Missing Link Landslide Update : मुंबई-पुणे एक्सप्रेसवेवर दरड कोसळल्याने ‘मिसिंग लिंक’ वरील वाहतूक ठप्प; इतक्या तासांत सुरू होणार रस्ता

Missing Link Landslide : मुंबई-पुणे एक्सप्रेसवेवरील अत्यंत महत्त्वाकांक्षी अशा नव्या 'मिसिंग लिंक' प्रकल्पाच्या परिसरात आज पहाटे एक मोठी दुर्घटना घडली. पुण्याहून मुंबईकडे जाणाऱ्या मार्गावरील खंडाळा एक्झिटजवळ असलेल्या बोगदा क्रमांक 1 च्या बाहेर मुसळधार पावसामुळे भीषण दरड कोसळली. सार्वजनिक बांधकाम मंत्री शिवेंद्रराजे भोसले यांनी दिलेल्या माहितीनुसार, ही घटना पहाटे 3:30 वाजता घडली. पाण्याचा प्रवाह अत्यंत जोरदार असल्याने डोंगरावरून माती आणि मोठ्या दगडांसोबतच बोगद्याच्या कमानीचा काही भागही रस्त्यावर कोसळला. सुदैवाने, कंट्रोल रूमच्या ही बाब तातडीने लक्षात आल्यामुळे वाहतूक वेळेत रोखण्यात आली, ज्यामुळे कोणताही मोठा अनर्थ किंवा जीवितहानी झाली नाही.

अवाढव्य ढिगारा उपसण्यासाठी युद्धपातळीवर प्रयत्न
या दुर्घटनेनंतर महामार्गावर जवळपास 100 टन एवढा प्रचंड ढिगारा साचला होता. राष्ट्रीय महामार्ग प्राधिकरण, स्थानिक पोलीस आणि आपत्ती व्यवस्थापन यंत्रणेने तात्काळ घटनास्थळी धाव घेत बचावकार्य सुरू केले. गेल्या 15 तासांपासून येथील दगड-माती हटवण्याचे काम सातत्याने सुरू आहे. ढिगाऱ्याचे अवाढव्य स्वरूप पाहता काम वेगाने पूर्ण करण्यासाठी 4 गॅस कटर आणि 4 पोकलँड मशीन तैनात करण्यात आल्या आहेत. डोंगराळ भागात पडणाऱ्या मुसळधार पावसामुळे आणि मोठ्या काँक्रीटच्या तुकड्यांमुळे सुरुवातीला कामात काही अडथळे येत होते, मात्र प्रशासनाने आपले प्रयत्न सुरूच ठेवले आहेत.

हेही वाचा – Mumbai Local Train Services : पावसामुळे लोकलसेवा विस्कळीत; आठवड्याच्या पहिल्याच दिवशी मध्य, हार्बर आणि पश्चिम रेल्वे मार्गावरील वाहतूक धिम्या गतीने

मुख्यमंत्री फडणवीस आणि प्रशासनाकडून वाहतुकीच्या सद्यस्थितीची माहिती
वाहतुकीच्या सद्यस्थितीबाबत महत्त्वाची माहिती देताना मुख्यमंत्री फडणवीस यांनी सांगितले की, साचलेल्या 100 टन ढिगाऱ्यापैकी जवळपास 70 टनांचा ढिगारा आतापर्यंत यशस्वीरित्या हटवण्यात आला आहे. उर्वरित काम पुढील 1.5 ते 2 तासांत पूर्ण होण्याची शक्यता त्यांनी वर्तवली आहे. सध्या सुरक्षेचा उपाय म्हणून मुंबईकडून पुण्याच्या दिशेने जाणाऱ्या 3 लेन सुरू ठेवण्यात आल्या आहेत, तर पुण्याकडून मुंबईकडे जाण्यासाठी केवळ 1 लेन सुरू करण्यात आली आहे. संपूर्ण ढिगारा साफ होऊन मार्ग मोकळा होण्यासाठी प्रशासनाच्या प्राथमिक अंदाजानुसार आणखी 5 ते 6 तास लागू शकतात.

प्रवाशांना पर्यायी मार्गांचा वापर करण्याचे आवाहन
या घटनेमुळे एक्सप्रेसवेवरील वाहतूक यंत्रणा पूर्णपणे विसकळीत झाली असून वाहनांच्या लांबच लांब रांगा लागल्या आहेत. परिणामी, प्रशासनाने मुंबईच्या दिशेने प्रवास करणाऱ्या सर्व वाहनधारकांना एक्सप्रेसवेऐवजी पर्यायी मार्गांचा अवलंब करण्याचा सल्ला दिला आहे. मुसळधार पावसाचा जोर कायम असल्याने घाटमाथा आणि डोंगराळ भागातून प्रवास करताना नागरिकांनी अत्यंत सतर्क राहावे आणि विनाकारण प्रवास टाळावा, असे आवाहन आपत्ती व्यवस्थापन विभागाकडून करण्यात आले आहे.

हेही वाचा – School – colleges Holiday : पावसाचा कहर! सर्व शाळा – महाविद्यालयांना आज सुट्टी; डबेवाल्यांची सेवाही बंद