Nora Fatehi Song Controversy: नोरा फतेहीच्या ‘त्या’ गाण्यावर बंदीची मागणी; अश्लील शब्द आणि आक्षेपार्ह डान्स स्टेप्समुळे मोठा वाद

Nora Fatehi Song Controversy : नोरा फतेहीच्या आगामी 'केडी – द डेविल' चित्रपटातील 'सरके चुनर तेरी सरके' या गाण्यावरून सध्या बॉलिवूडमध्ये मोठे वादळ उठले आहे. 15 मार्च 2026 रोजी प्रदर्शित झालेल्या या गाण्यातील अश्लील शब्दरचना आणि व्हिडीओमुळे प्रेक्षकांसह अनेक सेलिब्रिटींनी तीव्र संताप व्यक्त केला आहे. वादाचे स्वरूप इतके गंभीर झाले की, अखेर निर्मात्यांनी हे गाणे यूट्यूबवरून हटवण्याचा मोठा निर्णय घेतला आहे.

सेलिब्रिटी आणि मानवाधिकार आयोगाची आक्रमक भूमिका
गाणे प्रदर्शित होताच सोशल मीडियावर त्यावर टीकेची झोड उठली. प्रसिद्ध गायक अरमान मलिक आणि चित्रपट निर्माते ओनीर यांनी 'एक्स' (पूर्वीचे ट्विटर) वर पोस्ट करत गाण्याच्या दर्जावर प्रश्नचिन्ह उपस्थित केले. अरमान मलिकने या गाण्यातील लेखनाला अत्यंत खालच्या स्तराचे म्हटले आहे. इतकेच नाही तर, राष्ट्रीय मानवाधिकार आयोगाचे (NHRC) सदस्य प्रियंक कानूनगो यांनीही यावर कडक शब्दांत ताशेरे ओढले. "कोणतेही सुसंस्कृत कुटुंब बसून हे गाणे पाहू शकेल का?" असा सवाल त्यांनी उपस्थित केला असून आयोगाकडून निर्मात्यांना नोटीस देखील पाठवण्यात आली होती.

यूट्यूबवरून गाणे गायब आणि कायदेशीर तक्रार
वाढता विरोध लक्षात घेता, एका वकिलाने 'सेंट्रल बोर्ड ऑफ फिल्म सर्टिफिकेशन' (CBFC) मध्ये तक्रार दाखल करून या गाण्यावर बंदी घालण्याची मागणी केली. हे गाणे समाज आणि विशेषतः तरुण पिढीवर चुकीचा परिणाम करू शकते, असा दावा तक्रारीत करण्यात आला. या सर्व दबावामुळे निर्मात्यांनी कोणतेही अधिकृत स्पष्टीकरण न देता हे गाणे यूट्यूबवरून गुपचूप हटवले आहे. सध्या यूट्यूबवर हे गाणे 'खाजगी' (Private) किंवा 'उपलब्ध नाही' असे दिसत आहे.

हेही वाचा – Dhurandhar 2 : तब्बल 3 ता. 52 मि. च्या 'धुरंधर 2' ला सेन्सॉरचे प्रमाणपत्र; आधुनिक सिनेमाच्या इतिहासातील सर्वात मोठा चित्रपट?

चित्रपटाचे कथानक आणि कलाकार
'केडी – द डेविल' हा एक कन्नड ॲक्शन-ड्रामा चित्रपट असून तो 1970 च्या दशकातील बंगळुरूमध्ये घडलेल्या खऱ्या घटनांवर आधारित आहे. केव्हीएन प्रॉडक्शनच्या बॅनरखाली बनलेल्या या चित्रपटात ध्रुव सरजा मुख्य भूमिकेत आहे. याशिवाय संजय दत्त, शिल्पा शेट्टी आणि नोरा फतेही यांच्याही महत्त्वाच्या भूमिका आहेत. रकीब आलम यांनी लिहिलेल्या या गाण्यावरून झालेल्या वादामुळे चित्रपटाच्या प्रतिमेवर परिणाम होण्याची शक्यता वर्तवण्यात येत आहे.

प्रदर्शनाची तारीख आणि निर्मात्यांसमोरील आव्हान
हा चित्रपट 30 एप्रिल 2026 रोजी सिनेमागृहात प्रदर्शित होण्याची शक्यता आहे. मात्र, प्रदर्शनापूर्वीच गाण्यामुळे ओढवलेल्या या वादामुळे निर्मात्यांना मोठा फटका बसला आहे. आता चित्रपटातील इतर गाण्यांच्या आणि संवादांच्या बाबतीत सेन्सॉर बोर्ड काय भूमिका घेते, याकडे सर्वांचे लक्ष लागले आहे. अश्लीलतेला थारा न देता दर्जेदार आशय देण्याची मागणी सध्या प्रेक्षकांकडून केली जात असून, या प्रकरणाने चित्रपटसृष्टीतील गाण्यांच्या दर्जावर पुन्हा एकदा चर्चा सुरू केली आहे.

हेही वाचा – Panvel Attack News: प्रसिद्ध अभिनेत्री आणि तिच्या भावावर पनवेलमध्ये जीवघेणा हल्ला; सोशल मीडियावर सांगितला थरार