Lucknow Class 11 Student Fake Kidnapping: ऑनलाइन गेमिंगच्या नादात कर्जात बुडालेल्या इयत्ता 11 वीच्या एका विद्यार्थ्याने स्वतःच्याच अपहरणाचा थरारक कट रचल्याचा प्रकार उघडकीस आला आहे. गेम खेळण्यासाठी मित्र व इतरांकडून घेतलेले कर्ज फेडण्यासाठी त्याच्यावर दबाव आणला जात होता. वडिलांकडे थेट पैसे मागण्याची हिम्मत न झाल्याने, त्याने स्वतःच्या अपहरणाचा बनाव रचून त्यांच्याकडून खंडणी उकळण्याची योजना आखली.
फोन बंद करून रचला अपहरणाचा बनाव; एआय (AI) फोटोचा पुरावा म्हणून वापर
उत्तर प्रदेशातील संत कबीरनगर भागात हा प्रकार घडला. मंगळवारी संध्याकाळी सुमारे 7 वाजता सिकरीगंजला जातो असे सांगून हा विद्यार्थी घरातून बाहेर पडला. तिथे पोहोचताच त्याने आपला मोबाईल फोन बंद केला आणि अपहरणाचा भास निर्माण केला. त्यानंतर रात्री 7:39 ते 9:47 दरम्यान मित्राच्या मोबाईलवरून वडिलांच्या व्हॉट्सॲपवर मेसेज पाठवून आपले अपहरण झाल्याचे भासवल. हे कृत्य खरे वाटावे म्हणून दिल्लीतील एका मैत्रिणीच्या मदतीने एआय (AI) टूलद्वारे स्वतःच्या जखमी डोळ्याचा भीषण फोटो तयार केला आणि वडिलांना पाठवून मारहाणीचा बनाव रचला.
1 लाखांवरून 2 लाखांपर्यंत वाढवली खंडणीची मागणी
विद्यार्थ्याने सुरुवातीला वडिलांकडे 1 लाख रुपयांची मागणी करून ती रक्कम ऑनलाइन ट्रान्सफर करण्यास सांगितले. परंतु वडिलांनी ऑनलाइन पैसे भरण्यास असमर्थता दर्शवल्यानंतर, त्याने मागणी वाढवून थेट 2 लाख रुपये रोख देण्याची मागणी केली. मुलाचा रक्तबंबाळ झालेला फोटो आणि अपहरणाचे मेसेज पाहून प्रचंड हादरलेल्या वडिलांनी कोणताही उशीर न करता तात्काळ पोलीस ठाणे गाठले.
हेही वाचा – Beed Crime : बीडमध्ये ऑनलाइन फसवणूक! कमिशनच्या आमिषाने 24 कोटींचा गंडा; चार अनोळखी खातेदारांवर गुन्हा दाखल
पोलिसांनी काढला डिजिटल माग; रात्री 2 वाजता मित्राच्या घरी सापडला विद्यार्थी
घटनेचे गांभीर्य ओळखून धनघटा व सिकरीगंज पोलिसांनी संयुक्त मोहीम राबवून तपास सुरू केला. मोबाईलचे शेवटचे लोकेशन आणि डिजिटल फूटप्रिंट्सचा माग काढत पोलीस पथक हा मुलगा जिथे होता, त्या गावापर्यंत पोहोचले. रात्री सुमारे 2 वाजता पोलिसांनी धाड टाकली असता, तो विद्यार्थी मित्राच्या घरी सुखरूप आणि सुरक्षित अवस्थेत आढळून आला.
पोलिसांच्या चौकशीत गुन्हा मान्य; कौटुंबिक सुटकेनंतर तपास सुरू
पोलीस चौकशीदरम्यान विद्यार्थ्याने ऑनलाईन गेमिंगच्या कर्जापोटी हा संपूर्ण अपहरणाचा बनाव रचल्याची कबुली दिली. तीन बहिणींमध्ये एकुलता एक असलेला मुलगा सुरक्षित आढळल्याने कुटुंबाला दिलासा मिळाला असला, तरीही त्याच्या या कृत्यामुळे वडिलांना मोठा धक्का बसला आहे. पोलिसांनी कायदेशीर प्रक्रियेनंतर मुलाला त्याच्या पालकांच्या स्वाधीन केले असून, बनावट एआय (AI) फोटो तयार करण्यात मदत करणाऱ्या त्याच्या मैत्रिणीच्या भूमिकेचा पोलीस अधिक तपास करत आहेत.
