Maharashtra FYJC Admission 2026: अकरावी प्रवेशाचा मार्ग सुकर! 15 लाख विद्यार्थ्यांसाठी 21 लाख जागा उपलब्ध; असे असेल प्रवेशाचे संपूर्ण वेळापत्रक

Maharashtra FYJC Admission Schedule 2026 : शिक्षण संचालनालयाने अकरावी प्रवेशासाठी यंदाची सविस्तर सांख्यिकी जाहीर केली असून, राज्यभरात एकूण 21,92,036 जागा उपलब्ध आहेत. विशेष म्हणजे, यंदा 10 वी उत्तीर्ण झालेल्या विद्यार्थ्यांच्या तुलनेत जागांची संख्या तब्बल 6,41,178 ने अधिक आहे. एकूण उपलब्ध जागांपैकी 'कॅप' (CAP) अंतर्गत 17,12,513 जागा असून, कोटा प्रवेशासाठी 4,79,523 जागा राखीव ठेवण्यात आल्या आहेत. विविध मंडळांचे मिळून एकूण 15,50,858 विद्यार्थी उत्तीर्ण झाल्यामुळे यंदा अकरावीत प्रवेश मिळवणे विद्यार्थ्यांसाठी सोपे जाणार आहे.

प्रवेश प्रक्रियेचे वेळापत्रक आणि महत्त्वाची पावले
राज्यातील अकरावीची संपूर्ण प्रवेश प्रक्रिया 11 मे पासून ऑनलाइन पद्धतीने सुरू झाली आहे. वेळापत्रकानुसार, 15 मे रोजी विद्यार्थ्यांची तात्पुरती गुणवत्ता यादी जाहीर केली जाणार आहे. त्यानंतर, पहिल्या फेरीनंतर उरलेल्या रिक्त जागांची माहिती 29 मे रोजी दुसऱ्या फेरीसाठी प्रसिद्ध केली जाईल. गेल्या वर्षापासून राज्यभरातील कनिष्ठ महाविद्यालयांमध्ये केंद्रीभूत ऑनलाइन पद्धतीने ही प्रक्रिया राबवली जात असून, दरवर्षी होणारा विलंब टाळण्यासाठी यंदा 10 मे पूर्वीच सर्व तयारी पूर्ण करण्यात आली होती.

निकाल आणि मंडळांनुसार आकडेवारी
यंदा राज्य मंडळाचा दहावीचा निकाल 8 मे रोजी जाहीर झाला, ज्यामुळे 11 मे पासूनच प्रवेश प्रक्रियेला वेग आला. राज्य मंडळाच्या परीक्षेस एकूण 15,42,472 विद्यार्थी बसले होते, त्यापैकी 14,20,486 विद्यार्थी उत्तीर्ण झाले आहेत. तसेच, 'CBSE' मंडळातील 1,28,933 (महाराष्ट्र व गोवा) आणि 'ICSE' मंडळाचे 30,372 विद्यार्थी उत्तीर्ण झाले आहेत. नाशिक जिल्ह्यासाठी विशेषतः 1,00,000 हून अधिक जागा उपलब्ध असून, विद्यार्थ्यांचे शैक्षणिक नुकसान होऊ नये, म्हणून शिक्षण विभागाने ही तत्परता दाखवली आहे.

हेही वाचा – NEET UG 2026 Exam Cancelled: नीट यूजी 2026 परीक्षा रद्द; पेपरफुटीनंतर NTA चा मोठा निर्णय, आता होणार फेरपरीक्षा

विद्यार्थ्यांना पसंतीक्रम भरताना आवाहन
जागांची संख्या अधिक असली तरी, महाविद्यालय निवडताना आणि पसंतीक्रम भरताना विद्यार्थ्यांनी काळजीपूर्वक निर्णय घेण्याचे आवाहन शिक्षण संचालनालयाने केले आहे. पसंतीक्रम चुकल्यास चांगल्या महाविद्यालयात प्रवेश मिळण्यास अडचण येऊ शकते. यंदा दहावी उत्तीर्ण विद्यार्थ्यांची एकूण संख्या साधारण 15,50,858 असल्याने प्रत्येक विद्यार्थ्याला प्रवेश मिळण्याची खात्री असली, तरी नामांकित महाविद्यालयांमध्ये चुरस पाहायला मिळू शकते. त्यामुळे विद्यार्थ्यांनी स्वतःच्या गुणांनुसार योग्य महाविद्यालयांची निवड करणे आवश्यक आहे.

'अशी' होणार अकरावीची प्रवेशप्रक्रिया
11 ते 13 मे: अर्जाचा भाग 1 व 2 भरणे
15 मे तात्पुरती गुणवत्ता यादी प्रसिद्ध करणे
16 मे : तात्पुरत्या गुणवत्ता यादीवर हरकती सादर करणे
19 मे : अंतिम सर्वसाधारण गुणवत्ता यादी प्रसिद्ध करणे
21 ते 22 मे: पहिल्या फेरीच्या यादीसाठी कनिष्ठ महाविद्यालयांचा पसंतीक्रम भरणे
23 मे पहिल्या फेरीसाठीच्या अर्जाची छाननी
26 मे : पहिल्या फेरीसाठी पात्र विद्यार्थ्यांची यादी जाहीर करणे
26 ते 28 मे मिळालेल्या कनिष्ठ महाविद्यालयात प्रवेश निश्चित करणे
29 मे : दुसऱ्या फेरीसाठी रिक्त जागा प्रदर्शित करणे

हेही वाचा – SSC Marathi Subject Result: दहावीचा निकाल, महाराष्ट्रातच मराठीची अनास्था! मराठी भाषेत 94 हजारांहून अधिक विद्यार्थी अनुत्तीर्ण, धक्कादायक माहिती समोर