बांधकामामुळे संपूर्ण इमारत काही सेकंदात जमिनीदोस्त झाली. या घटनेत आतापर्यंत 7 जणांचा दुर्दैवी मृत्यू झाला असून अनेक जण गंभीर जखमी झाले आहेत.

'मला वाचवा…' ढिगाऱ्याखालून विद्यार्थ्याचा 11 सेकंदांचा व्हिडियो कॉल
इमारत कोसळल्यानंतर ढिगाऱ्याखाली गाडला गेलेला आत्मा राम सनातन धर्म (ARSD) कॉलेजचा बी.कॉम दुसऱ्या वर्षाचा विद्यार्थी आदित्य याने अत्यंत प्रसंगावधान दाखवले. धुळीने माखलेला आणि रक्तबंबाळ झालेला आदित्य खाली अडकलेला असताना त्याने मोबाईलवरून ११ सेकंदांचा व्हिडियो कॉल करत मदतीची याचना केली. हा व्हिडियो सोशल मीडियावर प्रचंड व्हायरल झाल्यानंतर बचाव पथकांनी वेगाने चक्रे हलवून त्याला ढिगाऱ्याखालून सुखरूप बाहेर काढले. त्याच्यावर एम्स (AIIMS) ट्रॉमा सेंटरमध्ये उपचार सुरू असून त्याची प्रकृती स्थिर आहे.

NDRF, अग्निशामक दल अन् पोलिसांचे रात्रभर बचावकार्य
घटनेची माहिती मिळताच दिल्ली अग्निशामक दल, एनडीआरएफ (NDRF), दिल्ली पोलीस आणि आपत्ती व्यवस्थापन प्राधिकरणाच्या पथकांनी तातडीने घटनास्थळी धाव घेतली. स्थानिक नागरिकांनीही उघड्या हातांनी सिमेंटचे ब्लॉक हटवून बचावकार्यात मदत केली. आतापर्यंत ढिगाऱ्याखालून 12 हून अधिक लोकांना बाहेर काढण्यात आले आहे. अनेक विद्यार्थी मोबाईलवरून कॉल करून मदतीची विनंती करत होते, त्यामुळे मदतकार्य अधिक वेगाने राबवण्यात आले.

फरार इमारत मालकाला राजस्थानमधून अटक; 5 अधिकारी निलंबित
दुर्घटना घडल्यानंतर फरार झालेला इमारत मालक हरिराम बन्सल उर्फ हरिराम गुप्ता याला पोलिसांनी राजस्थानमधील भिवडी येथून ताब्यात घेतले आहे. त्याच्यावर सदोष मनुष्यवध (Section 105 BNS) आणि निष्काळजीपणाचा गुन्हा दाखल करण्यात आला आहे. दुसरीकडे, दिल्ली सरकारने या प्रकरणी 5 महापालिका (MCD) अधिकाऱ्यांना – डेप्युटी कमिश्नर, एक्झिक्युटिव्ह इंजिनिअर, सुपरिंटेंडेंट इंजिनिअर, असिस्टंट इंजिनिअर आणि ज्युनिअर इंजिनिअर यांना तात्काळ निलंबित केले आहे. तसेच, संपूर्ण प्रकरणाची दंडाधिकारी (Magisterial) चौकशी करण्याचे आदेश देण्यात आले आहेत.

हेही वाचा – Flight Emergency Landing: 36,000 फूट उंचीवर असताना इंजिनातून 'तो' अलर्ट; एअर इंडिया एक्स्प्रेसच्या विमानाचे कोची येथे इमर्जन्सी लँडिंग

दिल्ली उच्च न्यायालयाचे एमसीडी (MCD) आणि दिल्ली विद्यापीठावर ताशेरे
या भीषण दुर्घटनेची दखल घेत दिल्ली उच्च न्यायालयाने या प्रकरणावर तातडीने सुनावणी घेतली. न्यायालयाने एमसीडीसह दिल्ली विद्यापीठालाही (DU) थेट जबाबदार धरले. बाहेरून येणाऱ्या विद्यार्थ्यांसाठी पुरेशा वसतिगृहांची सोय करण्यात विद्यापीठ अपयशी ठरल्यामुळे विद्यार्थ्यांना अनधिकृत पीजीमध्ये राहावे लागते, असे मत न्यायालयाने नोंदवले. याशिवाय, केवळ एका मजल्याची परवानगी असताना 5 मजले बेकायदेशीरपणे उभारणाऱ्या 'पीजी माफियांवर' कारवाई न केल्याबद्दल आम आदमी पार्टीने (AAP) भाजपवर जोरदार टीका केली आहे.

बेकायदेशीर पीजी सील करण्याचे आदेश; सुरक्षेचा प्रश्न ऐरणीवर
या दुर्घटनेनंतर महापालिकेने 4 मजल्यांपेक्षा जास्त उंची असलेल्या सर्व बेकायदेशीर बांधकामांना तात्काळ सील करण्याचे आदेश दिले आहेत. तसेच खबरदारीचा उपाय म्हणून लगतची महिला पीजी इमारत रिकामी करून सील करण्यात आली आहे. दिल्ली विद्यापीठाच्या साऊथ कॅम्पसजवळील धोकादायक इमारतींचा स्ट्रक्चरल ऑडिट (Structural Audit) करण्याचा निर्णय घेण्यात आला असून, विद्यार्थ्यांच्या सुरक्षेचा आणि अनधिकृत पीजी माफियांचा प्रश्न पुन्हा एकदा पेटला आहे.

हेही वाचा – IAS Neha Marvya: IAS अधिकारी यांच्या बदली होण्याच्या मालिका सुरूच…. 50 दिवसांत बदली, कोण आहेत IAS अधिकारी नेहा मारव्या सिंह?