बलात्कार प्रकरणात JDS नेते प्रज्वल रेवण्णा दोषी; 2 ऑगस्ट जाहीर होणार शिक्षा

बेंगळुरू: जनता दल (धर्मनिरपेक्ष) नेते आणि कर्नाटकातील माजी खासदार प्रज्वल रेवण्णा यांना शुक्रवारी बेंगळुरूतील एका विशेष न्यायालयाने बलात्काराच्या प्रकरणात दोषी ठरवले. ही कारवाई त्यांच्या विरोधात हसन जिल्ह्यातील होलेनारसीपुरा ग्रामीण पोलिस स्टेशनमध्ये दाखल करण्यात आलेल्या पहिल्या बलात्काराच्या तक्रारीवर आधारित आहे. आता या खटल्यात 2 ऑगस्ट रोजी शिक्षा जाहीर होणार आहे.

न्यायालयीन कारवाई आणि सुनावणी

या प्रकरणातील सुनावणी 18 जुलै रोजी पूर्ण झाली होती. त्यानंतर न्यायालयाने निकाल राखून ठेवला होता, जो अखेर आज जाहीर झाला. विशेष न्यायालयाने रेवण्णा यांना दोषी ठरवून, शिक्षेसंदर्भात निकाल 2 ऑगस्ट रोजी देण्याचे ठरवले आहे.

2000 हून अधिक अश्लील व्हिडिओ क्लिप्स

गेल्या वर्षी नोंदवलेल्या चार गुन्हेगारी प्रकरणांमध्ये रेवन्ना हा मुख्य आरोपी आहे. जेव्हा 2000 हून अधिक अश्लील व्हिडिओ क्लिप, ज्यामध्ये अनेक महिलांचे लैंगिक शोषण केल्याचे कथितपणे दाखवले गेले होते. हे सर्व व्हिडिओ क्लिप सोशल मीडियावर व्हायरल झाले होते. त्यानंतर संपूर्ण राज्यात खळबळ उडाली होती. या क्लिप्समुळे रेवण्णाविरुद्ध चार गुन्हेगारी खटले दाखल झाले. सध्या हे सर्व प्रकरणं तपासाधीन आहेत.

हेही वाचा – यंदा लाल किल्ल्यावरून पंतप्रधान मोदी तुमचं मत मांडणार! भाषणासाठी मागवल्या सूचना

पहिली तक्रार एप्रिल 2024 मध्ये दाखल

रेवण्णाविरुद्धची पहिली बलात्काराची तक्रार एप्रिल 2024 मध्ये दाखल करण्यात आली होती. एका घरगुती महिला कामगाराने तक्रार दाखल केली होती की, 2021 पासून तिला वारंवार लैंगिक अत्याचाराला सामोरे जावे लागले. आरोपीने पीडितेला तिचे व्हिडिओ सोशल मीडियावर टाकण्याची धमकी दिली होती. 

हेही वाचा – पंतप्रधान मोदींनी जारी केले 1000 रुपयांचे नाणे; काय आहेत त्याची वैशिष्ट्ये? जाणून घ्या

कोण आहेत प्रज्वल रेवण्णा? 

प्रज्वल रेवण्णा हे माजी पंतप्रधान एच.डी. देवेगौडा यांचे नातू आणि कर्नाटकचे माजी मंत्री एच.डी. रेवण्णा यांचे पुत्र आहेत. ते हसन लोकसभा मतदारसंघाचे माजी खासदार होते आणि JDS पक्षात सक्रिय होते. प्रज्वल रेवण्णा यांच्याविरोधातील बलात्कार प्रकरणाने केवळ कर्नाटकातील नव्हे, तर संपूर्ण देशाच्या राजकीय वर्तुळात खळबळ उडवली आहे. उच्चभ्रू राजकीय घराण्यात जन्मलेला व्यक्ती, ज्याचं नाव आणि चेहरा जनतेसाठी परिचित होता. मात्र, आज न्यायालयीन प्रक्रियेत दोषी ठरला आहे.