राज्यावर अवकाळी पावसाचं संकट! पुढील 5 दिवसांत अनेक जिल्ह्यांत पावसाची शक्यता; IMD कडून यलो अलर्ट जारी
मुंबई: गेल्या काही दिवसांपासून राज्यात तापमानाचा पारा वाढलेला आहे. मात्र, आता नागरिकांना वाढत्या उष्णतेपासून दिलासा मिळणार आहे. भारतीय हवामानशास्त्र विभागाने (IMD) पुढील पाच दिवसांत राज्याच्या अनेक भागात अवकाळी पावसाचा इशारा जारी केला आहे. हिमाचल प्रदेश, उत्तराखंड आणि दिल्लीसह उत्तर भारतावर सध्या परिणाम करणाऱ्या पश्चिमी विक्षोभाच्या प्रभावामुळे, दक्षिण आणि पश्चिम भारतातील काही भागात पावसाची शक्यता आहे. परिणामी, कोकण, मध्य महाराष्ट्र आणि मराठवाड्यातील जिल्ह्यांसाठी 3 मे ते 7 मे दरम्यान यलो अलर्ट जारी करण्यात आला आहे.
महाराष्ट्रात कुठे पाऊस पडेल?
राज्यात 3 मे रोजी नागपूर, अमरावती, यवतमाळ, वर्धा, चंद्रपूर, भंडारा, गोंदिया, गडचिरोली, नाशिक, पुणे, अहमदनगर, धुळे, नंदुरबार, लातूर, नांदेडमध्ये अवकाळी पाऊस पडण्याची शक्यता हवामान विभागाने वर्तवली आहे. याशिवाय, 4 मे रोजी नाशिक, अहमदनगर, छत्रपती संभाजीनगर (औरंगाबाद), जळगाव, धुळे, अमरावती, यवतमाळ, वर्धा, नागपूर, चंद्रपूर, भंडारा, गोंदिया, गडचिरोली, मुंबई, ठाणे, रायगड, पुणे, सातारा, बीड, जालना, परभणी, हिंगोली आणि नांदेडमध्येही तुरळक पाऊस अपेक्षित आहे.
हेही वाचा – दोन महिन्यात विदर्भात 56 उष्णाघाताचे रूग्ण; नगरपरिषद क्षेत्रात 'हीट अॅक्शन प्लॅन लागू'
याशिवाय, 5 मे ला कोकण, मध्य महाराष्ट्र, मराठवाडा आणि विदर्भासह संपूर्ण महाराष्ट्रात अवकाळी पावसाची शक्यता आहे. बहुतेक जिल्ह्यांना वादळ आणि हलक्या ते मध्यम पावसाचा इशारा देण्यात आला आहे. तथापि, 6 मे ला सातारा, पुणे, ठाणे, पालघर, नाशिक, अहमदनगर, बीड, जालना, छत्रपती संभाजीनगर, जळगाव, धुळे, नंदुरबार, यवतमाळ, चंद्रपूर, कोकण, मध्य महाराष्ट्र आणि मराठवाड्यातील उर्वरित भागात हलका पाऊस पडण्याची शक्यता आहे. तसेच 7 मे 2025 रोजी कोकण, मध्य आणि उत्तर महाराष्ट्र आणि मराठवाड्यातील बहुतेक भागात अवकाळी पाऊस पडण्याची शक्यता आहे.
हेही वाचा – रत्नागिरी जिल्ह्यात पाणी टंचाईचं संकट; 5 तालुक्यांतील 14 हजाराहून अधिक ग्रामस्थांना फटका
महाराष्ट्र उष्णतेची लाट –
दरम्यान, हवामान विभागाने पावसाच्या अंदाज वर्तवला असूनही राज्यात उष्णतेची परिस्थिती तीव्र आहे. विदर्भातील अनेक शहरांमध्ये तापमान 40 अंश सेल्सिअसपेक्षा जास्त नोंदवले गेले आहे. विशेषतः सोलापूरमध्ये, गेल्या चार दिवसांपासून पारा 45°C च्या आसपास आहे. दुपारच्या वेळी रस्त्यावर निर्मनुष्यता आणि कडक उन्हामुळे जनतेला त्रास सहन करावा लागत आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.