मुंबई : गणेशोत्सवादरम्यान मुंबई उपनगर जिल्हाधिकाऱ्यांनी चार दिवस रात्री उशिरापर्यंत लाऊडस्पीकर वापरण्यास परवानगी दिली आहे. दुसऱ्या दिवशी, पाचव्या दिवशी, गौरी विसर्जनाच्या दिवशी आणि अनंत चतुर्दशीला लाऊडस्पीकर वापरण्यास परवानगी देण्यात आली आहे. मात्र, ज्या दिवशी विसर्जनाचा दिवस नसतो, त्या दिवशी मंडळांना स्थानिक कार्यक्रम आयोजित करण्यासाठी आणखी एका दिवसाची रात्री उशिरापर्यंत लाऊडस्पीकर वापरण्याची परवानगी देण्याचा अधिकार जिल्हाधिकाऱ्यांना देण्यात आला आहे.
मुंबई उपनगर जिल्हाधिकाऱ्यांनी त्यांच्या अधिकारक्षेत्रातील 15 पैकी 13 दिवसांची यादी जाहीर केली आहे. त्यामुळे मुंबई उपनगरात गणेशोत्सवादरम्यान चार दिवस रात्री उशिरापर्यंत लाऊडस्पीकर वापरता येणार आहे. ध्वनी प्रदूषण (नियमन आणि नियंत्रण) नियम, 2000 नुसार, काही विशिष्ट दिवशी सकाळी 6 ते मध्यरात्री 12 वाजेपर्यंत ध्वनीची मर्यादा लागू असते. धार्मिक किंवा सांस्कृतिक कारणांसाठी लाऊडस्पीकर अथवा ध्वनिवर्धक उपकरणांचा वापर करण्यास परवानगी देण्याची तरतूद आहे. मुंबई शहरासाठी निश्चित करण्यात आलेल्या 15 सणांच्या दिवसांमध्ये नवरात्री, दिवाळी, ख्रिसमस आणि ईद यांसारख्या सणांचा समावेश आहे. यापैकी गणेशोत्सवासाठी चार दिवस निश्चित करण्यात आले आहेत. या चार दिवसांमध्ये 15 सप्टेंबर रोजी होणारे दीड दिवसांचे गणेश विसर्जन, 18 सप्टेंबर रोजी होणारे पाच दिवसांचे विसर्जन, 19 सप्टेंबर रोजी होणारे गौरी विसर्जन आणि 25 सप्टेंबर रोजी होणारी अनंत चतुर्दशी यांचा समावेश आहे. या चार दिवसांमध्ये रात्री उशिरापर्यंत लाऊडस्पीकर वापरण्यास परवानगी देण्यात आली आहे
दरम्यान, या निर्णयाचे स्वागत करतानाच गणेशोत्सव समितीचे अध्यक्ष ॲड. नरेश दहिबावकर यांनी प्रशासनाकडे एक महत्त्वाची मागणी लावून धरली आहे. जिल्हाधिकाऱ्यांनी दिलेले चारही दिवस हे विसर्जनाच्या कार्यक्रमांचे आहेत. त्यामुळे गणेश मंडळांना आपापल्या भागातील स्थानिक धार्मिक व सांस्कृतिक कार्यक्रमांचे आयोजन करण्यासाठी अतिरिक्त आणखी 1 दिवस रात्री 12 वाजेपर्यंत ध्वनिक्षेपक वापरण्याची परवानगी देण्यात यावी, असे त्यांनी स्पष्ट केले आहे. गणेशोत्सव समितीच्या या मागणीवर शासन आणि प्रशासन काय निर्णय घेते, याकडे सर्व गणेश मंडळांचे लक्ष लागले आहे.
