जुने ‘mAadhaar’ होणार कायमचे बंद! नव्या ‘Aadhaar App’ वर कसे शिफ्ट व्हावे? जाणून घ्या सोपी प्रक्रिया
UIDAI Launches New Aadhaar App : भारतात आधार कार्डशी (Aadhaar Card) संबंधित सर्व सेवा हाताळणारी अधिकृत संस्था 'युनिक आयडेंटिफिकेशन ऑथॉरिटी ऑफ इंडिया' (UIDAI) ने एक अत्यंत महत्त्वाची घोषणा केली आहे. सध्या वापरात असलेले जुने 'mAadhaar' अॅप लवकरच पूर्णपणे बंद करण्यात येणार आहे. त्याच्या जागी आता तंत्रज्ञानाने सुसज्ज असे नवीन 'Aadhaar App' लाँच करण्यात आले असून, ते पूर्वीपेक्षा अधिक वेगवान, सुरक्षित आणि वापरण्यास सोपे असल्याचा दावा करण्यात आला आहे. UIDAI ने आपल्या अधिकृत 'X' अकाउंटवरून माहिती दिली की, हे नवीन अॅप अँड्रॉइड (Android) आणि आयफोन (iPhone) या दोन्ही प्लॅटफॉर्मवर उपलब्ध करून देण्यात आले आहे, जे युझर्सना एक स्मार्ट आणि सुरक्षित डिजिटल अनुभव देईल.
प्रायव्हसी आणि सुरक्षिततेसाठी नवीन फीचर्स
ग्राहकांच्या डेटाची सुरक्षा आणि प्रायव्हसी (Privacy) लक्षात घेऊन या नवीन अॅपमध्ये अनेक क्रांतिकारी बदल करण्यात आले आहेत.
QR Code आधारित आधार शेअरींग: या फीचरच्या मदतीने युझर्सना कोणत्याही ठिकाणी आपली ओळख पडताळताना संपूर्ण आधार क्रमांक दाखवण्याची गरज पडणार नाही.
'सिलेक्टिव्ह शेअर' (Selective Share) पर्याय: या नव्या सुविधेमुळे व्हेरिफिकेशन दरम्यान आपली कोणती माहिती (उदा. फक्त नाव आणि जन्मदिनांक) समोरच्या व्यक्तीला दाखवायची आणि कोणती लपवायची, हे युझर स्वतः ठरवू शकणार आहेत.
ऑफलाईन QR व्हेरिफिकेशन: इंटरनेट सुविधा नसतानाही अधिकृत टर्मिनल्सवर केवळ QR कोड स्कॅन करून युझर्स आपली ओळख सत्यापित करू शकतील.
13 भाषांचा सपोर्ट: देशातील विविध राज्यांमधील नागरिकांना वापरणे सोपे जावे, म्हणून हे अॅप 13 भारतीय भाषांना सपोर्ट करते.
बायोमेट्रिक लॉक आणि फॅमिली प्रोफाइल
या नवीन अॅपमध्ये युझर्सच्या सुरक्षेसाठी बायोमेट्रिक लॉक (Biometric Lock) चे महत्त्वाचे फिचर देण्यात आले आहे. याद्वारे युझर्स अॅपमधूनच आपले फिंगरप्रिंट, फेस आणि आयरीस (डोळ्यांचे) ऑथेंटिकेशन लॉक करू शकतात, ज्यामुळे आधारच्या कोणत्याही संभाव्य गैरवापराला आळा बसेल. गरज पडल्यास हे लॉक अॅपद्वारेच तात्काळ काढताही येईल. याशिवाय, अॅपमध्ये 'फॅमिली प्रोफाइल' (Family Profile) हे नवीन वैशिष्ट्य जोडण्यात आले असून, एकाच अकाउंटमध्ये जास्तीत जास्त 5 कुटुंबीयांचे आधार जोडता येतील. मात्र, आधारशी लिंक असलेला मोबाईल नंबर किंवा डिव्हाइस गहाळ झाल्यास काही काळ आधार सेवांचा अॅक्सेस थांबू शकतो, असा इशाराही UIDAI ने दिला आहे.
हेही वाचा – India Data Centers: भारत बनतोय जागतिक डेटा सेंटर हब; काय होणार नेमका फायदा? वाचा
नव्या 'Aadhaar App' चे सेटअप कसे करावे?
तुमचे नवीन अॅप सुरू करण्यासाठी खालील सोप्या स्टेप्स फॉलो करा –
स्टेप 1: सर्वप्रथम Google Play Store किंवा Apple App Store वरून अधिकृत नवीन 'Aadhaar App' डाउनलोड करा.
स्टेप 2: अॅप उघडून तुमची आवडती भाषा निवडा आणि आधारशी लिंक असलेल्या किंवा अन्य कोणत्याही चालू मोबाईल नंबरचा वापर करून रजिस्ट्रेशन पूर्ण करा.
स्टेप 3: यानंतर तुमचा 12 अंकी आधार क्रमांक नोंदवा आणि मोबाईलवर आलेला OTP टाकून व्हेरिफिकेशन करा.
स्टेप 4: यानंतर योग्य उजेड असलेल्या ठिकाणी उभे राहून अॅपमध्ये फेस ऑथेंटिकेशन (Face Authentication) प्रक्रिया पूर्ण करा.
स्टेप 5: शेवटी, अॅप सुरक्षित ठेवण्यासाठी 6 अंकांचा पासवर्ड (PIN) तयार करा; तुमचा सेटअप पूर्ण होईल.
जुन्या 'mAadhaar' युझर्सना काय करावे लागेल?
जुन्या अॅपमधील युझर्सचा डेटा या नवीन अॅपमध्ये आपोआप ट्रान्सफर (Data Transfer) होईल की नाही, याबाबत UIDAI ने अद्याप कोणतीही स्पष्ट माहिती दिलेली नाही. त्यामुळे, जुन्या अॅपचे युझर्स असणाऱ्या नागरिकांना या नवीन अॅपमध्ये आपली प्रोफाईल संपूर्ण माहिती भरून मॅन्युअली (पुन्हा नव्याने) सेट करावी लागण्याची शक्यता वर्तवली जात आहे. भविष्यातील गैरसोय टाळण्यासाठी नागरिकांनी तातडीने नव्या अॅपवर शिफ्ट व्हावे, असे आवाहन करण्यात आले आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.