मुंबई: रविवारी लोकलने प्रवास करण्याचा विचार असेल तर मुंबईकरांसाठी महत्त्वाची बातमी आहे. मध्य रेल्वेच्या मुंबई विभागात रुळांची देखभाल आणि सिग्नल यंत्रणेशी संबंधित तांत्रिक कामे करण्यासाठी विविध मार्गांवर मेगाब्लॉक घेण्यात येणार आहे. त्यामुळे ठाणे-कल्याण जलद मार्गासह हार्बर मार्गावरील काही लोकल सेवांच्या वेळापत्रकात बदल होणार असून काही फेऱ्या रद्द करण्यात येणार आहेत. पश्चिम रेल्वेवर मात्र रविवारी कोणताही ब्लॉक असणार नाही.
मध्य रेल्वेच्या मुख्य मार्गावर ठाणे ते कल्याणदरम्यान अप आणि डाऊन जलद मार्गावर सकाळी १०.४० ते दुपारी ३.१० वाजेपर्यंत मेगाब्लॉक असेल. या कालावधीत जलद आणि अर्ध-जलद लोकलच्या मार्गात बदल केला जाणार आहे.
सीएसएमटीहून कल्याणच्या दिशेने धावणाऱ्या डाऊन जलद आणि अर्ध-जलद लोकल ठाणे ते कल्याणदरम्यान धीम्या मार्गावर वळवल्या जातील. त्यामुळे नियमित स्थानकांव्यतिरिक्त कळवा, मुंब्रा, दिवा, कोपर, डोंबिवली आणि ठाकुर्ली येथेही या लोकलना थांबा मिळणार आहे.
याचप्रमाणे कल्याणहून सीएसएमटीच्या दिशेने जाणाऱ्या अप जलद आणि अर्ध-जलद लोकलनाही ठाण्यापर्यंत धीम्या मार्गावरून चालवण्यात येईल. या गाड्यांना ठाकुर्ली, डोंबिवली, कोपर, दिवा, मुंब्रा आणि कळवा येथे अतिरिक्त थांबे दिले जाणार आहेत. त्यानंतर मुलुंडजवळ त्या पुन्हा अप धीम्या मार्गावर वळवल्या जातील.
हार्बर मार्गावरही मोठा बदल
हार्बर मार्गावर पनवेल-वाशी अप आणि डाऊन मार्गावर सकाळी ११.०५ ते दुपारी ४.०५ वाजेपर्यंत ब्लॉक घेण्यात येणार आहे. या काळात पनवेलहून सीएसएमटीकडे जाणाऱ्या तसेच सीएसएमटीहून पनवेल आणि बेलापूरच्या दिशेने जाणाऱ्या काही हार्बर सेवा रद्द राहतील. याशिवाय पनवेल-ठाणे आणि ठाणे-पनवेलदरम्यान धावणाऱ्या ट्रान्स-हार्बर सेवांवरही परिणाम होणार आहे. संबंधित वेळेत या मार्गावरील सेवा उपलब्ध नसतील.
प्रवाशांची गैरसोय कमी करण्यासाठी सीएसएमटी-वाशी मार्गावर विशेष लोकल चालवण्यात येणार आहेत. तसेच ठाणे ते वाशी आणि नेरुळदरम्यान ट्रान्स-हार्बर सेवा सुरू राहणार असल्याने प्रवाशांना पर्यायी मार्गाचा वापर करता येईल.रविवारी नेहमीपेक्षा जास्त प्रवासाचे नियोजन करणाऱ्या प्रवाशांनी मेगाब्लॉकची वेळ लक्षात घेऊन घराबाहेर पडणे योग्य ठरेल. विशेषतः ठाणे, कल्याण, डोंबिवली, पनवेल, वाशी आणि सीएसएमटीकडे जाणाऱ्या प्रवाशांनी प्रवासापूर्वी उपलब्ध लोकल सेवेची माहिती तपासावी. मेगाब्लॉकदरम्यान लोकलच्या वेळेत बदल होण्याची शक्यता असल्याने अतिरिक्त वेळ हाताशी ठेवणे प्रवाशांसाठी फायदेशीर ठरू शकते.
