एफटीआयआयसोबत सांस्कृतिक विभागाचा करार; तरुणांना फिल्म क्षेत्रात रोजगारासाठी व्यावसायिक प्रशिक्षण

मुंबई: राज्यातील तरुणांना चित्रपट, माध्यम व मनोरंजन क्षेत्रात व्यावसायिक संधी उपलब्ध करून देण्यासाठी महाराष्ट्र सरकारने महत्त्वपूर्ण पाऊल उचलले आहे. सांस्कृतिक विभाग, सांस्कृतिक विकास महामंडळ आणि पुण्यातील फिल्म अँड टेलिव्हिजन इन्स्टिट्यूट ऑफ इंडिया (एफटीआयआय) यांच्यात सामंजस्य करार करण्यात आला आहे.

या कराराचा उद्देश राज्यातील इच्छुक तरुणांना गुणवत्तापूर्ण प्रशिक्षण देत त्यांना रोजगाराभिमुख शिक्षणाच्या माध्यमातून स्वयंपूर्ण बनवणे हा आहे. मुख्यमंत्री एकनाथ शिंदे यांच्या उपस्थितीत हा सामंजस्य करार पार पडला. यावेळी सांस्कृतिक कार्य मंत्री आशिष शेलार आणि एफटीआयआयचे अध्यक्ष व प्रसिद्ध अभिनेते आर. माधवन हे देखील उपस्थित होते.

या कराराअंतर्गत एफटीआयआयच्या माध्यमातून विविध कोर्सेसची निर्मिती केली जाणार आहे. या कोर्सेसमध्ये एफटीआयआयचे प्रमाणित व अनुभवी प्रशिक्षक शिकवणार असून, प्रशिक्षण पूर्ण केल्यावर एफटीआयआय, महाराष्ट्र शासन व सांस्कृतिक महामंडळाच्या संयुक्त मान्यतेने प्रमाणपत्र दिले जाणार आहे. या प्रमाणपत्राचा पुढील शिक्षण अथवा रोजगाराच्या संधींमध्ये फायदा होणार असल्याचा विश्वास व्यक्त करण्यात आला आहे.

राज्य शासनाच्या या उपक्रमामुळे तरुणांना स्क्रीन ॲक्टिंग, स्क्रीनप्ले रायटिंग, स्मार्टफोन फिल्ममेकिंग, सिनेमॅटोग्राफी, एडिटिंग, व्हॉईसओव्हर आणि डबिंग, फिल्म ॲप्रिसिएशन, डिजिटल फिल्म प्रोडक्शन आदी क्षेत्रात बेसिक प्रशिक्षण मिळणार आहे.

या सर्व कोर्सेस 3 दिवस ते 20 दिवसांच्या कालावधीत राबवले जाणार आहेत. त्यामुळे अल्पावधीत मिळणाऱ्या प्रशिक्षणावरून रोजगार मिळण्याची शाश्वती कितपत आहे, यावर अनेकांनी प्रश्नचिन्ह उपस्थित केले आहे. सध्या फिल्म व मनोरंजन क्षेत्र हे अत्यंत स्पर्धात्मक असून, काही दिवसांच्या अल्पकालीन प्रशिक्षणानंतर खरोखरच रोजगार मिळणार का? यावर निश्चितता नाही.

तरीही, राज्य शासनाच्या या उपक्रमामुळे तरुणांना इंडस्ट्रीचा प्राथमिक अनुभव मिळेल, संबंधित क्षेत्राविषयीची ओळख होईल आणि पुढील शिक्षणासाठी दिशा मिळेल, असे मानले जात आहे.

मुख्यमंत्री शिंदे यांनी यावेळी सांगितले की, 'महाराष्ट्राच्या सांस्कृतिक वैभवाला नवी दिशा देण्यासाठी आणि तरुणांच्या कलागुणांना संधी देण्यासाठी हा करार ऐतिहासिक ठरणार आहे.' या करारामुळे नवोदित कलाकार, लेखक, तंत्रज्ञ आणि इतर कलावंतांना थेट फिल्म व मीडिया इंडस्ट्रीशी संपर्क साधण्याची संधी मिळेल, असा विश्वासही व्यक्त करण्यात आला आहे.