Lucknow Airport: फ्लाइटची वाट पाहणाऱ्या प्रवाशाचा लखनऊ विमानतळावर मृत्यू; कुटुंबाचा विमानतळ प्रशासनावर गंभीर आरोप
Lucknow Airport: देशभरात उड्डाणे रद्द होणे आणि विलंब यामुळे निर्माण झालेल्या गोंधळाच्या पार्श्वभूमीवर लखनऊमध्ये एक धक्कादायक घटना उघडकीस आली आहे. विमानतळावर कनेक्टिंग फ्लाइटची वाट पाहताना एका प्रवाशाचा आरोग्य आपत्कालीन परिस्थितीत मृत्यू झाला. या घटनेमुळे विमान कंपन्यांच्या सेवांवर आणि आपत्कालीन व्यवस्थेवर गंभीर प्रश्नचिन्ह उपस्थित झाले आहेत.
विमानाची वाट पाहताना प्रकृती बिघडली
कानपूरमधील एका खाजगी पेय कंपनीत वित्त कार्यकारी म्हणून काम करणारे अनूप पांडे हे नातेवाईकाच्या अंत्यसंस्काराहून बंगळुरूला परतत होते. लखनऊहून दिल्लीला जाणाऱ्या कनेक्टिंग फ्लाइटची वाट पाहत असताना अचानक त्यांची तब्येत बिघडली. त्यानंतर त्यांना तत्काळ लोकबंधू रुग्णालयात नेण्यात आले, मात्र डॉक्टरांनी त्यांना मृत घोषित केले.
‘त्वरित मदत मिळाली असती तर जीव वाचला असता’; कुटुंबाचा आरोप
मृत अनूप पांडे यांचे भाऊ अनिल पांडे यांनी सांगितले की, गेल्या काही दिवसांत वारंवार फ्लाइट रद्द झाल्यामुळे अनूप प्रचंड तणावात होते. घरी पत्नी आणि मुले एकटे असल्याची चिंता, तसेच रजा संपल्यामुळे तातडीने बंगळुरूला पोहोचण्याचा दबाव त्यांच्या मनावर होता. कुटुंबाचा आरोप आहे की, जर विमानतळावर त्वरित वैद्यकीय मदत मिळाली असती, तर त्यांचा जीव वाचू शकला असता. तथापी, शवविच्छेदनानंतर पोलिसांनी मृतदेह कुटुंबाकडे सुपूर्द केला आहे.
हेही वाचा – Viral Video: टेकऑफच्या आधीच इंडिगो विमानात कबुतराच्या घिरट्या, व्हिडीओ व्हायरल
दरम्यान, ही घटना अशा वेळी घडली आहे जेव्हा देशातील सर्वात मोठ्या विमान कंपनी इंडिगोवर उड्डाण रद्दीकरणामुळे मोठ्या प्रमाणात टीका होत आहे. 2 डिसेंबरपासून शेकडो उड्डाणे रद्द झाली असून लाखो प्रवासी अडकून पडले आहेत. शुक्रवारी तर एकाच दिवशी 1600 उड्डाणे रद्द झाली. भारतीय विमानवाहतूक इतिहासातील ही सर्वात मोठी संख्या मानली जाते. अखेर वाढत्या नाराजीमुळे इंडिगोचे सीईओ पीटर एल्बर्स यांनी व्हिडिओ संदेशाद्वारे माफी मागितली. ही घटना सध्याच्या विमानवाहतूक व्यवस्थेतील त्रुटी आणि प्रवाशांच्या सुरक्षेबाबतची गंभीर कमतरता स्पष्ट करणारी आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.