Vidhan Parishad Oath Ceremony : विधानभवनात 10 नव्या शिलेदारांचा शपथविधी; नीलम गोऱ्हे सलग पाचव्यांदा शपथ घेऊन रचणार इतिहास!
Vidhan Parishad Oath Ceremony : मुंबईतील विधानभवनाचे मध्यवर्ती सभागृह गुरुवारी एका ऐतिहासिक सोहळ्याचे साक्षीदार होणार आहे. उद्या 14 मे 2026 रोजी सकाळी 11 वाजता विधान परिषदेच्या नवनिर्वाचित 10 सदस्यांचा शपथविधी सोहळा पार पडणार आहे. विधान परिषदेचे सभापती प्रा. राम शिंदे हे या सर्व नवनिर्वाचित आमदारांना पद आणि गोपनीयतेची शपथ देणार आहेत. या सोहळ्यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्यासह विधानसभा अध्यक्ष ॲड. राहुल नार्वेकर, उपाध्यक्ष अण्णा बनसोडे आणि संसदीय कार्यमंत्री चंद्रकांतदादा पाटील यांना विशेष निमंत्रित करण्यात आले आहे.
नीलम गोऱ्हे यांचा विक्रम आणि नवे सदस्य
या शपथविधी सोहळ्याचे सर्वात मोठे वैशिष्ट्य म्हणजे विद्यमान उपसभापती आणि शिवसेना शिंदे गटाच्या डॉ. नीलम गोऱ्हे या सलग पाचव्यांदा विधान परिषदेच्या सदस्यत्वाची शपथ घेऊन एक नवा विक्रम प्रस्थापित करणार आहेत. त्यांच्यासोबतच राजकारणातील इतर 9 दिग्गज नेते आपल्या संसदीय कारकीर्दीची अधिकृत सुरुवात करतील. यामध्ये बच्चू कडू (शिवसेना शिंदे गट), अंबादास दानवे (शिवसेना ठाकरे गट), डॉ. प्रज्ञा सातव (भाजप), प्रमोद जठार (भाजप), झीशान सिद्दीकी (राष्ट्रवादी), माधवी नाईक (भाजप), सुनील कर्जतकर (भाजप), विवेक कोल्हे (भाजप) आणि संजय भेंडे (भाजप) या नेत्यांचा समावेश आहे. एकूण 10 सदस्यांपैकी 9 सदस्य बिनविरोध निवडून आले आहेत, तर एका सदस्याने पोटनिवडणुकीत विजय मिळवला आहे.
हेही वाचा – Sunil Tatkare: शरद पवारांशी सिल्व्हर ओकवर ‘ती’ भेट कशासाठी? सुनील तटकरेंनी अखेर केले स्पष्ट
जय्यत तयारी आणि सोहळ्याचे आयोजन
विधानभवनाच्या मध्यवर्ती सभागृहात होणाऱ्या या सोहळ्याची सर्व तयारी पूर्ण झाली असल्याची माहिती सभापतींचे जनसंपर्क अधिकारी निलेश मदाने यांनी दिली आहे. अनेक बड्या नेत्यांच्या उपस्थितीमुळे कडक सुरक्षा व्यवस्था आणि विशेष नियोजित बैठकीची सोय करण्यात आली आहे. राज्याच्या विकासात योगदान देण्यासाठी आणि जनतेचे प्रश्न मांडण्यासाठी हे 10 नवे शिलेदार आता विधान परिषदेत दाखल होत आहेत. राजकीय दृष्टीने महत्त्वाचा असलेला हा सोहळा केवळ काही तासांवर येऊन ठेपला असून, सर्व नवनियुक्त आमदारांच्या समर्थकांनीही मुंबईत गर्दी करण्यास सुरुवात केली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.