Underwater Tunnel: मुंबई-अहमदाबाद बुलेट ट्रेन प्रकल्पातील समुद्राखालील बोगदा जपानच्या ‘सेकान’ बोगद्याला देणार टक्कर; काय असेल खास? जाणून घ्या

Under Sea Tunnel: भारताच्या महत्त्वाकांक्षी मुंबई-अहमदाबाद बुलेट ट्रेन प्रकल्पात लवकरच प्रवाशांना समुद्राखालून प्रवास करण्याचा रोमांचक अनुभव मिळणार आहे. बुलेट ट्रेनसाठी मुंबईजवळ 7 किलोमीटर लांबीचा समुद्राखालील बोगदा बांधण्यात येत आहे. हा बोगदा केवळ बुलेट ट्रेनच्या वेगाशीच नव्हे, तर जगातील सर्वात लांब समुद्राखालील रेल्वे बोगदा असलेल्या जपानच्या सेकान बोगद्याच्या विक्रमाशीही स्पर्धा करणारा ठरू शकतो. जपानमध्ये सेकान बोगदा होन्शू बेटाला होक्काइडोशी जोडतो आणि त्सुगारू सामुद्रधुनी खाडीखाली जातो. या 53.85 किमी लांबीच्या बोगद्यापैकी 23.3 किलोमीटरचा भाग पाण्याखाली आहे. ही ट्रेन सुमारे 100 मीटर खोलीवर, म्हणजे 25 मजली इमारतीइतक्या खोलवर धावते. हा बोगदा केवळ दळणवळणाचे साधन नसून एक मोठे पर्यटन आकर्षण देखील आहे.

भारतात मुंबई-अहमदाबाद कॉरिडॉर अंतर्गत वांद्रे कुर्ला कॉम्प्लेक्स येथे स्टेशनपासून सुरू होणारा 21 किलोमीटरचा बोगदा तयार केला जात आहे, ज्यापैकी 7 किलोमीटरचा भाग समुद्राखाली असेल. या आधुनिक बोगद्यासाठी चीनमधून टीबीएम (टनेल बोरिंग मशीन) आयात करण्यात येत आहेत. हा बोगदा जपानमधील बोगद्यांपेक्षाही अधिक आधुनिक तंत्रज्ञान वापरून तयार होईल, असे सांगण्यात येत आहे.

हेही वाचा – Pandharpur Kartiki Ekadashi 2025: राज्यात दोन उपमुख्यमंत्री असताना विठ्ठलाची पूजा कोण करणार?मंदिर समिती संभ्रमात

जपानच्या बोगद्याचा इतिहास आणि पर्यटन

जपानमधील सेकान बोगदा बांधण्याची योजना 1954 मध्ये एका भीषण वादळात अनेक जहाजे बुडाल्यानंतर आखण्यात आली. पूल बांधण्याची योजना समुद्रातील वादळामुळे धोकादायक ठरल्याने भूमिगत बोगदा निवडला गेला. 1983 मध्ये पायलट बोगदा आणि 1985 मध्ये मुख्य बोगदा पूर्ण झाला. 1988 मध्ये या बोगद्याचे उद्घाटन करण्यात आले. या बोगद्याचा खर्च मूळ बजेटच्या 12 पट, म्हणजे सुमारे 7 अब्ज डॉलर इतका आला होता. 

हेही वाचा – Indian Stock Market Today: भारतीय शेअर बाजारासाठी निर्णायक आठवडा; TCS Q2 निकाल, FOMC मिनिट्स आणि IPO हालचाली ठरवणार बाजाराची दिशा

सेकान बोगद्यातून दररोज सुमारे पन्नास मालवाहू आणि प्रवासी गाड्या जातात. विशेष म्हणजे, या बोगद्यात टप्पेई-कैतेई आणि योइची अशी दोन स्टेशन देखील आहेत, जी पर्यटकांसाठी खुली आहेत. पर्यटक येथे उतरून पाण्याखालील दृश्याचा अनुभव घेऊ शकतात. भारताचा 7 किमीचा समुद्राखालील ट्रॅक पूर्ण झाल्यावर, भारतीय रेल्वेचे जाळे एक नवा विश्वविक्रम प्रस्थापित करण्याच्या दिशेने वाटचाल करेल, ज्यामुळे देशातील आणि आंतरराष्ट्रीय पर्यटकांना एक अनोखा प्रवासाचा अनुभव मिळेल.