Sangli Wall Collapse: सांगलीत भाविकांवर काळाचा घाला! जतमध्ये मंदिराची भिंत कोसळून 6 जणांचा दुर्दैवी मृत्यू; 15 हून अधिक जखमी
Sangli Wall Collapse: सांगली जिल्ह्यातील जत तालुक्यातून एक अतिशय हृदयद्रावक घटना समोर आली आहे. मोठेवाडी गावच्या हद्दीतील प्रसिद्ध मरगुबाई मंदिराच्या परिसरात भिंत कोसळून झालेल्या भीषण अपघातात 6 भाविकांना आपला प्राण गमवावा लागला आहे. निसर्गाच्या कोपामुळे दर्शनासाठी आलेल्या भाविकांवर ही मोठी दुर्घटना ओढवली असून संपूर्ण परिसरात शोककळा पसरली आहे.
वादळी वारा आणि पावसाने घातला धुमाकूळ
मिळालेल्या माहितीनुसार, जत परिसरात अचानक वादळी वाऱ्यासह मुसळधार पावसाला सुरुवात झाली. मरगुबाई मंदिराच्या परिसरात दर्शनासाठी भाविकांची मोठी गर्दी होती. पावसापासून बचाव करण्यासाठी काही भाविक एका भिंतीचा आडोसा घेऊन उभे होते. मात्र, वादळी वाऱ्याच्या प्रचंड वेगामुळे आणि पावसामुळे ही जुनी भिंत अचानक खचली आणि भाविकांच्या अंगावर कोसळली.
ढिगाऱ्याखाली दबले 15 हून अधिक भाविक
भिंत कोसळताच परिसरात एकच किंकाळ्या आणि गोंधळ उडाला. लाल चिरा आणि विटांच्या ढिगाऱ्याखाली अनेक भाविक गाडले गेले. या दुर्घटनेत 6 जणांचा जागीच मृत्यू झाला, तर 15 हून अधिक जण गंभीर जखमी झाले आहेत. जखमींना तातडीने जत येथील शासकीय रुग्णालयात दाखल करण्यात आले असून, काहींची प्रकृती चिंताजनक असल्याचे समजते.
मदतकार्य युद्धपातळीवर
घटनेची माहिती मिळताच स्थानिक नागरिक, पोलीस आणि प्रशासकीय यंत्रणेने घटनास्थळी धाव घेतली. चिखल आणि ढिगाऱ्याखाली अडकलेल्या भाविकांना बाहेर काढण्यासाठी युद्धपातळीवर प्रयत्न सुरू आहेत. ढिगाऱ्याखाली आणखी काही जण अडकल्याची भीती व्यक्त केली जात असून शोधकार्य सुरू आहे.
घटनेचा थरार आणि भीतीचे वातावरण
मरगुबाई मंदिराचा परिसर हा नेहमीच भक्तांच्या गर्दीने फुललेला असतो, मात्र या एका घटनेने सर्वत्र भीतीचे आणि दुःखाचे सावट निर्माण झाले आहे. दुर्घटनेचे नेमके गांभीर्य आणि मृतांचा आकडा वाढण्याची शक्यता वर्तवली जात आहे. पोलीस या प्रकरणाचा अधिक तपास करत असून प्रशासनाने स्थानिक यंत्रणेला सतर्कतेचे आदेश दिले आहेत.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.