Weather Update: दिल्लीसह 11 राज्यांमध्ये उष्णतेसाठी यलो अलर्ट जारी; ‘या’ भागात वादळांसह मुसळधार पावसाची शक्यता

नवी दिल्ली: हवामान विभागाने (IMD) पुढील सात दिवसांत देशाच्या विविध भागात उष्णतेची लाट आणि मुसळधार पावसाचा इशारा दिला आहे. पुढील 21 तासांत दिल्लीसह 11 राज्यांमध्ये तीव्र उष्णता जाणवण्याची शक्यता आहे. तर काही राज्यांमध्ये वादळ आणि मुसळधार पाऊस पडण्याची शक्यता आहे. तथापि, पुढील सहा दिवसांत वायव्य भारतात तापमान 2-3 अंश सेल्सिअसने वाढण्याची शक्यता आहे. पुढील तीन दिवसांत मध्य भारत आणि गुजरातमध्ये 2 अंश सेल्सिअसने वाढ होऊ शकते, तर पूर्व भारतात 4 ते 6 अंश सेल्सिअसने वाढ होऊ शकते.

11 राज्यांमध्ये उष्णतेच्या लाटेचा इशारा – 

आज पूर्व राजस्थान, उत्तर प्रदेश, मध्य प्रदेश, छत्तीसगड, हरियाणा, ओडिशा, पंजाब आणि दिल्लीमध्ये तीव्र उष्णतेचा परिणाम दिसून येऊ शकतो. 24 ते 26 एप्रिल दरम्यान बिहार आणि झारखंडमधील अनेक भागात रात्रीचे तापमानही जास्त राहण्याची शक्यता आहे. 

दिल्ली-एनसीआर हवामान अंदाज – 

दरम्यान, पुढील तीन दिवस दिल्ली-एनसीआर प्रदेशात हवामान कोरडे राहण्याची शक्यता आहे. तसेच कमाल तापमान 42 अंश सेल्सिअसपर्यंत वाढण्याची शक्यता आहे. शुक्रवार आणि शनिवारी तीव्र उष्णतेसाठी यलो अलर्ट जारी करण्यात आला आहे. गेल्या 24 तासांत कमाल तापमान 38 अंश सेल्सिअस ते 40 अंश सेल्सिअस दरम्यान होते, तर किमान तापमान 25 अंश सेल्सिअस ते 26 अंश सेल्सिअस दरम्यान होते.

हेही वाचा – Marathwada Water Crisis: मराठवाड्यात 142 गावांना 215 टँकरने पाणी पुरवठा

ईशान्य भारतात मुसळधार पावसाची शक्यता – 

हवामान विभागाने वर्तवलेल्या अंदाजानुसार, 24 ते 26 एप्रिल दरम्यान आसाम, मेघालय आणि अरुणाचल प्रदेशात मुसळधार पाऊस पडू शकतो. 24 एप्रिल रोजी नागालँड, मणिपूर, मिझोरम आणि त्रिपुरामध्येही मुसळधार पावसासह वादळ येऊ शकते. या राज्यांमध्ये 30 ते 50 किमी/ताशी वेगाने वारे वाहू शकतात.

हेही वाचा – उन्हाच्या झळांपासून दिलासा: अमरावतीत दुपारच्या वेळचे ट्रॅफिक सिग्नल बंद ठेवण्याचा निर्णय

दक्षिण भारतात वादळी वाऱ्यासह पावसाची शक्यता – 

याशिवाय, केरळ, किनारी आंध्र प्रदेश आणि कर्नाटकसह दक्षिण भारतीय राज्यांमध्ये जोरदार वाऱ्यांसह पाऊस पडण्याची शक्यता आहे. पुढील सात दिवसांत तामिळनाडू, पुद्दुचेरी आणि तेलंगणामध्ये वादळ आणि विजांच्या कडकडाटासह पाऊस पडण्याची शक्यता आहे.