मुंबईतील अखिल भारतीय राजभाषा संमेलनानंतर महाराष्ट्राच्या राजकारणात भाषेचा मुद्दा पुन्हा एकदा चर्चेच्या केंद्रस्थानी आला आहे. या पार्श्वभूमीवर मनसे प्रमुख राज ठाकरे यांनी सोशल मीडियावर केलेली एक मोजकी पोस्ट मोठ्या चर्चेचा विषय ठरली आहे. “कावळ्याच्या शापाने गाय मरत नसते. तूर्तास एवढेच!” असे त्यांनी लिहिल्याने राजकीय वर्तुळात विविध अर्थ लावले जात आहेत.
राज ठाकरे यांनी या पोस्टमध्ये कोणाचेही नाव घेतलेले नाही. मात्र ही पोस्ट केंद्रीय गृहमंत्री अमित शाह यांच्या मुंबईतील राजभाषा संमेलनातील भाषणानंतर आल्याने तिचा संदर्भ त्याच कार्यक्रमाशी जोडून पाहिला जात आहे. सोशल मीडियावर समर्थक आणि विरोधकांकडून या पोस्टवर वेगवेगळ्या प्रतिक्रिया उमटत असून, ती मोठ्या प्रमाणात व्हायरल झाली आहे.
नवी मुंबईतील वाशी येथे पार पडलेल्या अखिल भारतीय राजभाषा संमेलनात अमित शाह यांनी भारतीय भाषांचे महत्त्व अधोरेखित केले. त्यांनी महाराष्ट्र हा विविध भाषांचा सन्मान करणारा प्रदेश असल्याचे सांगत मराठीसोबत कोकणी, गुजराती, सिंधी, हिंदी, कन्नड आणि वारलीसारख्या भाषांचाही उल्लेख केला. तसेच मातृभाषेचा अभिमान बाळगतानाच इतर भारतीय भाषांनाही समान आदर दिला पाहिजे, असा संदेश त्यांनी दिला.
याच कार्यक्रमात मुख्यमंत्री देवेंद्र फडणवीस यांनीही भाषांबाबत महत्त्वाचे विधान केले. “मराठी माझी आई आहे,” असे सांगतानाच इतर भारतीय भाषांचाही सन्मान राखण्याचे आवाहन त्यांनी केले. या वक्तव्यांनंतर राज्यभरात भाषा आणि ओळखीच्या मुद्द्यावर नव्याने चर्चा सुरू झाली
अशा वातावरणात राज ठाकरे यांची सूचक पोस्ट समोर आल्याने तिचा राजकीय अर्थ लावला जात आहे. विशेष म्हणजे, त्यांनी कोणावरही थेट टीका केली नसली तरी “तूर्तास एवढेच” या शेवटच्या वाक्यामुळे पुढील काळात ते या विषयावर अधिक स्पष्ट भूमिका मांडणार का, याबाबत उत्सुकता वाढली आहे.
मनसेकडून या पोस्टबाबत कोणतेही अधिकृत स्पष्टीकरण देण्यात आलेले नाही. मात्र सोशल मीडियावर या एका वाक्याभोवती मोठी चर्चा रंगली आहे. काहींनी ही भाषिक अस्मितेची भूमिका असल्याचे म्हटले, तर काहींनी ती राजकीय संदेश मानला.
दरम्यान, मुंबईतील राजभाषा संमेलनानंतर भाषा आणि राजकारण या दोन्ही मुद्द्यांवर राज्यात चर्चा अधिक तीव्र होताना दिसत आहे. अमित शाह यांचे भाषण, देवेंद्र फडणवीस यांची भूमिका आणि त्यानंतर आलेली राज ठाकरे यांची पोस्ट या घटनांमुळे महाराष्ट्रातील भाषिक राजकारण पुन्हा एकदा केंद्रस्थानी आले आहे. आता राज ठाकरे पुढे या विषयावर अधिक सविस्तर भूमिका मांडतात का, याकडे राजकीय वर्तुळाचे लक्ष लागले आहे.
