जळगाव : शहरातील रामेश्वर कॉलनी परिसरातून काही दिवसांपासून बेपत्ता असलेल्या महिलेचा मृतदेह पद्मालयच्या जंगलात आढळून आल्याने खळबळ उडाली आहे. कविता अरुण मिस्त्री या महिलेचा मृतदेह १३ सप्टेंबर रोजी जंगल परिसरात सापडला. प्राथमिक तपासात त्यांच्या डोक्यावर दगडाने वार करून हत्या करण्यात आल्याचे समोर आले असून, या प्रकरणात नरेश ऊर्फ आबा अनिल सोनवणे याला पोलिसांनी ताब्यात घेतले आहे.
कविता मिस्त्री या ८ सप्टेंबरपासून बेपत्ता होत्या. त्या घरी परत न आल्याने कुटुंबीयांनी शोध सुरू केला. त्यानंतर जळगाव एमआयडीसी पोलीस ठाण्यात अपहरणाची तक्रार दाखल करण्यात आली होती. पोलिसांनी महिलेचा शोध घेण्यासाठी परिसरातील माहिती तसेच तांत्रिक तपासाच्या आधारे तपास सुरू केला.
तपासादरम्यान पोलिसांचे लक्ष कविता आणि नरेश सोनवणे यांच्या संबंधांकडे गेले. दोघांमध्ये मैत्रीपूर्ण संबंध असल्याची माहिती समोर आली होती. बेपत्ता होण्याच्या आधीच्या दिवशी दोघांमध्ये वाद झाल्याचेही तपासात समोर आल्याचे पोलिसांनी सांगितले आहे.
८ सप्टेंबर रोजी नरेशने कविताला दवाखान्यात घेऊन जाण्याचे सांगितल्याचा संशय पोलिसांनी व्यक्त केला आहे. त्यानंतर दोघे दुचाकीवरून निघाले. याचदरम्यान कविताने मैत्रिणींशी व्हिडिओ कॉल करून आपण नरेशसोबत जात असल्याचे सांगितल्याची माहिती तपासात पुढे आली.
पोलिसांनी दोघांच्या मोबाईल लोकेशनचीही तपासणी केली. या तपासात म्हसावद परिसरात दोन्ही मोबाईलचे शेवटचे लोकेशन आढळून आल्याचे सांगण्यात आले. त्यानंतर दोन्ही मोबाईल बंद झाले. त्यामुळे पोलिसांचा संशय अधिक बळावला.
दरम्यान, १३ सप्टेंबर रोजी पद्मालय परिसरातील जंगलात कविता यांचा मृतदेह आढळला. मृतदेहाची स्थिती पाहता त्यांच्यावर गंभीर स्वरूपाचा हल्ला झाल्याचे प्राथमिक तपासात समोर आले. यानंतर आधी दाखल असलेल्या अपहरणाच्या प्रकरणाचा तपास खुनाच्या दिशेने वळवण्यात आला.
तांत्रिक माहिती आणि पोलिसांच्या तपासाच्या आधारे नरेश ऊर्फ आबा सोनवणे याचा शोध घेण्यात आला. त्यानंतर पोलिसांनी त्याला जळगाव शहरातून ताब्यात घेतले. जुन्या संबंधातील वादातून हा प्रकार घडल्याचा संशय पोलिसांनी व्यक्त केला आहे. पोलिसांच्या म्हणण्यानुसार, कविताचा दगडाने चेहरा ठेचून खून केल्याचा प्राथमिक तपासातून संशय आहे.
या प्रकरणामागे नेमकं कारण काय, घटनेच्या वेळी नेमकं काय घडलं आणि या गुन्ह्यात आणखी कोणी सहभागी आहे का, याचा तपास पोलीस करत आहेत. पोलिस अधीक्षक श्रीकांत धिवरे यांनीही प्राथमिक तपासात अनैतिक संबंधाच्या संशयातून हा प्रकार घडल्याची माहिती दिली आहे.
दरम्यान, संशयित आरोपीविरोधात जळगाव एमआयडीसी पोलीस ठाण्यात गुन्हा दाखल करण्यात आला असून पुढील तपास सुरू आहे. या घटनेमुळे रामेश्वर कॉलनीसह जळगाव शहरात खळबळ उडाली आहे.
