नवी दिल्ली : अमेरिकेत लोकप्रिय लेट-नाईट होस्ट जिमी किमेल यांचा शो चार्ली कर्क यांच्या हत्येबाबत केलेल्या वक्तव्यामुळे एबीसी वाहिनीने अनिश्चित काळासाठी निलंबित केला आहे. यावर अमेरिकेचे अध्यक्ष डोनाल्ड ट्रम्प यांनी प्रतिक्रिया देताना ही घटना “अमेरिकेसाठी चांगली बातमी” असल्याचे म्हटले. त्यांनी सोशल मीडियावर लिहिले की, “रेटिंग्समध्ये पिछाडीवर असलेला जिमी किमेल शो अखेर बंद करण्यात आला. एबीसीने योग्य निर्णय घेतला.”
किमेल यांनी आपल्या कार्यक्रमात म्हटले होते की, “कर्क यांच्या हत्येचा वापर MAGA गट राजकीय फायदा मिळवण्यासाठी करत आहे.” या वक्तव्याला काही प्रसारमाध्यमांनी आक्षेप घेतला. नेक्सस्टार कम्युनिकेशन्स ग्रुपने आपल्या एबीसी संलग्न चॅनेल्सवर हा शो दाखवण्यास नकार दिल्यानंतर एबीसीने तातडीने कारवाई केली. नेक्सस्टारचे अधिकारी म्हणाले की, अशा टिप्पण्या राष्ट्रीय राजकीय चर्चेच्या संवेदनशील काळात असंवेदनशील ठरतात.
ट्रम्प यांनी या प्रकरणात किमेलसह जिमी फॅलन आणि सेथ मायर्स यांनाही लक्ष्य केले असून, त्यांचे शोही रद्द व्हावेत असे मत व्यक्त केले. दरम्यान, किमेल यांच्या शोचा करार मे 2026 मध्ये संपुष्टात येणार आहे. व्हाईट हाऊसच्या अधिकाऱ्यांनी यावर प्रतिक्रिया देताना कंपन्या आता सामान्य अमेरिकन नागरिकांच्या भावना लक्षात घेऊन पावले उचलत आहेत, असे म्हटले.
चार्ली कर्क यांच्या हत्येप्रकरणी 22 वर्षीय टायलर रॉबिन्सनला अटक करण्यात आली आहे. अधिकाऱ्यांच्या माहितीनुसार, तो मूळचा पुराणमतवादी विचारसरणीच्या घरातून आलेला असला तरी अलीकडेच डाव्या विचारसरणीकडे वळला होता आणि LGBTQ हक्कांचा समर्थक झाला होता. तपासात उघड झाले की, त्याने आपल्या ट्रान्सजेंडर साथीदाराला कर्क यांना लक्ष्य करण्यामागचे कारण सांगितले होते, “त्यांच्या द्वेषपूर्ण वक्तव्यांना कंटाळलो होतो.”
