CSK ला चित्रपटांची गाणी वापरणं पडलं महागात; या टीव्ही कंपनीने ठोकला कॉपीराइटचा दावा, काय आहे प्रकरण?

Jailer And Coolie Copyright Strike: सन टीव्ही नेटवर्कने (Sun TV Network) प्रसिद्ध आयपीएल फ्रँचायझी चेन्नई सुपर किंग्सविरुद्ध (CSK) कॉपीराइट उल्लंघनाप्रकरणी मद्रास उच्च न्यायालयात धाव घेतली आहे. सीएसकेने त्यांच्या नवीन जर्सीच्या प्रमोशनसाठी तयार केलेल्या एका व्हिडिओमध्ये 'जेलर', 'जेलर 2' आणि 'कुली' या चित्रपटांतील गाणी, बॅकग्राउंड स्कोअर आणि संवादांचा वापर केल्याचा आरोप करण्यात आला आहे. सन टीव्हीच्या मते, हे सर्व साहित्य व्यावसायिक हेतूने वापरले गेले असून त्यासाठी कोणतीही पूर्वपरवानगी घेण्यात आली नव्हती. 

व्यावसायिक वापर आणि कायदेशीर नोटीस
चेन्नई सुपर किंग्सने हा व्हिडिओ त्यांच्या अधिकृत सोशल मीडिया प्लॅटफॉर्मवर शेअर केला होता, ज्यामध्ये खेळाडू 2399 रुपये किमतीची जर्सी परिधान केलेले दिसत होते. हा व्हिडिओ पूर्णपणे व्यावसायिक स्वरूपाचा असल्याने सन टीव्हीने 1 मार्च 2026 रोजी फ्रँचायझीला कायदेशीर नोटीस बजावली होती. सन टीव्हीने न्यायालयात संगीतकार अनिरुद्ध रविचंदर यांच्यासोबतचा करारही सादर केला, ज्यातून हे सिद्ध होते की या चित्रपटांतील संगीताचे सर्व व्यावसायिक हक्क केवळ त्यांच्याकडेच आहेत.

हेही वाचा – MS Dhoni In CSK : 'या हंगामात धोनीला पिवळ्या जर्सीमध्ये पाहण्याची ही शेवटची वेळ असू शकते'; IPL 2026 च्या आधी माजी क्रिकेटपटूचं सूचक वक्तव्य

सीएसकेकडून व्हिडिओ हटवून दुरुस्ती
सन टीव्हीने कॉपीराइट स्ट्राइक दिल्यानंतर आणि कायदेशीर नोटीस मिळाल्यानंतर, चेन्नई सुपर किंग्सने संबंधित व्हिडिओ त्वरित आपल्या सोशल मीडियावरून हटवला. न्यायालयातील सुनावणीदरम्यान वरिष्ठ वकील जे. रवींद्रन यांनी सांगितले की, फ्रँचायझीने आता वादग्रस्त मजकूर वापरणे बंद केले असून नवीन पार्श्वसंगीत असलेला सुधारित व्हिडिओ अपलोड केला आहे. तरीही, भविष्यात अशा घटना टाळण्यासाठी आणि कॉपीराइट कायद्याचे संरक्षण करण्यासाठी सन टीव्हीने न्यायालयात आपली बाजू खंबीरपणे मांडली आहे.

मद्रास उच्च न्यायालयातील सुनावणी
13 मार्च रोजी झालेल्या सुनावणीत न्यायालयाने सन टीव्हीचे दावे आणि सीएसकेने व्हिडिओ हटवल्याची बाब नोंदवून घेतली आहे. चित्रपटांतील संवाद आणि गाणी चाहत्यांच्या लगेच लक्षात आल्याने हे प्रकरण ऑनलाइन चर्चेत आले होते. सध्या हे प्रकरण न्यायप्रविष्ट असून, केवळ व्हिडिओ हटवल्याने ही कायदेशीर प्रक्रिया थांबणार की फ्रँचायझीला दंड आकारला जाणार, याकडे सर्वांचे लक्ष लागले आहे. चित्रपटांचे हक्क असलेल्या निर्मिती संस्था आता आपल्या कंटेंटबाबत अधिक सतर्क झाल्याचे या प्रकरणावरून दिसून येते.

हेही वाचा – Dhurandhar 2 Advance Booking: 'धुरंधर 2'चा प्रदर्शनापूर्वीच बॉक्स ऑफिसवर धुमाकूळ; प्री-बुकींगने तब्बल 60 कोटींचा टप्पा ओलांडला