Pune Railway Station : पुणे रेल्वे स्थानकाचा चेहरामोहरा बदलणार; विमानतळाप्रमाणेच मिळणार ‘या’ खास सुविधा

Pune Railway Station : पुणे रेल्वे स्थानकावरील प्रवाशांची अफाट गर्दी आणि होणारा गोंधळ आता कायमचा इतिहास जमा होणार आहे. मध्य रेल्वेच्या पुणे विभागाने प्रवाशांसाठी एक अत्यंत महत्त्वाकांक्षी आणि 'गेम चेंजर' ठरणारा प्रकल्प हाती घेतला आहे. विमानतळाच्या धर्तीवर आता रेल्वे स्थानकावरही प्रवाशांचे नियोजन केले जाणार असून, यासाठी एक भव्य 'पॅसेंजर होल्डिंग एरिया' (प्रवासी थांबा क्षेत्र) उभारले जाणार आहे.

5,000 प्रवासी एकाच वेळी थांबणार!
पुणे रेल्वे स्थानकावरून दररोज सरासरी 1.74 लाख प्रवासी ये-जा करतात. सण-उत्सव आणि उन्हाळ्याच्या सुट्ट्यांमध्ये ही गर्दी नियंत्रणाबाहेर जाते. ही समस्या कायमची सोडवण्यासाठी रेल्वे प्रशासनाने स्थानक परिसरात तब्बल 7,000 स्क्वेअर मीटर क्षेत्रफळाचा भव्य होल्डिंग एरिया उभारण्याचे नियोजन केले आहे. या ठिकाणी एकाच वेळी सुमारे 5,000 प्रवासी आरामात थांबू शकतील. यामुळे प्लॅटफॉर्मवर होणारी गर्दी कमी होईल आणि चेंगराचेंगरीसारख्या दुर्घटनांना आळा बसेल.

हेही वाचा – Mumbai Airport Facility: हायटेक 'मुंबई विमानतळ'; बॅग ड्रॉपसाठी आता रांगेत उभं राहण्याची गरज नाही, 'डिजियात्रा'चीही मिळणार साथ

तीन झोनमध्ये होणार प्रवाशांचे 'स्मार्ट' नियोजन
या नवीन प्रकल्पाचे सर्वात मोठे वैशिष्ट्य म्हणजे विमानतळासारखे झोनिंग. प्रवाशांच्या हालचाली सुटसुटीत व्हाव्या यासाठी या भागाचे तीन स्वतंत्र विभागांत विभाजन केले जाईल:
1. प्री-तिकिटिंग झोन: तिकीट काढण्यापूर्वीचा विभाग.
2. तिकिटिंग झोन: जिथे तिकीट खरेदीची प्रक्रिया पार पडेल.
3. पोस्ट-तिकिटिंग झोन: तिकीट काढल्यानंतर गाडीची वाट पाहण्यासाठीची सुरक्षित जागा.
विभागीय व्यावसायिक व्यवस्थापक हेमंत बेहेरा यांच्या मते, या शिस्तबद्ध रचनेमुळे प्रवाशांना गोंधळ न होता थेट आपल्या रेल्वेगाडीपर्यंत पोहोचता येईल. सुमारे 5 ते 6 महिन्यांत हा प्रकल्प पूर्ण करण्याचे उद्दिष्ट रेल्वे प्रशासनाने ठेवले आहे.

7,000 स्क्वेअर मीटरचा भव्य प्रकल्प लवकरच प्रवाशांच्या सेवेत
या महत्त्वाकांक्षी प्रकल्पासाठी रेल्वेच्या विशेष पथकाने सविस्तर सर्वेक्षण पूर्ण केले आहे. हा अहवाल लवकरच रेल्वे जमीन विकास प्राधिकरणाकडे (RLDA) सुपूर्द केला जाणार असून, त्यानंतर प्रत्यक्ष बांधकामाला वेग येईल. हा होल्डिंग एरिया केवळ थांबा नसेल, तर तिथे पिण्याचे पाणी, बैठक व्यवस्था, व्हीआयपी लाउंज, स्वच्छतागृहे आणि डिजिटल माहिती फलक अशा जागतिक दर्जाच्या सुविधा उपलब्ध असतील.

हेही वाचा – Land Record Updates: माणसांप्रमाणेच आता जमिनीलाही मिळणार 'आधार'; वाचा, काय आहे सरकारची नवीन 'भू-आधार' योजना?