सोमवारी दिल्ली बॉम्बस्फोटाने हादरली. या प्रकरणाची आता कसून चौकशी केली जात आहे. या प्रकरणाचा तपास करताना अनेक धागेदोरे हाती लागले आहेत. अशातच आता हरियाणामधील अल फलाह विद्यापीठ चर्चेत आले आहे. दिल्लीतील लाल किल्ल्याजवळ झालेल्या स्फोटाच्या फंडिंगची चौकशी केली जाईल. एनआयए, ईडी आणि इतर एजन्सींसह या प्रकरणाची चौकशी करेल. अल-फलाह विद्यापीठात संपूर्ण फॉरेन्सिक चौकशी देखील केली जाईल.
केंद्रीय गृहमंत्री अमित शहा यांनी गुरुवारी गृह सचिव, गुप्तचर विभागाचे संचालक, एनआयएचे महासंचालक आणि गृह मंत्रालयाच्या इतर उच्चस्तरीय अधिकाऱ्यांसोबत बैठक घेतली. सूत्रांनी दिलेल्या माहितीनुसार, या बैठकीत असे ठरले की लाल किल्ला बॉम्बस्फोट प्रकरणात निधीच्या चौकशीत एनआयएसोबत ईडी आणि आर्थिक तपासाशी संबंधित इतर एजन्सी देखील काम करतील. याशिवाय, अल-फलाह विद्यापीठात फॉरेन्सिक चौकशी केली जाईल. ईडी आणि इतर आर्थिक तपास संस्था विद्यापीठाशी संबंधित डॉक्टरांच्या आर्थिक व्यवहारांची देखील चौकशी करतील.
हेही वाचा – Delhi Blast Update: दिल्ली बॉम्बस्फोटाचा खरा सूत्रधार कोण? कट कोणी रचला? 'हे' मोठं नाव आलं समोर
या संपूर्ण प्रकरणात निधी आणि मनी लाँडरिंगसारख्या आर्थिक बाबींची चौकशी केली जाईल. १० नोव्हेंबर रोजी दिल्लीत झालेल्या बॉम्बस्फोटाने संपूर्ण देशाला धक्का बसला आहे. या प्रकरणात दररोज नवीन खुलासे होत आहेत. दररोज नवीन नावे समोर येत आहेत.
सरकारने दिल्लीतील बॉम्बस्फोटांना दहशतवादी हल्ला म्हणून मान्यता दिली आहे. केंद्रीय मंत्रिमंडळाच्या बैठकीत बॉम्बस्फोटात मृत्युमुखी पडलेल्यांना श्रद्धांजली वाहण्यात आली. दोन मिनिटे मौनही पाळण्यात आले. याशिवाय, ही घटना देशविरोधी शक्तींनी रचलेला कट असल्याचा ठराव मंजूर करण्यात आला. या घटनेची चौकशी अत्यंत तत्परतेने आणि व्यावसायिकतेने केली जाईल. गुन्हेगारांना लवकरात लवकर न्याय मिळवून दिला जाईल.
