मुंबईतील गणेशभक्तांसह वरुणराजाही सकाळपासून बाप्पाच्या आगमनासाठी सज्ज झाला आहे. सार्वजनिक गणेशोत्सवांमध्ये ‘मुंबईचा राजा’ म्हणून ओळख असलेल्या गणेश गल्लीच्या राजाच्या दर्शनाची भाविकांना विशेष उत्सुकता असते. यंदाच्या राजाची मूर्ती आणि सजावट कोणत्या संकल्पनेवर आधारित असेल, याकडे गणेशभक्तांचे लक्ष लागले होते. लालबाग परिसरातील गणेश गल्लीतील गणरायाचा प्रथम दर्शन सोहळा पार पडला असून, यावेळी भाविकांना बाप्पाची पहिली झलक पाहायला मिळाली. गणेश गल्लीचा राजा सार्वजनिक गणेशोत्सव मंडळाकडून यंदाच्या बाप्पाचे मनमोहक रूप भाविकांसमोर प्रदर्शित झाले आहे.
यंदाची सजावट आणि बाप्पाचे रूप अत्यंत विलोभनीय व आकर्षक आहे. खाली हाताभोवती असलेले टाळ हे विठ्ठलाच्या वारीचे प्रतीक मानले जात असून, बाप्पाच्या एका हातात मोरपंखही पाहायला मिळत आहे.विशेष म्हणजे, बाप्पाची सुबक मूर्ती एका अष्टराच्या फुलावर विराजमान असून, एका पायावर तोल सांभाळताना दिसत आहे. बाप्पाच्या हातांमध्ये शंख तसेच चांदीचा कडाही पाहायला मिळत आहे. या आकर्षक आणि वैशिष्ट्यपूर्ण रूपामुळे भाविकांचे लक्ष वेधून घेतले आहे.
प्रथम दर्शन सोहळ्यानंतर बाप्पाची मनोभावे पूजा आणि आरती करण्यात आली. मुंबईच्या राजाचे यंदाचे मनमोहक रूप पाहण्यासाठी भाविकांनी मोठी गर्दी केली असून, परिसरात भक्तिमय आणि उत्साहाचे वातावरण पाहायला मिळत आहे.
