अमेरिकन नागरिकाचा कारनामा! चाकू दाखवत चक्क विमान अपहरणाचा प्रयत्न; विमान हवेत असताना थरार! मग..

वॉशिंग्टन : बेलीझमध्ये ट्रॉपिक एअरच्या विमानाचे 49 वर्षीय अमेरिकन नागरिकाने अपहरण केले. हल्लेखोराची अकिनिएला सावा टेलर अशी ओळख अधिकाऱ्यांनी पटवली आहे. तो कॅलिफोर्नियाचा नागरिक आहे. अकिनिएला याने विमान हवेत असताना चाकू काढला आणि देशांतर्गत उड्डाणाने त्याला देशाबाहेर नेण्याची मागणी केली.

बेलीझमध्ये गुरुवारी एका अमेरिकन नागरिकाने चाकूच्या धाकावर ट्रॉपिक एअरच्या एका लहान विमानाचे अपहरण केले आणि त्यानंतर एका प्रवाशाने त्याला गोळ्या घालून ठार मारले, असे वृत्त पोलिसांच्या हवाल्याने समोर आले आहे. दरम्यान, गोळी झाडणारा प्रवासीही गंभीर जखमी आहे.

हेही वाचा – भन्नाट बिझिनेस.. कवट्या, बरगड्या हव्यात का? फेसबुकवर मानवी हाडे विकत होती! अमेरिकन महिलेला अटक

ट्रॉपिक एअरचं छोटं विमान 14 प्रवासी आणि दोन क्रू मेंबर्सना घेऊन जात होतं. अमेरिकन नागरिक अकिनिएला सावा टेलर या हल्लेखोराने विमान हवेत असताना चाकू काढला आणि देशांतर्गत उड्डाणाने त्याला देशाबाहेर नेण्याची मागणी केली. बेलीझच्या मेक्सिकोच्या सीमेजवळील कोरोझल या छोट्याशा शहरातून ते उड्डाण करत होते आणि सॅन पेड्रो या लोकप्रिय पर्यटन स्थळाकडे जात असताना त्याचे अपहरण करण्यात आले.

पोलिस आयुक्त चेस्टर विल्यम्स यांच्या म्हणण्यानुसार, टेलरने विमानातील तीन जणांवर चाकूने वार केले, ज्यात पायलट आणि टेलरवर परवानाधारक बंदुकीने गोळी झाडणारा प्रवाशाचा समावेश होता. हे नाट्य आकाशात सुरू असताना विमान सुरक्षितपणे उतरण्यापूर्वी जवळजवळ दोन तास इकडे-तिकडे फिरत राहिले. अधिकाऱ्यांनी दिलेल्या माहितीनुसार, जखमी झालेल्या दोन्ही प्रवाशांवर आणि पायलटवर रुग्णालयात उपचार सुरू आहेत.

विल्यम्स म्हणाले की, टेलरवर गोळीबार करण्यात यशस्वी झालेल्या प्रवाशाच्या पाठीत चाकूने वार करण्यात आला होता आणि तो चाकू त्याच्या फुफ्फुसांत घुसला होता. म्हणजेच फुफ्फुसांत पंक्चर झाले होते. त्याची प्रकृती गंभीर आहे. विल्यम्स यांनी पत्रकारांना सांगितले की, 'आम्ही त्याच्यासाठी प्रार्थना करत आहोत. तो आमचा हिरो आहे.'

अधिकाऱ्याने पुढे म्हटले की, हल्लेखोर टेलर चाकू घेऊन विमानात कसा चढला, हे अद्याप स्पष्ट नाही. तसेच, देशातील लहान हवाई पट्ट्यांवर प्रवाशांची पूर्णपणे तपासणी करण्यासाठी सुरक्षा व्यवस्था नव्हती, असेही त्यांनी मान्य केले.

हेही वाचा – कोण हा निकिता कॅसप? आई-वडिलांची हत्या करून डोनाल्ड ट्रम्पना मारण्याचा कट; 17 वर्षीय तरुणाला अटक

अमेरिकेच्या परराष्ट्र विभागाच्या प्रवक्त्या टॅमी ब्रूस म्हणाल्या की, अधिकारी अजूनही काय घडले याबद्दल माहिती गोळा करत आहेत, असे वृत्त एका वृत्तसंस्थेने दिले आहे. "विमानात डझनभराहून अधिक लोक असल्याने मोठ्या प्रमाणात अपघात झाला नाही याबद्दल आम्ही सर्वजण आभारी आहोत. आम्हाला काही तपशील स्पष्टपणे माहीत झाले आहेत. आम्हाला जास्त माहिती नाही," असे त्या म्हणाल्या.

अकिनिएला सावा टेलर कोण होता?
विमानतळाने जाहीर केलेल्या माहितीनुसार, टेलर अमेरिकेत शिक्षक होता. तो पूर्वी मिसूरीच्या फ्लोरिसंट येथील मॅकक्लुअर नॉर्थ हायस्कूलमध्ये फुटबॉल प्रशिक्षक म्हणून ऑनलाइन सूचीबद्ध होता. पण, शाळेतील एका कर्मचाऱ्याने एका वृत्तसंस्थेला सांगितले की, टेलर सध्या तेथे काम करत नाही.

हेही वाचा – आई की राक्षस? 9 वर्षांच्या मुलाला 2 वर्ष घरात एकट्याला ठेवलं अन् प्रियकराकडे राहायला गेली..!