Instagram वर आता खोटं वय दाखवता येणार नाही! Meta ने आणले AI टूल; आता किशोरवयीन मुलांची चोरी पकडली जाणार

Meta Age Assurance Technology : सोशल मीडिया दिग्गज कंपनी मेटाने Instagram आणि Facebook वर वय लपवून वावरणाऱ्या अल्पवयीन मुलांना ओळखण्यासाठी एक अत्यंत प्रगत एआय (AI) आधारित 'एज अश्योरेंस' तंत्रज्ञान सादर केले आहे. अनेकदा टीनएजर्स नियमांपासून वाचण्यासाठी आपली खोटी ओळख सांगून अकाउंट तयार करतात; मात्र, आता मार्क झुकेरबर्ग यांची कंपनी मुलांच्या शारीरिक रचनेवरून त्यांचे खरे वय शोधून काढणार आहे. जर एखाद्या युजरने चुकीचे वय दाखवले असेल, तर हे एआय टूल संबंधित अकाउंट ब्लॉक करेल किंवा त्याला सुरक्षित 'टीन अकाउंट' श्रेणीमध्ये वर्ग करेल. मुलांच्या सोशल मीडिया वापरावरील सुरक्षितता वाढवण्यासाठी उचललेले हे एक मोठे पाऊल मानले जात आहे.

कसे ओळखले जाणार युजरचे खरे वय?
मेटाचे हे नवीन तंत्रज्ञान केवळ नावापुरते मर्यादित नसून ते युजरच्या फोटोंचे सखोल विश्लेषण करते. या टूलच्या कार्यपद्धतीची काही प्रमुख वैशिष्ट्ये खालीलप्रमाणे आहेत:
शारीरिक विश्लेषण: हे टूल युजरच्या उंची आणि हाडांच्या रचनेचा (Bone Structure) अभ्यास करून वयाचा अंदाज लावते.
नो फेशियल रेकग्निशन: विशेष म्हणजे, ही तंत्रज्ञान व्यक्तीची ओळख पटवण्यासाठी 'फेशियल ऑथेंटिकेशन' वापरत नाही, त्यामुळे प्रायव्हसी जपली जाते.
कमेंट अनालिसिस: युजरने पोस्टवर केलेल्या कमेंट्सचे देखील विश्लेषण करून त्याच्या वयाचा अंदाज घेतला जातो.
व्हिज्युअल डेटा: युजरने अपलोड केलेले फोटो आणि व्हिडिओ या टूलसाठी माहितीचा मुख्य स्रोत असतात.

हेही वाचा – Major Cyber Scam: ChatGPT अन् Gemini वापरणाऱ्यांनो सावधान; सब्सक्रिप्शनच्या नावाखाली बँक खातं होतंय रिकामं; 'गिफ्ट कार्ड'चा असा रचला जातोय सापळा

टीन अकाउंट्समध्ये स्वयंचलित रूपांतर
मेटाच्या नियमांनुसार, 13 वर्षांखालील मुलांना या प्लॅटफॉर्मवर बंदी आहे, तर 13 ते 17 वयोगटातील युजर्सना 'टीन अकाउंट'च्या श्रेणीत ठेवले जाते. अनेक टीनएजर्स निर्बंध टाळण्यासाठी स्वतःला प्रौढ म्हणून दाखवतात. मात्र, या नवीन तंत्रज्ञानामुळे जर एखादा युजर टीनएजर असल्याचे आढळले, तर त्याचे नार्मल अकाउंट आपोआप टीन अकाउंटमध्ये बदलले जाईल. यामुळे त्यांच्यावर मेटाचे 'टीन प्रोटेक्शन' नियम लागू होतील आणि त्यांना सुरक्षित ऑनलाइन वातावरण मिळेल. या प्रणालीवर कंपनी गेल्या अनेक वर्षांपासून काम करत होती.

जागतिक स्तरावर अंमलबजावणी
मेटाने हे 'एज अश्योरेंस' तंत्रज्ञान सध्या ऑस्ट्रेलिया, यूके आणि अमेरिकेतील युजर्ससाठी लागू केले आहे. लवकरच याचा विस्तार ब्राझील आणि युरोपियन युनियनमधील 27 देशांमध्ये केला जाणार आहे. युरोप आणि यूकेमधील युजर्सना जून महिन्यापासून हे फिचर वापरता येईल. भारतात हे फिचर कधी येईल याबाबत अद्याप अधिकृत माहिती नसली तरी, जागतिक स्तरावर मुलांच्या सुरक्षिततेसाठी मेटाने केलेली ही कडक अंमलबजावणी महत्त्वाची ठरत आहे.

हेही वाचा – Parent Control Tool: मेटाचा पालकांना मोठा दिलासा! मुलं AI सोबत नेमकं काय चॅटिंग करतात? एका क्लिकवर मिळणार सर्व माहिती