किशोर पगारे, कल्याण
कल्याण पश्चिमेत तेली समाजाच्या कार्यालयाच्या ताब्यावरून दोन गटांमध्ये जोरदार वाद झाल्याची घटना समोर आली आहे. कार्यालयाचा ताबा आणि कार्यालयावरील नामफलक हटवण्याच्या मुद्द्यावरून सुरू झालेला वाद काही वेळातच वाढला आणि त्याचे रूपांतर थेट धक्काबुक्की व तुंबळ हाणामारीत झाले. या घटनेमुळे परिसरात काही काळ तणावाचे वातावरण निर्माण झाले.
मिळालेल्या माहितीनुसार, संबंधित कार्यालयाची खरेदी २००५ मध्ये करण्यात आली होती. या कार्यालयाच्या ताब्यावरून दोन्ही गटांमध्ये काही काळापासून वाद असल्याचे सांगितले जात आहे. याच वादातून दोन्ही बाजूंचे पदाधिकारी आणि कार्यकर्ते आमनेसामने आले. कार्यालयावरील नामफलक हटवण्याच्या मुद्द्यावरून वाद आणखी चिघळला.
वाद सुरू असतानाच दोन्ही गटांमध्ये जोरदार शाब्दिक बाचाबाची झाली. त्यानंतर परिस्थिती हाताबाहेर गेली आणि धक्काबुक्कीला सुरुवात झाली. काही वेळातच दोन्ही बाजूंमध्ये तुंबळ हाणामारी झाली. या मारामारीमध्ये ठाणे जिल्हा साहू तेली समाजाचे पदाधिकारी मुरारीलाल गुप्ता हे गंभीर जखमी झाल्याची माहिती आहे. त्यांच्यासह आणखी दोन जण किरकोळ जखमी झाल्याचे सांगण्यात येत आहे.
घटनेची माहिती मिळताच पोलिसांनी तातडीने घटनास्थळी हस्तक्षेप केला. पोलिसांच्या हस्तक्षेपानंतर परिस्थिती नियंत्रणात आली. या घटनेनंतर पोलिसांकडून दोन्ही गटांकडील व्यक्तींचे जबाब नोंदवण्याचे काम सुरू करण्यात आले आहे.
कार्यालयाचा नेमका ताबा कोणाकडे आहे, नामफलक हटवण्यामागील कारण काय आणि हाणामारीला नेमकी सुरुवात कशी झाली, याबाबत पोलिसांकडून तपास केला जात आहे. दोन्ही पक्षांचे म्हणणे ऐकून घेतल्यानंतर उपलब्ध पुरावे आणि जबाबांच्या आधारे पुढील कायदेशीर कारवाई केली जाणार असल्याची माहिती आहे.
दरम्यान, समाजाच्या कार्यालयाच्या ताब्यावरून झालेल्या या वादामुळे कल्याण परिसरात चर्चेला उधाण आले आहे. या प्रकरणात पुढे कोणावर कारवाई होते, याकडे आता लक्ष लागले आहे.
