10,000 प्रवाशांनी मिळवले NCMC स्मार्ट कार्ड; ST च्या 35 प्रकारच्या सवलतींसाठी लागणाऱ्या कार्डची नोंदणी तुम्ही केली का?

ST NCMC Card News : राज्य मार्ग परिवहन महामंडळाने (ST) प्रवाशांच्या सुविधेसाठी आणि सवलतींच्या वितरणात पारदर्शकता आणण्यासाठी 'नॅशनल कॉमन मोबिलिटी कार्ड' (NCMC) अनिवार्य केले आहे. या मोहिमेला प्रवाशांकडून मोठा प्रतिसाद मिळत असून, आतापर्यंत सुमारे 10,000 प्रवाशांनी आपली नोंदणी पूर्ण केली आहे. एसटीमध्ये मिळणाऱ्या 35 प्रकारच्या विविध सामाजिक सवलतींचा लाभ घेण्यासाठी आता हे स्मार्ट कार्ड असणे आवश्यक ठरणार आहे, ज्यामुळे बनावट कागदपत्रांचा वापर करून सवलती लाटणाऱ्यांना चाप बसणार आहे. हे कार्ड विविध श्रेणीतील प्रवाशांच्या ओळखपत्राशी जोडले जाणार आहे. शालेय आणि तांत्रिक शिक्षण घेणाऱ्या विद्यार्थ्यांना त्यांच्या 'सरल' (SARAL) क्रमांकाशी जोडलेले कार्ड मिळेल.

कार्डचे शुल्क आणि रिचार्जचे नियम
नवीन एनसीएमसी कार्ड मिळवण्यासाठी प्रवाशांना 199 रुपये शुल्क मोजावे लागणार आहे. जर तुमचे कार्ड जुने झाले असेल आणि ते बदलून नवीन हवे असेल, तर जुने कार्ड जमा करून केवळ 149 रुपयांत नवीन कार्ड उपलब्ध होईल. या कार्डमध्ये किमान 100 रुपये शिल्लक असणे अनिवार्य आहे. तसेच, कार्डचे रिचार्ज करण्यासाठी किमान 50 रुपयांच्या पटीत रक्कम भरावी लागेल. प्रवासी ईटीआयएम (ETIM) मशिन, अधिकृत संकेतस्थळ, मोबाईल ॲप किंवा नियुक्त केलेल्या एजंटमार्फत सहजपणे रिचार्ज करू शकतील. प्रवाशांची गैरसोय टाळण्यासाठी एसटी महामंडळाने सर्व विभागीय कार्यालये आणि डेपोंमध्ये नोंदणी केंद्रे सुरू केली आहेत. ज्येष्ठ नागरिक आणि महिलांच्या मदतीसाठी 3,000 हून अधिक अधिकृत एजंट नियुक्त करण्यात आले आहेत.

हेही वाचा – Mumbai Metro Line 8: दोन विमानतळं आता मेट्रोने जोडणार! मुंबई मेट्रो 'लाईन 8' ला राज्य सरकारची अधिकृत मंजुरी; असा असेल प्रकल्प

विविध प्रवाशांसाठी आधार आणि 'सरल' संलग्न सुविधा
अमृत ज्येष्ठ नागरिक, महिला आणि सर्वसाधारण ज्येष्ठ नागरिकांना त्यांचे आधार कार्ड संलग्न असलेले कार्ड दिले जाईल. दिव्यांग प्रवाशांसाठी त्यांचा UDID क्रमांक कार्डाशी जोडला जाणार असून, स्वातंत्र्यसैनिक, पत्रकार आणि राज्यस्तरीय पुरस्कार विजेत्यांना विभागीय कार्यालयामार्फत या कार्डाचे वितरण केले जात आहे. बस स्थानकांवरच ही नोंदणी प्रक्रिया पार पडणार असल्याने प्रवाशांना धावपळ करण्याची गरज भासणार नाही. आतापर्यंत झालेल्या 10,000 नोंदणींपैकी बहुतांश नोंदणी या ज्येष्ठ नागरिक आणि महिला प्रवाशांच्या आहेत, ज्यांना एसटी प्रवासात 50 टक्के ते 100 टक्के सवलत मिळते.

पारदर्शकता आणि अचूक नोंदींचे उद्दिष्ट
एसटी महामंडळाच्या निदर्शनास आले होते की, अनेकदा सवलतींचा लाभ घेण्यासाठी खोट्या ओळखपत्रांचा वापर केला जात होता. एनसीएमसी कार्डमुळे प्रत्येक प्रवाशाची सवलत आणि प्रवासाची अचूक नोंद डिजिटल स्वरूपात होईल. यामुळे महामंडळाचे आर्थिक नुकसान टळेल आणि खऱ्या गरजू प्रवाशांनाच या 35 प्रकारच्या सवलतींचा लाभ मिळेल. तंत्रज्ञानाच्या या वापरामुळे एसटीचा प्रवास अधिक आधुनिक आणि कॅशलेस होण्यास मदत होणार आहे, ज्यामुळे कंडक्टर आणि प्रवाशांमधील सुट्या पैशांचा वादही मिटणार आहे.

हेही वाचा – Cab Women Safety : कॅबमधील महिलांच्या सुरक्षेसाठी असणारे SOS Button खरंच काम करते का? समोर आला धक्कादायक व्हिडीओ