Robin Smith Passes Away: मोठी बातमी! माजी क्रिकेटपटू रॉबिन स्मिथ यांचे निधन; 62 व्या वर्षी घेतला अखेरचा श्वास
Robin Smith Passes Away: इंग्लंडचे माजी क्रिकेटपटू रॉबिन स्मिथ यांचे 62 व्या वर्षी निधन झाले आहे. 1988 ते 1996 दरम्यान इंग्लंडसाठी 62 कसोटी आणि 71 एकदिवसीय सामने खेळलेले स्मिथ, 1992 च्या विश्वचषक उपविजेत्या संघाचा भाग होते. स्मिथच्या कुटुंबाने त्याच्या निधनाची माहिती दिली. स्मिथ यांच्या निधनाने इंग्लडच्या क्रिकेटविश्वात शोककळा पसरली आहे.
2004 मध्ये सर्व प्रकारच्या क्रिकेटमधून निवृत्ती
स्मिथने इंग्लंडसाठी 62 कसोटी सामने खेळताना 4,236 धावा केल्या, ज्यामध्ये 9 शतके होती, त्यापैकी तीन शतके वेस्ट इंडिजविरुद्ध होती. त्याची सर्वोच्च कसोटी धावसंख्या 175 होती, जी 1994 मध्ये वेस्ट इंडिजविरुद्ध नोंदवली गेली. तसेच, हॅम्पशायरच्या काउंटी संघासाठीही स्मिथने अनेक सामने खेळले आणि 2004 मध्ये सर्व प्रकारच्या क्रिकेटमधून निवृत्ती घेतली. निवृत्ती नंतर त्याचे मानसिक आरोग्य सुद्धा बिघडत गेले होते.
हेही वाचा – IPL 2026 Mini Auction: आईपीएल 2026 मिनी लिलावासाठी 1,355 खेळाडूंची नोंदणी; 45 जण 2 कोटींच्या यादीत
एकदिवसीय क्रिकेटमध्ये स्मिथने 1993 मध्ये ऑस्ट्रेलियाविरुद्ध नाबाद 167 धावा केल्या, ज्यामुळे इंग्लंडच्या फलंदाजाने केलेली सर्वोच्च वैयक्तिक धावसंख्या म्हणून हा विक्रम 23 वर्षे टिकला. 2016 मध्ये अॅलेक्स हेल्सने पाकिस्तानविरुद्ध 171 धावा करून हा विक्रम मोडला. स्मिथने एकदिवसीय क्रिकेटमध्ये 71 सामन्यांमध्ये 70 डावांमध्ये 2,419 धावा केल्या आणि 39.01 च्या सरासरीने फलंदाजी केली.
दरम्यान, इंग्लंड आणि वेल्स क्रिकेट बोर्डाचे (ईसीबी) अध्यक्ष रिचर्ड थॉम्पसन यांनी स्मिथच्या निधनावर दु:ख व्यक्त केले आणि त्यांना श्रद्धांजली अर्पण केली. थॉम्पसन म्हणाले की, रॉबिन स्मिथ हा असा खेळाडू होता जो जगातील काही वेगवान गोलंदाजांसमोरही आत्मविश्वासाने सामना करत असे आणि त्याची फलंदाजी चाहत्यांसाठी अभिमानाची होती. तथापी, हॅम्पशायर क्रिकेट क्लबने देखील स्मिथला श्रद्धांजली वाहिली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.