सूर बदलला! 6 वर्षांपूर्वीचे आंदोलन ते कॉकरोच जनता पार्टीच्या आंदोलनापासून दूर राहण्याचे मुस्लिम तरुणांना आवाहन

Muslim Youth Advised to Stay Away from Delhi Protest : नुकत्याच झालेल्या ‘नीट-युजी’ (NEET-UG) परीक्षेतील प्रश्नपत्रिका फुटीचे गंभीर प्रकरण आणि सीबीएसई इयत्ता 12 वीच्या ‘ऑन-स्क्रीन मार्किंग’ पद्धतीतील प्रचंड गोंधळामुळे केंद्रीय शिक्षण मंत्री धर्मेंद्र प्रधान सध्या देशभरातील विद्यार्थ्यांच्या आणि विरोधकांच्या तीव्र निशाण्यावर आहेत. याच पार्श्वभूमीवर, सोशल मीडियाच्या माध्यमातून एकत्र आलेल्या ‘कॉक्रोच जनता पार्टी’ (CJP) या युवा दबाव गटाने दिल्लीतील जंतरमंतर येथे शनिवारी जोरदार निदर्शने केली. दरम्यान, मुस्लीम समुदाय आणि मशिदींमधून मुस्लीम तरुण-तरुणींना या निदर्शनांमध्ये सहभागी न होण्याचे आवाहन केले जात आहे. जवळपास 6 वर्षांपूर्वी दक्षिण-पूर्वी दिल्लीतील एका रस्त्यावर ठाण मांडून बसलेल्या मुस्लिम महिलांनी शाहीन बागला आंदोलनाचा एक जागतिक चेहरा बनवले होते. मात्र, आज तिथली परिस्थिती पूर्णपणे बदललेली पाहायला मिळत आहे. 

या नव्या आंदोलनाच्या पार्श्वभूमीवर, मुस्लिम समुदायामध्ये व्हॉट्सॲप ग्रुप्स, मशिदींचे ग्रुप्स, इंस्टाग्राम रील्स आणि 'X' पोस्टच्या माध्यमातून एक अत्यंत वेगळा संदेश वेगाने पसरवला जात आहे. केंद्रीय स्तरावर चर्चेत असलेल्या 'कॉकरोच जनता पार्टी'च्या आंदोलनापासून मुस्लिम तरुणांनी पूर्णपणे लांब राहावे, अशी स्पष्ट गळ या संदेशांमधून घातली जात आहे. सोशल मीडियावरील या पोस्ट्समध्ये तरुणांना सावध करताना लिहिले आहे की, विरोध-प्रदर्शन भलेही काही तासांचे असेल, पण त्याचे दुष्परिणाम मात्र तरुणांना पुढील अनेक वर्षे भोगावे लागू शकतात. नेहमीप्रमाणे जर तिथे कोणतीही हिंसा किंवा अशांतता पसरली, तर सर्वात आधी मुस्लिम तरुणांनाच बळीचा बकरा बनवले जाईल आणि त्यानंतर अटक, दीर्घकाळ तुरुंगवास, मीडिया ट्रायल आणि देशद्रोहाचे आरोप यांसारख्या गंभीर संकटांना सामोरे जावे लागेल, अशी भीती व्यक्त करत तरुणांना आंदोलनाच्या परिसरातही न फिरकण्याचा सल्ला दिला जात आहे.

'पिक्चर अजून बाकी आहे;' म्हणत सरकारला इशारा
मूळचे महाराष्ट्रातील मराठवाड्याचे (छत्रपती संभाजीनगर) असलेले CJP चे संस्थापक अभिजीत दिपके यांनी या यशस्वी आंदोलनानंतर शिक्षणमंत्र्यांच्या हकालपट्टीची मागणी पुन्हा एकदा लावून धरली असून, केंद्र सरकारला 7 दिवसांचा थेट अल्टिमेटम (Abhijit Dipke Gives 7 days Ultimatum) दिला आहे. आंदोलनाचे नेतृत्व करण्यासाठी खास भारतात परतलेल्या अभिजीत दिपके यांनी रविवारी X वर पोस्ट करत जंतरमंतर येथील ऐतिहासिक आंदोलनात सहभागी झालेल्या सर्व कार्यकर्त्यांचे आणि विद्यार्थ्यांचे जाहीर आभार मानले. 'काल हजारो तरुणांनी दिल्लीत एकत्र येत एक नवा इतिहास रचला आहे, जेव्हा देशातील तरुण एकत्र येतो तेव्हा तो काय करू शकतो, याची फक्त एक झलक आम्ही सरकारला दाखवून दिली असून हा तर फक्त ट्रेलर होता, चित्रपट अजून बाकी आहे,' अशा शब्दांत दिपके यांनी प्रशासनाला सुनावले. या आंदोलनात सहभागी झालेल्या अनेक शाळकरी मुलांनी आणि तरुणांनी त्यांच्या आयुष्यात पहिल्यांदाच रस्त्यावर उतरून एखाद्या आंदोलनात भाग घेतला होता, ज्यातून शिक्षण व्यवस्थेविरुद्ध असलेला त्यांचा तीव्र संताप उघडपणे बाहेर पडला.

