Virat Kohli Fan Crying Video : बॅट फेकली, रडत रडत आला…, विराटची ऑटोग्राफ न मिळाल्याने चिमुकल्या चाहत्याचा हिरमोड झाला; व्हिडिओ व्हायरल

Virat Kohli Fan Crying Video :  भारतीय क्रिकेटचा सुपरस्टार विराट कोहली सध्या त्याच्या आयपीएल (IPL) संघ ‘रॉयल चॅलेंजर्स बेंगळुरू’ (RCB) सोबत दिल्लीत आहे. सोमवारी अरुण जेटली स्टेडियमवर झालेल्या सामन्यानंतर एक मन हेलावणारी घटना समोर आली. विराटचा एक चिमुकला चाहता त्याचे ऑटोग्राफ घेण्यासाठी धावत त्याच्याकडे गेला. मात्र, विराटने त्याच्याकडे लक्ष दिले नाही आणि तो पुढे निघून गेला. सुरक्षा रक्षकांनी त्या मुलाला रोखले. यामुळे तो चिमुकला प्रचंड निराश झाला आणि मोठमोठ्याने रडू लागला. रागाच्या भरात त्याने आपली बॅट जमिनीवर फेकून दिली आणि रडत-रडत परतला. या घटनेचा व्हिडिओ सोशल मीडियावर वाऱ्यासारखा पसरला आहे.

सोशल मीडियावर संमिश्र प्रतिक्रिया
हा व्हिडिओ व्हायरल झाल्यानंतर क्रिकेट प्रेमींमध्ये दोन गट पडले आहेत. काही चाहत्यांनी नाराजी व्यक्त करताना म्हटले की, ‘एका लहान मुलाला अशा प्रकारे दुर्लक्षित करणे चुकीचे आहे.’ एका युजरने लिहिले की, ‘विराट कदाचित त्या वेळी वेगळ्या मानसिकतेत असेल, पण त्या मुलाची अवस्था पाहून वाईट वाटले.’ दुसरीकडे, विराटने यापूर्वी अनेकदा चाहत्यांसोबत वेळ घालवल्याचे फोटो शेअर करत त्याच्या समर्थकांनी त्याची बाजू सावरली. अनेकांच्या मते, गर्दी आणि गोंधळामुळे विराटचे त्या मुलाकडे कदाचित लक्ष गेले नसावे, असेही काही लोक म्हणत आहेत.

हेही वाचा – IPL 2026 New Record: एकाच सामन्यात 20 ‘डॉट बॉल्स’; ‘या’ खेळाडूने मोडला दिग्गज गोलंदाजांचा विक्रम; IPL मध्ये रचला नवा इतिहास

विराट कोहलीचा ऐतिहासिक टप्पा
दरम्यान, सोमवारी विराटने बॅटने नवा इतिहास रचला. आयपीएलच्या इतिहासात 9,000 धावांचा टप्पा ओलांडणारा तो जगातील पहिला फलंदाज ठरला आहे. अक्षर पटेलच्या गोलंदाजीवर एक धाव घेत त्याने हा विक्रम प्रस्थापित केला. त्यानंतर टी. नटराजनच्या षटकात सलग 2 षटकार ठोकून त्याने आरसीबीला दणदणीत विजय मिळवून दिला. 37 वर्षीय विराटने आपल्या फॉर्मने पुन्हा एकदा टीकाकारांची तोंडे बंद केली आहेत.

दिल्लीचा खराब खेळ आणि आरसीबीचा एकतर्फी विजय
दिल्ली कॅपिटल्ससाठी हा दिवस अतिशय वाईट ठरला. आरसीबीच्या गोलंदाजांनी दिल्लीच्या फलंदाजीचे कंबरडे मोडले. जोश हेझलवूडने 3.3 षटकांत 12 धावा देऊन 4 बळी घेतले, तर भुवनेश्वर कुमारने पॉवरप्लेमध्येच 3 गडी बाद करून दिल्लीला बॅकफूटवर ढकलले. डेव्हिड मिलर आणि अभिषेक पोरेल यांनी 7 व्या विकेटसाठी 35 धावांची भागीदारी केल्यामुळे दिल्लीचा संघ 75 धावांपर्यंत मजल मारू शकला. तर, 76 धावांचे सोपे आव्हान आरसीबीने केवळ 1 गडी गमावून पूर्ण केले आणि 9 गडी राखून मोठा विजय मिळवला. दिल्लीचा कर्णधार अक्षर पटेल याच्यासाठी हा पराभव मोठा धक्का मानला जात आहे, कारण घरच्या मैदानावर त्यांच्या संघाला साधी लढतही देता आली नाही.

हेही वाचा – Lowest Score In History Of IPL : सर्वात अनुभवी खेळाडूंचा संघ, पण Lowest Score चा रेकॉर्ड मोडण्यात अग्रेसर; IPL च्या इतिहासातील या संघांचा लाजिरवाणा पराभव, वाचा यादी