मुंबईत ऑनलाइन फसवणुकीचा धक्कादायक प्रकार समोर आला आहे. अवघे 99 रुपये भरून 9,999 रुपये मिळतील, अशी जाहिरात पाहून महिलेने आरोपींशी संपर्क साधला; मात्र या आमिषाच्या नादात तिला तब्बल 73 हजार 521 रुपये गमवावे लागले. या प्रकरणी ओशिवरा पोलिसांच्या सायबर पथकाने राजस्थानमधून दोन मुख्य आरोपींना अटक केली आहे.
मिळालेल्या माहितीनुसार, 12 जुलै 2026 रोजी पीडित महिलेला Facebook वर ‘Wizard Traders 7’ नावाचे पेज आढळले. या पेजवर 99 रुपये भरल्यानंतर तब्बल 9,999 रुपये मिळतील, अशी जाहिरात करण्यात आली होती. कमी रक्कम भरून मोठा परतावा मिळण्याच्या आमिषाला बळी पडून महिलेने जाहिरातीमध्ये दिलेल्या WhatsApp क्रमांकावर संपर्क साधला.
यानंतर आरोपींनी महिलेला एक QR कोड पाठवला. त्यावरून महिलेने सुरुवातीला Google Payच्या माध्यमातून 99 रुपये पाठवले. मात्र त्यानंतर आरोपींनी वेगवेगळी कारणे सांगत महिलेकडून आणखी पैसे उकळण्यास सुरुवात केली. वेगवेगळ्या शुल्कांच्या नावाखाली आणि विविध कारणे पुढे करत आरोपींनी महिलेच्या खात्यातून तब्बल 22 व्यवहार केले. या व्यवहारांमधून एकूण 73 हजार 521 रुपये लंपास करण्यात आले.
आपली फसवणूक झाल्याचे लक्षात आल्यानंतर महिलेने ओशिवरा पोलीस ठाण्यात तक्रार दाखल केली. त्यानंतर पोलिसांनी प्रकरणाचे गांभीर्य लक्षात घेऊन तपास सुरू केला. सायबर पथकाने तांत्रिक माहितीच्या आधारे आरोपींचा माग काढत राजस्थानमधील जयपूर आणि दौसा जिल्ह्यात तब्बल चार दिवस शोधमोहीम राबवली.
आरोपी वारंवार आपली ठिकाणे बदलत असल्याने पोलिसांसमोर त्यांना पकडण्याचे आव्हान होते. अखेर पोलिसांनी सापळा रचून स्थानिक पोलिसांच्या मदतीने दोन्ही आरोपींना अटक केली. अटक करण्यात आलेल्या आरोपींची नावे दीपक सिताराम मीना (21) आणि हरकेश गोपाल मीना (30) असून दोघेही राजस्थानचे रहिवासी आहेत.
पोलिसांनी आरोपींकडून दोन iPhone, एक Oppo मोबाइल, 11 सिमकार्ड, NSDL बँकेचे डेबिट कार्ड आणि Paytm QR स्कॅनर असा मुद्देमाल जप्त केला आहे. या टोळीने आणखी किती नागरिकांची अशाच प्रकारे फसवणूक केली आहे, याचा तपास सध्या सुरू आहे.