हेही वाचा – PM Narendra Modi EAC Meeting: सोने खरेदीविषयानंतर पीएम मोदींचे देशवासियांना पुन्हा आवाहन; जागतिक मंदीच्या सावटात भारताचा विकास दर कायम ठेवणार

7 दिवसांत निर्णय घ्या, अन्यथा देशभर तीव्र संघर्ष
कडक उन्हाची अजिबात पर्वा न करता आंदोलनात हिरीरीने उतरलेल्या विद्यार्थ्यांचे कौतुक करताना दिपके यांनी सरकारला थेट इशारा दिला की, धर्मेंद्र प्रधान यांनी देशातील संपूर्ण तरुण पिढीचे कधीही भरून न निघणारे शैक्षणिक नुकसान केले आहे. त्यामुळे त्यांनी येत्या 7 दिवसांत स्वतःहून आपल्या पदाचा तातडीने राजीनामा द्यावा किंवा सरकारने त्यांची मंत्रिमंडळातून हकालपट्टी करावी. जर दिलेल्या या मुदतीत योग्य निर्णय झाला नाही, तर CJP ला पुन्हा एकदा रस्त्यावर उतरून संपूर्ण देशभरात तीव्र आंदोलन छेडावे लागेल, असे त्यांनी स्पष्ट केले. 'जर आपण आपला आवाज आत्ता उठवला नाही, तर या सडलेल्या शिक्षण व्यवस्थेत कधीच बदल घडू शकत नाही,' असेही ते पुढे म्हणाले.

लोकशाही अधिकारांवरून सोशल मीडियावर मतमतांतरे
असे असले तरी, मुस्लिम समुदायातील सर्वच लोक या सावधगिरीच्या भूमिकेशी पूर्णपणे सहमत आहेत असे नाही. या बदलत्या भूमिकेवरून सध्या समाजमाध्यमांवर जोरदार चर्चा रंगली असून, या वादाच्या दरम्यान एका सोशल मीडिया युझरने टिप्पणी करताना लिहिले की, "देशात शांततापूर्ण मार्गाने विरोध-प्रदर्शन करणे हा प्रत्येक भारतीय नागरिकाचा एक मूलभूत लोकशाही अधिकार आहे. त्यामुळे उद्भवणाऱ्या परिस्थितीला किंवा भीतीला घाबरून कोणत्याही नागरिकाने आपल्या हक्कांपासून आणि लोकशाही कर्तव्यापासून पूर्णपणे मागे हटणे योग्य नाही." या वेगवेगळ्या मतप्रवाहांमुळे शाहीन बाग आणि आसपासच्या परिसरातील मुस्लिम तरुणांमध्ये सध्या आगामी आंदोलनात सहभागी होण्याबाबत संभ्रमाचे आणि संवादाचे वातावरण निर्माण झाले आहे.

दर आठवड्याला होणार आंदोलन; CJP आखणार नवी रणनीती
दिल्लीतील आपले पहिले मोठे मैदानी आंदोलन यशस्वी केल्यानंतर अभिजीत दिपके आता या देशव्यापी आंदोलनाची व्याप्ती आणखी वाढवण्याच्या तयारीत आहेत. जोपर्यंत केंद्रीय शिक्षण मंत्र्यांचा अधिकृत राजीनामा येत नाही, तोपर्यंत दर आठवड्याला देशाच्या विविध भागांत अशीच आक्रमक आंदोलने करण्याची CJP ची मुख्य योजना आहे. या आंदोलनाची पुढील दिशा, निश्चित आराखडा आणि देशव्यापी रणनीती ठरवण्यासाठी संघटनेच्या प्रमुख पदाधिकाऱ्यांची एक महत्त्वाची बैठक आयोजित करण्यात आली आहे. या बैठकीनंतर रविवारी रात्रीपर्यंत दिपके पुढील आंदोलनाचा नवा कार्यक्रम जाहीर करण्याची शक्यता वर्तवली जात आहे.

हेही वाचा – Devendra Fadanvis On CJP : "एक गोष्ट लक्षात आली की…" CJP च्या जंतरमंतरवरील आंदोलनावर फडणवीसांची पहिली प्रतिक्रिया