Air India Flight Technical Snag : एअर इंडियाच्या विमानात हवेतच बिघाड; तब्बल 8 तासांच्या थरारक प्रवासानंतर विमान पुन्हा दिल्लीत, 230 प्रवासी सुखरूप

Air India Delhi San Francisco Flight Technical Snag : दिल्ली आंतरराष्ट्रीय विमानतळावरून अमेरिकेतील सॅन फ्रान्सिस्कोला जाण्यासाठी झेपावलेल्या एअर इंडियाच्या एका विमानाला ऐन हवेत असताना अचानक गंभीर तांत्रिक बिघाडाचा सामना करावा लागला. अत्यंत चिंतेची बाब म्हणजे, बिघाड लक्षात येईपर्यंत या विमानाने हवेत तब्बल 8 तासांपेक्षा जास्त वेळ घालवला होता. मात्र, प्रवाशांच्या जिवाचा धोका ओळखून वैमानिकाने अत्यंत हुशारीने विमानाची दिशा बदलली आणि ते पुन्हा देशाची राजधानी दिल्लीच्या दिशेने वळवले. बुधवारी (27 मे 2026) घडलेल्या या थरारक घटनेत विमानातील सर्व प्रवासी सुखरूप बचावले असून, दिल्ली विमानतळावर विमानाचे सुरक्षित लँडिंग करण्यात यश आले आहे.

प्रवाशांच्या सुरक्षेसाठी वैमानिकाचा मोठा निर्णय
लाईट ट्रॅकरकडून मिळालेल्या अधिकृत माहितीनुसार, एअर इंडियाचे 'AI173' हे बोइंग 777−330 ईआर (Boeing 777−330 ER) मॉडेलचे विमान नेहमीप्रमाणे दिल्लीहून सॅन फ्रान्सिस्कोसाठी उडाले होते. हवेत प्रचंड अंतर पार केल्यानंतर वैमानिकाला विमानात तांत्रिक त्रुटी असल्याचे जाणवले. सुमारे 230 प्रवाशांचा जीव धोक्यात न घालता, सुरक्षा मानकांचे काटेकोर पालन करत विमानाला दिल्लीत परत आणण्याचा निर्णय घेण्यात आला. विमानाचे लँडिंग सुरक्षित झाल्यानंतर एअर इंडियाच्या तांत्रिक पथकाकडून आता या विमानाची कसून तपासणी केली जात आहे.

एअर इंडियाचे स्पष्टीकरण आणि प्रवाशांची सोय
विमान कंपनीचे अधिकृत पत्रक: 'तांत्रिक बिघाडामुळे निर्धारित नियमांनुसार विमान दिल्लीत परत आणण्यात आले आहे. प्रवाशांना झालेल्या मनस्तापाबद्दल आम्ही दिलगीर आहोत. आमच्या ग्राउंड स्टाफमार्फत प्रवाशांना सर्वतोपरी मदत केली जात आहे.'
विमान कंपनीच्या प्रवक्त्यांनी सांगितले की, अडकून पडलेल्या सर्व प्रवाशांना त्यांच्या नियोजित स्थळी सुखरूप पोहोचवण्यासाठी तातडीने पर्यायी विमानाची (अल्टरनेटिव्ह फ्लाईट) व्यवस्था केली जात आहे. तोपर्यंत प्रवाशांची गैरसोय होऊ नये म्हणून त्यांना हॉटेलमध्ये राहण्याची, खाण्यापिण्याची आणि तिकीट री-शेड्युलिंगची मोफत सोय प्रशासनाकडून उपलब्ध करून देण्यात आली आहे.

हेही वाचा –  Domestic Flight Cuts: हवाई प्रवास महागणार? 1 जूनपासून एअर इंडिया आणि इंडिगोच्या उड्डाणांमध्ये कपात; मोठं कारण समोर

आठवड्याभरातील दुसरी गंभीर घटना; विमान सुरक्षेवर प्रश्नचिन्ह
विशेष म्हणजे, एअर इंडियाच्या विमानांमध्ये तांत्रिक बिघाड होण्याची ही आठवड्याभरातील दुसरी मोठी आणि चिंताजनक घटना आहे. या घटनेच्या अवघ्या काही दिवस आधी बेंगळुरूहून दिल्लीला येणाऱ्या एअर इंडियाच्या एअरबस ए320 (Airbus A320) विमानाच्या इंजिनला अचानक आग लागल्याची गंभीर घटना घडली होती. कॉकपिटमध्ये 'इंजिन फायर'ची चेतावणी मिळताच दिल्लीच्या इंदिरा गांधी आंतरराष्ट्रीय विमानतळावर (IGI) 'फुल इमर्जन्सी' म्हणजेच हाय अलर्ट घोषित करण्यात आला होता.

सखोल चौकशीचे आदेश
त्या विमानामध्ये एकूण 171 प्रवासी होते आणि वैमानिकाने धावपट्टी 29आर (29R) वर विमानाचे आपत्कालीन लँडिंग केले होते, ज्यात मोठी दुर्घटना टळली होती. लागोपाठ घडलेल्या या दोन्ही गंभीर प्रकरणांमुळे एअर इंडियाच्या विमानांच्या तांत्रिक देखभालीवर (मेन्टेनन्स) आता प्रवाशांमधून आणि तज्ज्ञांकडून मोठे प्रश्नचिन्ह उपस्थित केले जात आहे. वाढत्या दबावानंतर एअर इंडिया प्रशासनाने या दोन्ही घटनांच्या सखोल चौकशीचे आदेश दिले आहेत.

हेही वाचा – Indian Navy Foils pirate attack: भारतीय नौदलाची हिंदी महासागरात धडक कारवाई; INS ने उधळला सागरी चाच्यांचा हल्ला