Tejas Jet Deal With HAL: संरक्षण मंत्रालयाचा HAL सोबत ऐतिहासिक करार! हवाई दलाला मिळणार 97 तेजस Mk1A लढाऊ विमानं

Tejas Jet Deal With HAL: भारताच्या संरक्षण क्षमतांना बळकटी देणारा महत्त्वपूर्ण निर्णय घेण्यात आला आहे. संरक्षण मंत्रालयाने गुरुवारी हिंदुस्तान एरोनॉटिक्स लिमिटेड (एचएएल) सोबत 97 स्वदेशी विकसित तेजस एमके1ए लढाऊ विमाने खरेदी करण्याचा 62,370 कोटी रुपयांचा करार केला आहे. या करारात 68 सिंगल-सीट फाइटर्स आणि 29 ट्विन-सीट ट्रेनर्स सोबत आवश्यक उपकरणे व सपोर्ट सिस्टीमचा समावेश आहे.

आत्मनिर्भर भारताकडे मोठे पाऊल

'मेक इन इंडिया' आणि 'आत्मनिर्भर भारत' मोहिमेला चालना देणारा हा करार भारतीय हवाई दलाच्या ताकदीत क्रांतिकारी बदल घडवेल. एचएएलद्वारे निर्मित तेजस एमके1ए हे अत्याधुनिक स्वदेशी विमान भारताला संरक्षण उत्पादन क्षेत्रात जागतिक पातळीवर सक्षम बनवणार आहे.

हवाई दलाची ताकद वाढणार

नवीन तेजस Mk-1A विमानं वेगवान, आधुनिक आणि विश्वासार्ह असून, त्यांचा समावेश झाल्यामुळे मिग-21 सारखी जुनी विमाने हळूहळू फेजआउट करताना हवाई दलाच्या स्क्वॉड्रनची ताकद टिकून राहील.

हेही वाचा – MIG-21 : भारतीय हवाई दलाचे 'मिग-21' घेणार अंतिम झेप; 1965 आणि 1971 च्या युद्धातील 'आकाश-योद्धा' निवृत्त

संरक्षण उद्योगाला प्रोत्साहन

या करारामुळे भारतीय संरक्षण उद्योग, पुरवठा साखळी आणि तंत्रज्ञान क्षेत्राला मोठा बूस्ट मिळणार आहे. एचएएल आणि इतर भारतीय कंपन्यांना आर्थिक व तांत्रिकदृष्ट्या प्रचंड फायदा होणार आहे.

हेही वाचा – Silver Jewellery Ban: केंद्र सरकारने घेतला महत्त्वाचा निर्णय; साध्या चांदीच्या दागिन्यांच्या आयातीवर निर्बंध 

अत्याधुनिक तंत्रज्ञानासह तेजस

तेजस एमके1ए मध्ये एईएसए रडार, स्व-संरक्षण कवच, आणि प्रगत अ‍ॅक्च्युएटर्स सारखी स्वदेशी तंत्रज्ञान-व्यवस्था एकत्रित करण्यात आली आहे. हे मॉडेल आतापर्यंतचे सर्वात अत्याधुनिक स्वरूप असून भारतीय हवाई दलाच्या ऑपरेशनल गरजांना पूर्णपणे समर्थ ठरणार आहे. हा करार केवळ संरक्षण दलाची क्षमता वाढवणारा नाही, तर भारताला स्वावलंबनाच्या नव्या उंचीवर नेणारा मैलाचा दगड मानला जात आहे.