नाशिक जिल्ह्यातील प्रसिद्ध सप्तशृंगी गडावर दर्शनासाठी जाणाऱ्या भाविकांसाठी महत्त्वाची बातमी आहे. नांदुरी ते सप्तशृंगी गड या घाटमार्गावर रस्त्याच्या काँक्रिटीकरणाचे काम हाती घेण्यात आले असून, या कामामुळे या मार्गावरील वाहतूक तब्बल १६ दिवस पूर्णपणे बंद ठेवण्यात येणार आहे. त्यामुळे या काळात गडावर जाणाऱ्या भाविकांनी प्रवासाचे नियोजन करताना विशेष खबरदारी घेणे आवश्यक आहे.
प्रशासनाने दिलेल्या माहितीनुसार, १० सप्टेंबर ते २६ सप्टेंबर या कालावधीत नांदुरीपासून सप्तशृंगी गडाकडे जाणाऱ्या मार्गावर वाहतूक बंद राहणार आहे. दररोज सकाळी ७ वाजल्यापासून रात्री १२ वाजेपर्यंत या रस्त्यावर कोणत्याही प्रकारची वाहतूक करता येणार नाही. घाटमार्गात सुरू असलेल्या काँक्रिटीकरणाच्या कामात अडथळा निर्माण होऊ नये आणि काम सुरक्षितपणे पूर्ण करता यावे, यासाठी हा निर्णय घेण्यात आला आहे.
कळवण आदिवासी सार्वजनिक बांधकाम विभागाच्या कार्यकारी अधिकाऱ्यांकडून यासंदर्भातील निर्णय घेण्यात आला आहे. रस्त्याचे काम पूर्ण झाल्यानंतर घाटमार्गाची स्थिती सुधारण्यास मदत होणार असून, भविष्यात भाविक आणि स्थानिक नागरिकांना अधिक सुरक्षित प्रवास करता येईल, अशी अपेक्षा आहे.
मात्र, या निर्णयामुळे स्थानिक गावकऱ्यांमध्ये नाराजी व्यक्त होत आहे. सप्तशृंगी गडावर जाण्यासाठी सध्या कोणताही पर्यायी मार्ग उपलब्ध नसल्याचे नागरिकांचे म्हणणे आहे. त्यामुळे संपूर्ण वाहतूक बंद करण्याऐवजी स्थानिक गावकऱ्यांसाठी तरी मार्ग सुरू ठेवावा, अशी मागणी करण्यात येत आहे.
या मार्गावर दररोज स्थानिक नागरिकांसोबतच मोठ्या संख्येने भाविक आणि प्रवासी ये-जा करतात. त्यामुळे १६ दिवसांचा वाहतूकबंदीचा निर्णय त्यांच्यासाठी मोठी अडचण ठरण्याची शक्यता आहे.
दरम्यान, प्रशासनाने भाविक, वाहनचालक आणि प्रवाशांना वाहतूकबंदीच्या कालावधीत शक्य ते पर्यायी मार्ग वापरण्याचे आवाहन केले आहे. मात्र, सप्तशृंगी गडासाठी थेट पर्यायी मार्ग नसल्याने भाविकांसमोर नेमका पर्याय काय, हा प्रश्नही उपस्थित झाला आहे.
काँक्रिटीकरणाचे काम लवकरात लवकर पूर्ण करून वाहतूक पूर्ववत करावी, तसेच स्थानिक नागरिकांच्या दैनंदिन गरजा लक्षात घेऊन त्यांना काही प्रमाणात मार्ग उपलब्ध करून द्यावा, अशी मागणी आता जोर धरत आहे.
