पुणे : गेल्या तीन महिन्यांपासून उकाड्याने हैराण झालेल्या राज्यातील नागरिकांना लवकरच दिलासा मिळण्याची शक्यता आहे. केरळमध्ये यंदा मान्सून लवकर दाखल होणार असून परिणामी महाराष्ट्रातही पावसाने आगमन वेळेआधीच होण्याची शक्यता आहे. मात्र सध्यातरी नागरिकांना उष्णतेचा सामना करावा लागत आहे. राज्यात सध्या हवामानात मोठी स्थित्यंतरे पाहायला मिळत असून भारतीय हवामान विभागाने (IMD) आज, शनिवारी राज्यासाठी दुहेरी इशारा जारी केला आहे. राज्यातील काही जिल्ह्यांमध्ये उन्हाचा चटका अधिक तीव्र होणार असून नागरिकांना उष्णतेच्या लाटेचा सामना करावा लागणार आहे. तर दुसरीकडे, काही प्रांतांमध्ये ढगाळ हवामानासह विजांच्या कडकडाटासह हलका ते मध्यम स्वरूपाचा अवकाळी पाऊस पडण्याची शक्यता वर्तवण्यात आली आहे. हवामानातील या बदलांमुळे पुढील 24 तास अत्यंत महत्त्वाचे मानले जात आहेत.
दरम्यान, कोकण किनारपट्टीच्या भागात सध्या हवामान अत्यंत उष्ण आणि दमट राहण्याचा अंदाज आहे. मुंबई, ठाणे आणि रायगड या जिल्ह्यांमध्ये नागरिकांना दिवसभर उन्हाचा तीव्र चटका सहन करावा लागणार आहे. समुद्रकिनारी भागांमध्ये आर्द्रतेचे प्रमाण वाढल्यामुळे उकाड्यात मोठी वाढ होईल. हवामान विभागाने ठाणे, रायगड, रत्नागिरी आणि सिंधुदुर्ग या जिल्ह्यांसाठी उष्ण आणि दमट हवामानाचा 'यलो अलर्ट' जारी केला आहे. तर पश्चिम महाराष्ट्रात वातावरणात लक्षणीय बदल होण्याची शक्यता आहे. कोल्हापूर, सातारा, सांगली आणि सोलापूर या जिल्ह्यांमध्ये दुपारनंतर ढगाळ वातावरण निर्माण होऊन मेघगर्जनेसह हलक्या ते मध्यम स्वरूपाच्या पावसाची दाट शक्यता आहे. या भागात ताशी 40 ते 50 किमी वेगाने वादळी वारे वाहू शकतात. या जिल्ह्यांना पावसाचा 'यलो अलर्ट' दिला आहे.
मराठवाडा प्रांतातील लातूर आणि धाराशिव या जिल्ह्यांमध्ये पावसाची शक्यता वर्तवण्यात आली आहे. या भागात विजांच्या कडकडाटासह आणि सोसाट्याच्या वाऱ्यासह हलक्या पावसाच्या सरी कोसळू शकतात. तर दुसरीकडे छत्रपती संभाजीनगर, जालना आणि हिंगोली या अन्य जिल्ह्यांमध्ये उन्हाचा प्रभाव कायम राहणार आहे. तसेच विदर्भ आणि उत्तर महाराष्ट्रात उष्णतेचा प्रकोप अधिक तीव्र होताना दिसत आहे. जळगाव, अकोला, अमरावती आणि वर्धा या भागात तापमानाचा पारा आधीच उच्चांकी पातळीवर पोहोचला आहे. हवामान विभागाने अकोला आणि अमरावती जिल्ह्यांसाठी उष्णतेच्या लाटेचा यलो अलर्ट दिला आहे. दुपारच्या वेळी नागरिकांनी अनावश्यक घराबाहेर पडणे टाळावे, असा सल्ला प्रशासनाकडून देण्यात आला आहे.
