Baramati Bypoll: बारामती पोटनिवडणुकीत मोठा ‘ट्विस्ट’! सुनेत्रा पवारांच्या बिनविरोध निवडीच्या प्रयत्नांना सुरुंग; ओबीसींचा मोठा नेता उतरणार रिंगणात
Laxman Hake to contest Baramati assembly bypoll : उपमुख्यमंत्री दिवंगत अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीत आता एक अनपेक्षित वळण आले आहे. ही निवडणूक बिनविरोध पार पडावी यासाठी महायुतीच्या उमेदवार सुनेत्रा पवार यांनी सर्वपक्षीय नेत्यांशी चर्चा सुरू केली असतानाच, ओबीसी आंदोलनाचा आक्रमक चेहरा लक्ष्मण हाके यांनी शड्डू ठोकला आहे. हाके यांनी या निवडणुकीच्या रिंगणात उतरण्याची अधिकृत घोषणा केल्याने बारामतीचा राजकीय संघर्ष आता चौरंगी किंवा बहुधर्मीय होण्याची शक्यता निर्माण झाली आहे.
सुनेत्रा पवारांच्या 'बिनविरोध' रणनीतीला मोठा धक्का
अजित पवारांच्या निधनानंतर ही जागा रिक्त झाली असून, कौटुंबिक आणि राजकीय परंपरा जपण्यासाठी ही निवडणूक बिनविरोध व्हावी, असा प्रयत्न सुनेत्रा पवार करत होत्या. यासाठी त्यांनी उद्धव ठाकरे, हर्षवर्धन सपकाळ आणि महादेव जानकर अशा बड्या नेत्यांशी दूरध्वनीवरून संवाद साधला होता. विशेष म्हणजे, राष्ट्रवादी काँग्रेस शरद पवार गटाने या निवडणुकीत आपला उमेदवार न देण्याचा निर्णय घेतल्याने सुनेत्रा पवारांचा मार्ग सुकर वाटत होता. मात्र, लक्ष्मण हाके यांच्या एन्ट्रीमुळे ही निवडणूक आता बिनविरोध होणार नसल्याचे स्पष्ट झाले आहे.
हेही वाचा – Ashok Chavan: 'बारामतीची निवडणूक बिनविरोध झाल्यास समाजात…'; खासदार अशोक चव्हाण यांचे महत्त्वपूर्ण विधान
"मी कोणत्याही पक्षाचा नाही"; हाकेंचे थेट आव्हान
आपल्या उमेदवारीची घोषणा करताना लक्ष्मण हाके यांनी अत्यंत आक्रमक भूमिका मांडली आहे. "मी सध्या कोणत्याही राजकीय पक्षाचा सदस्य नाही आणि कोणत्याही पक्षाच्या चिन्हावर ही निवडणूक लढवणार नाही," असे त्यांनी स्पष्ट केले. प्रस्थापित राजकारण्यांच्या विरोधात बहुजन आणि ओबीसी समाजाचा आवाज बुलंद करण्यासाठी आपण अपक्ष म्हणून मैदानात उतरत असल्याचे त्यांनी सांगितले. लक्ष्मण हाके उद्या, 6 एप्रिल रोजी बारामतीत आपला उमेदवारी अर्ज दाखल करणार आहेत, ज्यामुळे पवारांच्या या बालेकिल्ल्यात नवीन राजकीय समीकरणे आकाराला येत आहेत.
ओबीसी फॅक्टर आणि बारामतीचे बदलणारे गणित
बारामती विधानसभा मतदारसंघात ओबीसी मतदारांची संख्या अत्यंत लक्षणीय आहे. गेल्या काही महिन्यांपासून लक्ष्मण हाके यांनी आरक्षणाच्या मुद्द्यावरून राज्यभर रान उठवले आहे, त्यामुळे त्यांच्या उमेदवारीचा थेट फटका प्रस्थापित उमेदवारांना बसू शकतो. दुसरीकडे, या निवडणुकीत काँग्रेस आपला उमेदवार उतरवणार का, याकडेही सर्वांचे लक्ष लागले आहे. राष्ट्रवादी अजित पवार गटाने आधीच आपली तयारी सुरू केली असली, तरी हाके यांच्या उमेदवारीमुळे मतविभाजनाचा धोका वाढला असून बारामतीची ही पोटनिवडणूक आता प्रतिष्ठेची आणि चुरशीची ठरणार आहे.
पोटनिवडणूक बिनविरोध होण्याची शक्यता धूसर
दरम्यान, महायुतीच्या नेत्यांनी ही जागा बिनविरोध करण्याची विनंती केली होती. या विनंतीला मान देत शरद पवार गटाचे प्रदेशाध्यक्ष शशिकांत शिंदे यांनी यापूर्वीच बारामतीमध्ये उमेदवार देणार नसल्याची घोषणा केली. मात्र, महाविकास आघाडीतील काँग्रेसने वेगळी भूमिका घेताना जर ही जागा राष्ट्रवादीच्या वाट्याची असूनही शरद पवार गट उमेदवार देणार नसेल, तर काँग्रेस तिथे आपला उमेदवार रिंगणात उतरवेल, असे म्हटले. काँग्रेसच्या या भूमिकेमुळे महाविकास आघाडीत पेच निर्माण झाला आहे. आता ओबीसी नेते लक्ष्मण हाके यांनी कोणत्याही पक्षाकडे न जाता स्वतः निवडणूक लढवण्याचा मानस व्यक्त केला आहे. यामुळे ही पोटनिवडणूक बिनविरोध होण्याची शक्यता धूसर झाली आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.