पाकिस्तानविरुद्ध ऑपरेशन अजूनही सुरू आहे; सर्वपक्षीय बैठकीत राजनाथ सिंह यांचे मोठे विधान

नवी दिल्ली: पहलगाममधील दहशतवादी हल्ल्यानंतर भारतीय लष्कराने पीओके आणि पाकिस्तानमधील दहशतवादी छावण्यांवर ऑपरेशन सिंदूर अंतर्गत हवाई हल्ला केला. यामध्ये, 9 दहशतवादी अड्ड्यांवर हल्ले करण्यात आले. 'ऑपरेशन सिंदूर'च्या यशानंतर आता सरकारने गुरुवारी सर्वपक्षीय बैठक बोलावली आहे. त्यात अनेक मोठ्या विरोधी नेत्यांनीही भाग घेतला. ही बैठक आता संपली आहे. परंतु, बैठक संपताच, मोठ्या बातम्या समोर येत आहेत, ज्यामध्ये असे म्हटले जात आहे की ऑपरेशन सिंदूर अजून संपलेले नाही.

पाकिस्तानविरुद्ध ऑपरेशन अजूनही सुरू आहे – 

केंद्र सरकारने आज सर्वपक्षीय बैठक बोलावली होती. या बैठकीत केंद्रीय संरक्षण मंत्री राजनाथ सिंह यांनी सर्व सदस्यांना ऑपरेशन सिंदूरबाबत माहिती दिली. सूत्रांचा दावा आहे की, या बैठकीत राजनाथ सिंह यांनी ऑपरेशन सिंदूर अजून संपले नसून ते अजूनही सुरू असल्याचं सांगितलं. यासंदर्भात बोलताना  राजनाथ सिंह म्हणाले की, ऑपरेशन अजूनही सुरू आहे आणि सीमेवरील परिस्थिती वेगाने बदलत आहे, त्यामुळे आम्ही सध्या तपशील शेअर करू शकणार नाही. 

दरम्यान, या बैठकीत संरक्षण मंत्री राजनाथ सिंह यांनी ऑपरेशन सिंदूरबद्दल चर्चा केली. परंतु ऑपरेशनल तपशील दिले नाहीत. तथापि, यावेळी सर्व पक्षांनी आम्ही सरकारच्या निर्णयासोबत असल्याचं स्पष्ट केलं. यावेळी मल्लिकार्जुन खरगे यांनी पंतप्रधान नरेंद्र मोदी यांच्या अनुपस्थितीचा मुद्दाही उपस्थित केला. गेल्या वेळीही काँग्रेसने सर्वपक्षीय बैठकीत पंतप्रधानांच्या उपस्थितीचा मुद्दा उपस्थित केला होता. काँग्रेसने म्हटले होते की, पंतप्रधानांनी बैठकीला यायला हवे होते. याशिवाय, विरोधकांनी संसदेचे विशेष अधिवेशन बोलावण्याची मागणीही केली. 

हेही वाचा – भारताने उधळला पाकिस्तानचा डाव! अमृतसरमध्ये हवेतचं पाडले पाकिस्तानी क्षेपणास्त्र

या सर्वपक्षीय बैठकीला केंद्रीय मंत्री राजनाथ सिंह, अमित शहा, एस जयशंकर, जेपी नड्डा आणि निर्मला सीतारमण आदी मंत्री उपस्थित होते. तथापि, या बैठकीला काँग्रेसच्या वतीने राहुल गांधी आणि मल्लिकार्जुन खर्गे उपस्थित होते. याशिवाय तृणमूल काँग्रेसचे सुदीप बंदोपाध्याय आणि द्रमुकचे टीआर बालू या बैठकीला उपस्थित होते. राजनाथ सिंह यांनी या बैठकीचे अध्यक्षस्थान भूषवले.

हेही वाचा – ‘आम्ही त्यांनाचं मारले, ज्यांनी निष्पापांचे जीव घेतले…'; ऑपरेशन सिंदूरवर राजनाथ सिंह यांची प्रतिक्रिया

दरम्यान, इतर विरोधी नेत्यांमध्ये समाजवादी पक्षाचे रामगोपाल यादव, आम आदमी पक्षाचे संजय सिंह, शिवसेनेचे संजय राऊत (उत्तर प्रदेश), राष्ट्रवादी काँग्रेसच्या (सपा) सुप्रिया सुळे, बीजेडीचे सस्मित पात्रा आणि सीपीआय(एम) चे जॉन ब्रिटास यांनी सर्वपक्षीय बैठकीत हजेरी लावली. याशिवाय जदयू नेते संजय झा, केंद्रीय मंत्री आणि लोजपा (रामविलास) नेते चिराग पासवान आणि एआयएमआयएम खासदार असदुद्दीन ओवैसी देखील बैठकीला उपस्थित होते.