Share Market Today : शेअर बाजारात भूकंप! सेन्सेक्स 400 अंकांनी कोसळला; RBI च्या बैठकीपूर्वी गुंतवणूकदारांचा सावध पवित्रा

Share Market Today : भारतीय शेअर बाजारातील गेल्या काही दिवसांपासूनची अस्थिरता आज अधिकच गडद झाली असून, जागतिक तणावाचा मोठा फटका दलाल स्ट्रीटला बसला आहे. अमेरिका आणि इराण यांच्यातील वाढत्या संघर्षाचे पडसाद जागतिक बाजारपेठेवर उमटले असून, त्यामुळे भारतीय गुंतवणूकदारांनी विक्रीचा सपाटा लावला. सकाळी बाजार उघडताच सेन्सेक्स 410 अंकांनी कोसळून 73,935 च्या स्तरावर आला, तर निफ्टी 50 निर्देशांक 212 अंकांच्या घसरणीसह 23,270 वर व्यवहार करत होता. रिझर्व्ह बँक ऑफ इंडियाच्या (RBI) आगामी मौद्रिक धोरण समितीच्या निर्णयापूर्वी बाजार अत्यंत सावध भूमिकेत असून, शुक्रवारी जाहीर होणाऱ्या व्याजदरांच्या निर्णयाकडे सर्वांचे लक्ष लागले आहे.

आयटी आणि रिअल इस्टेटवर सर्वाधिक दबाव; दिग्गज शेअर्सची पडझड
बाजारातील आजची घसरण केवळ मुख्य निर्देशांकापुरती मर्यादित नसून, सर्वच क्षेत्रीय निर्देशांकांना याचा फटका बसला आहे. विशेषतः आयटी (IT) आणि रिअल इस्टेट क्षेत्रात सर्वाधिक दबाव दिसून आला, तर हेल्थकेअर, ऑटो आणि वित्तीय सेवा क्षेत्रातील कंपन्यांचे शेअर्सही मोठ्या प्रमाणात विकले गेले. निफ्टी मिडकॅपमध्ये 0.22 टक्के आणि स्मॉलकॅप निर्देशांकात 0.15 टक्क्यांची घसरण नोंदवली गेली. सकाळच्या सत्रात इन्फोसिस, आयसीआयसीआय बँक, रिलायन्स, भारती एअरटेल आणि कोटक बँक यांसारख्या दिग्गज कंपन्यांच्या शेअरमध्ये सर्वाधिक घसरण झाल्याने गुंतवणूकदारांचे मोठे नुकसान झाले आहे.

हेही वाचा – Fuel Price Update : इंधन दरवाढीचा भडका उडणार! 'या' कारणामुळे सर्वसामान्यांचा खिसा होणार रिकामा ?

टॉप लूजर्स आणि गेनर्सची स्थिती
– टॉप लूजर्स: आयटी क्षेत्रातील इन्फोसिस आणि एचसीएल टेकसह सिप्ला, आयशर मोटर्स आणि महिंद्रा अँड महिंद्रा या कंपन्यांच्या शेअर्सना विक्रीच्या दबावाचा सामना करावा लागला.
– टॉप गेनर्स: एवढ्या मोठ्या घसरणीतही कोल इंडिया, अदानी एंटरप्रायझेस, ओएनजीसी, ग्रासिम आणि अदानी पोर्ट्स यांसारखे मोजके शेअर्स नफा कमावत होते.
– सेन्सेक्सची स्थिती: सेन्सेक्सवरील 30 प्रमुख शेअर्सपैकी केवळ अल्ट्रा टेक सिमेंट, आयटीसी (ITC), बजाज फिनसर्व्ह आणि एनटीपीसी (NTPC) हे शेअर्स वाढीसह व्यवहार करत होते.

IPO बाजारातही हालचाल सुरू
एकीकडे मुख्य बाजार घसरणीचा सामना करत असताना, प्राथमिक बाजारात (IPO Market) मात्र काही कंपन्यांचे नवीन इश्यूज सुरू झाले आहेत. 'सीएमआर ग्रीन टेक्नॉलॉजीज' (CMR Green Technologies) चा आयपीओ आज दुसऱ्या दिवशी गुंतवणुकीसाठी खुला आहे. याशिवाय, 'वॅह केमिकल्स' (Vahh Chemicals) आणि 'यूएचएम व्हॅकेशन' (UHM Vacation) या दोन कंपन्यांचे नवीन आयपीओ देखील आजपासून गुंतवणुकीसाठी खुले झाले आहेत. गुंतवणूकदारांनी सध्याच्या अस्थिर वातावरणात या नवीन गुंतवणुकीच्या संधींकडेही लक्ष केंद्रित केले आहे. जागतिक भू-राजकीय तणाव आणि रिझर्व्ह बँकेचा व्याजदरांबाबतचा शुक्रवारी येणारा निर्णय यावरच आता शेअर बाजाराची पुढील दिशा अवलंबून असणार आहे.

हेही वाचा – PIB Fact Check: आरबीआयने गुपचूप 12 अब्ज डॉलर्सचे सोने विकले का? अखेर सरकारने केला मोठा खुलासा