Sharad Pawar : ‘टप्प्याटप्प्याने धक्के देणे हेच पंतप्रधानांचे धोरण’; सिलिंडर दरवाढीवरून शरद पवारांचा मोदी सरकारवर हल्लाबोल

Sharad Pawar Reacts on Gas Price Hike : पंतप्रधान नरेंद्र मोदी यांनी जनतेला महागाई नियंत्रणात ठेवण्याचे आश्वासन दिले होते; परंतु, याचा अर्थ सर्वसामान्यांना टप्प्याटप्प्याने दरवाढीचे मोठे धक्के देणे असा होत नाही, अशा तीव्र शब्दांत राष्ट्रवादी काँग्रेस (शरदचंद्र पवार) पक्षाचे प्रमुख आणि माजी केंद्रीय मंत्री शरद पवार यांनी केंद्र सरकारवर निशाणा साधला आहे. घरगुती गॅस सिलिंडरच्या किमतीत पुन्हा एकदा मोठी वाढ झाल्यानंतर त्यांनी ही संतप्त प्रतिक्रिया दिली. सातत्याने होणाऱ्या या दरवाढीचा थेट फटका सामान्य माणसाच्या कौटुंबिक बजेटला बसत असून, या वाढत्या महागाईची मोठी राजकीय किंमत सत्ताधाऱ्यांना येणाऱ्या काळात योग्य वेळी मोजावी लागेल, असा इशाराही पवार यांनी दिला आहे.

स्वयंपाकघराचे बजेट कोलमडले; घरगुती सिलिंडर थेट 29 रुपयांनी महागला
देशभरात महागाईने होरपळणाऱ्या सर्वसामान्यांना केंद्र सरकारने आणखी एक मोठा झटका दिला आहे. घरगुती वापराच्या 14.2 किलोच्या एलपीजी सिलिंडरच्या किमतीत तब्बल 29 रुपयांची वाढ करण्यात आली आहे. या दरवाढीमुळे मुंबई, दिल्ली आणि कोलकातासह संपूर्ण देशात सिलिंडरचा दर 912 रुपयांवरून थेट 941 रुपयांवर जाऊन पोहोचला आहे. सरकारी तेल कंपन्यांना सध्या प्रत्येक सिलिंडरमागे सुमारे 700 रुपयांचा तोटा सहन करावा लागत असल्याने, कंपन्यांचे नुकसान अंशतः भरून काढण्यासाठी हा निर्णय घेण्यात आल्याचे सूत्रांचे म्हणणे आहे; मात्र यामुळे आगामी काळात सिलिंडर आणखी महाग होण्याची दाट शक्यता वर्तवली जात आहे.

पेट्रोल-डिझेलसह सीएनजी आणि कमर्शियल सिलिंडरचाही भडका
केवळ घरगुती गॅसच नव्हे, तर इतर इंधनांच्या दरांनीही सर्वसामान्यांचे कंबरडे मोडले आहे. मागील काही दिवसांतील इंधन बाजारातील स्थिती अशी आहे:
पेट्रोल आणि डिझेल: मे महिन्याच्या मध्यापासून आतापर्यंत पेट्रोल आणि डिझेलच्या किमतींमध्ये प्रति लिटर तब्बल 7 रुपये 50 पैशांची वाढ झाली आहे.
सीएनजी (CNG): वाहनांसाठी लागणाऱ्या कंप्रेस्ड नॅचरल गॅसच्या दरातही प्रति किलोमागे 6 रुपयांची वाढ नोंदवली गेली आहे.
व्यावसायिक सिलिंडर: हॉटेल आणि व्यावसायिक वापराच्या 19 किलोच्या सिलिंडरच्या दरात 1 जून रोजी 42 रुपयांची वाढ झाली होती.

हेही वाचा – Surpiya Sule Vs CM : ‘बोलायला लावू नका,’ निवडणुकीतील घोडेबाजाराबाबत सुप्रिया सुळेंचं आक्रमक वक्तव्य; फडणवीसांनीही थेट…

अवघ्या 6 महिन्यांत ‘कमर्शियल’ सिलिंडरचे दर दुप्पट!
व्यावसायिक गॅस सिलिंडरच्या किमतींमधील वाढ तर सामान्यांचे डोळे पांढरे करणारी ठरली आहे. गेल्या अवघ्या 5 ते 6 महिन्यांच्या कालावधीत 19 किलोच्या सिलिंडरचे दर थेट दुप्पट झाले आहेत. 1 जानेवारीपूर्वी या सिलिंडरची किंमत 1580 रुपये होती, जी 1 जून रोजी थेट 3113 रुपये 50 पैशांवर पोहोचली आहे. या वर्षातील महिन्यावार झालेली वाढ अशी आहे:
– जानेवारी: 111 रुपये वाढ
– फेब्रुवारी: 49 रुपये वाढ
– मार्च: 28 रुपये आणि त्यानंतर 7 मार्चला पुन्हा 114 रुपये वाढ
– एप्रिल: 195 रुपये वाढ
– मे: रेकॉर्डब्रेक 993 रुपये वाढ
– जून: 43 रुपये वाढ

हॉटेलमधील खाद्यपदार्थ महागले; आगामी काळात चिंता आणखी वाढणार
व्यावसायिक सिलिंडरच्या दरात मागील 6 महिन्यांत झालेल्या या अफाट वाढीमुळे हॉटेलमधील खाद्यपदार्थांचे दर गगनाला भिडले आहेत, ज्याचा अप्रत्यक्ष फटका पुन्हा सर्वसामान्यांच्या खिशालाच बसत आहे. आधीच पेट्रोल, डिझेल आणि अन्नधान्याच्या वाढत्या किमतींमुळे नागरिक त्रस्त असताना आता स्वयंपाकघरातील गॅसही महागल्याने देशात चिंतेचे वातावरण आहे. त्यातच आगामी काळात जर पावसाने ओढ दिली किंवा पावसाचे प्रमाण कमी राहिले, तर बाजारातील महागाईचा हा भडका अधिक उग्र रूप धारण करेल, अशी भीती आता व्यक्त केली जात आहे.

हेही वाचा – Bribery Case: ‘एसीबी’चा एकाच दिवशी दुहेरी स्ट्राईक! जालन्यात तहसीलदार तर बीडमध्ये पोलीस कर्मचाऱ्याला लाच घेताना रंगेहात पकडलं