Dhurandhar Box Office Collection : रणवीर सिंगच्या ‘धुरंधर’चा बॉक्स ऑफिसवर मोठा पराक्रम; ‘पुष्पा 2’ला मागे टाकत बनला भारताचा नंबर 1 चित्रपट

Dhurandhar Box Office Collection : बॉलिवूडचा सुपरस्टार रणवीर सिंग याच्या 'धुरंधर' चित्रपटाने बॉक्स ऑफिसवर नवा इतिहास रचला आहे. गेल्या 33 दिवसांपासून प्रेक्षकांना भुरळ घालणाऱ्या या चित्रपटाने आतापर्यंतचे सर्व विक्रम मोडीत काढत 'भारतातील सर्वाधिक कमाई करणारा हिंदी चित्रपट' होण्याचा बहुमान मिळवला आहे. विशेष म्हणजे, या शर्यतीत 'धुरंधर'ने दाक्षिणात्य सुपरस्टार अल्लू अर्जुनच्या 'पुष्पा २'चा ऐतिहासिक रेकॉर्ड मोडीत काढून बॉलिवूडचा दबदबा पुन्हा निर्माण केला आहे.

कमाईचा थक्क करणारा आकडा

'धुरंधर'ने प्रदर्शनाच्या पाचव्या आठवड्यातही बॉक्स ऑफिसवर आपली पकड ढिली होऊ दिली नाही. सोमवारपर्यंत या चित्रपटाचे एकूण निव्वळ कलेक्शन 825.70 कोटींवर पोहोचले होते. मंगळवारी अंदाजे 5 कोटींची भर पडल्यानंतर, अवघ्या 33 दिवसांत या चित्रपटाने जवळपास 831 कोटींचा टप्पा ओलांडला आहे. या कामगिरीसह रणवीर सिंगने बॉक्स ऑफिसचा नवा 'धुरंधर' असल्याचे सिद्ध केले आहे.

हेही वाचा – BMC Elections 2026 : हलगर्जीपणाचा कळस! प्रचारावेळी बिल्डिंगला आग लागताच जीव धोक्यात टाकून पळ काढणाऱ्या कार्यकर्त्यांवर अभिनेत्री संतापली

'पुष्पा 2'चा विक्रम मोडला 

काही काळापासून भारतातील सर्वाधिक कमाई करणाऱ्या हिंदी चित्रपटाचा विक्रम दक्षिण भारतीय चित्रपट 'पुष्पा 2'च्या नावावर होता. मात्र, रणवीर सिंगच्या या चित्रपटाने अंदाजे 831 कोटींची कमाई करून हा मुकुट पुन्हा एकदा बॉलिवूडच्या शिरावर ठेवला आहे. चित्रपटाच्या कमाईतील सातत्य हे थक्क करणारे असून, पाचव्या आठवड्यातही प्रेक्षक मोठ्या संख्येने चित्रपटगृहांकडे वळत आहेत.

हेही वाचा – Shraddha Kapoor : फायनल झालं! श्रद्धा कपूर लवकरच होणार नवरी; लग्नाच्या चर्चांवर अभिनेत्रीने अखेर हे उत्तर दिलं

900 कोटींच्या क्लबकडे यशस्वी वाटचाल

बॉक्स ऑफिसवर सध्या 'धुरंधर'ला टक्कर देणारा कोणताही मोठा चित्रपट नसल्याचा फायदा या चित्रपटाला मिळत आहे. येत्या 15 दिवसांत 'बॉर्डर 2' प्रदर्शित होईपर्यंत या चित्रपटाला पूर्ण मोकळे मैदान मिळणार आहे. ज्या वेगाने चित्रपटाची कमाई सुरू आहे, ते पाहता लवकरच हा चित्रपट 900 कोटींच्या क्लबमध्ये प्रवेश करेल, अशी दाट शक्यता वर्तवली जात आहे. रणवीर सिंगच्या कारकिर्दीतील हा सर्वात यशस्वी चित्रपट ठरला असून, आगामी काळात कोणत्याही हिंदी चित्रपटासाठी हा विक्रम मोडणे एक मोठे आव्हान असेल.