Ahmedabad Cyber Crime Fake IDs Women Harassment 2026: अहमदाबाद सायबर गुन्हे शाखेने महिलांना अश्लील फोटो, व्हिडीओ आणि आक्षेपार्ह मेसेज पाठवून त्यांचा मानसिक छळ करणाऱ्या एका मोठ्या टोळीचा पर्दाफाश केला आहे. या कारवाईत एका महिलेसह एकूण 8 आरोपींना अटक करण्यात आली असून त्यांच्याविरोधात आतापर्यंत 11 एफआयआर (FIR) दाखल करण्यात आले आहेत. गुजरात राज्यातील विविध जिल्ह्यांसह राजस्थानमधून या आरोपींना तांत्रिक तपासाच्या आधारे शोधून काढण्यात आले. सायबर स्टॉकिंग, ऑनलाईन बुलिंग आणि अश्लील मजकूर पाठवून महिलांना धमकावल्याचा ठपका त्यांच्यावर ठेवण्यात आला आहे.
सुरेश पुरीने 10 आयडीद्वारे 300 महिलांना केले लक्ष्य; एआय (AI) चाही गैरवापर
या संपूर्ण सायबर गुन्ह्यात धक्कादायक माहिती समोर आली आहे. सुरेश पुरी नावाच्या मुख्य आरोपीने मागील 6 महिन्यांत तब्बल 10 बनावट सोशल मीडिया आयडी तयार करून सुमारे 300 महिलांना अश्लील ऑडिओ, व्हिडीओ आणि मेसेज पाठवून त्रास दिला. दुसऱ्या केयूर लक्कड नावाच्या आरोपीने महिलांच्या नावाने 8 बनावट अकाउंट्स उघडून पीडितांच्या नातेवाईकांशी संपर्क साधून त्यांची बदनामी करण्याचा प्रयत्न केला. इतकेच नव्हे, तर काही आरोपींनी सोशल मीडियावर 'लव्ह गुरू' किंवा 'योगगुरू' भासवून महिलांचे फोटो मिळवले आणि एआय (AI) तंत्रज्ञानाच्या मदतीने त्यांचे अश्लील फोटो तयार करून ब्लॅकमेल करण्याचा प्रयत्न केला.
'मिशन सायबर रक्षिका' मोहीम आणि महिलांसाठी विशेष 10 सदस्यीय पथक
महिलांचे ऑनलाईन छळापासून रक्षण करण्यासाठी अहमदाबाद पोलिसांनी जून 2026 मध्ये 'मिशन सायबर रक्षिका – #SecureHerSpace' ही विशेष मोहीम सुरू केली होती. या मोहिमेअंतर्गत महिला अधिकाऱ्यांमार्फत तक्रारदारांची ओळख पूर्णपणे गुप्त ठेवून कारवाई करण्यात आली. सायबर स्पेसमध्ये महिलांना निर्भयपणे तक्रार करता यावी यासाठी पोलीस आयुक्त अनुपम सिंह गेहलोत यांच्या मार्गदर्शनाखाली 1 निरीक्षक, 1 उपनिरीक्षक आणि 8 महिला कर्मचाऱ्यांचे विशेष 10 सदस्यीय 'सायबर रक्षक' पथक तैनात करण्यात आले आहे.
सोशल मीडिया सुरक्षेबाबत पोलिसांचे महत्त्वाचे मार्गदर्शन
तपासादरम्यान अनेक आरोपींनी सार्वजनिक (Public) आणि असुरक्षित प्रोफाइलचा गैरफायदा घेतल्याचे उघड झाले आहे. अधिक लाईक्स किंवा फॉलोअर्स मिळवण्याच्या मोहात अनोळखी व्यक्तींशी संपर्क साधणे धोकादायक ठरू शकते, असा इशारा पोलिसांनी दिला आहे. सुरक्षिततेसाठी वापरकर्त्यांनी खालील गोष्टींचे पालन करण्याचे आवाहन करण्यात आले आहे:
– अकाउंट प्रायव्हेट ठेवा: शक्य असल्यास तुमचे सोशल मीडिया प्रोफाइल प्रायव्हेट ठेवावे.
– टू-फॅक्टर ऑथेंटिकेशन: अकाउंट सुरक्षेसाठी टू-फॅक्टर ऑथेंटिकेशन (2-Factor Authentication) आणि मजबूत पासवर्ड वापरावेत.
– वैयक्तिक माहिती गुप्त ठेवा: मोबाईल नंबर, घराचा पत्ता किंवा लाईव्ह लोकेशन सार्वजनिकपणे शेअर करू नये.
अनोळखी रिक्वेस्ट स्वीकारू नका; 1930 हेल्पलाइनवर तक्रार करण्याचे आवाहन
अनोळखी व्यक्तींच्या फ्रेंड किंवा फॉलो रिक्वेस्ट न स्वीकारण्याचा सल्ला सायबर विभागाने दिला आहे. कोणत्याही प्रकारच्या ऑनलाईन छळवणुकीला किंवा ब्लॅकमेलिंगला बळी पडल्यास न घाबरता तात्काळ 1930 या सायबर हेल्पलाइन क्रमांकावर संपर्क साधावा किंवा स्थानिक सायबर पोलीस ठाण्यात तक्रार नोंदवावी, असे आवाहन प्रशासनाने केले आहे.
