Ahilyanagar Schools: अहिल्यानगरात नव्या शैक्षणिक वर्षाच्या पहिल्याच दिवशी शाळा बंद; शिक्षकांच्या कमतरतेमुळे ग्रामस्थ संतप्त

Ahilyanagar Parents' Protest against Teacher Shortage in School : नव्या शैक्षणिक वर्षाची घंटा वाजताच राज्यभरात विद्यार्थ्यांमध्ये उत्साहाचे वातावरण असताना, कोपरगाव तालुक्यातील मनेगाव येथे मात्र वेगळेच चित्र पाहायला मिळाले. येथील जिल्हा परिषद शाळेत पहिल्या ते सातवीपर्यंतच्या एकूण 7 वर्गांना शिकवण्यासाठी शिक्षण विभागाकडून केवळ 3 शिक्षक उपलब्ध करून देण्यात आले आहेत. या अपुऱ्या शिक्षक संख्येमुळे आपल्या मुलांचे अतोनात शैक्षणिक नुकसान होत असल्याचा आरोप करत संतप्त पालकांनी आणि ग्रामस्थांनी पहिल्याच दिवशी थेट शाळा बंद ठेवण्याचा आक्रमक निर्णय घेतला. यामुळे शाळेचे वर्ग पूर्णपणे रिकामे राहिले असून, परिसरात शिक्षण विभागाच्या भोंगळ कारभाराविषयी तीव्र संताप व्यक्त केला जात आहे.

नेमकी काय आहे ग्रामस्थांची मागणी? तातडीने घेतली ग्रामसभा
मनेगाव येथील शाळेतील शिक्षकांच्या या गंभीर प्रश्नावर तोडगा काढण्यासाठी गावकऱ्यांनी तातडीने एक विशेष ग्रामसभा आयोजित केली होती. या ग्रामसभेत शिक्षण विभागाच्या उदासीन धोरणावर पालकांनी प्रचंड नाराजी व्यक्त केली. विशेषतः 6 वी आणि 7 वीच्या वर्गातील विद्यार्थ्यांसाठी भाषा आणि विज्ञान या विषयांचे पूर्णवेळ शिक्षक तातडीने नियुक्त करण्यात यावेत, अशी मागणी ग्रामस्थांनी केली आहे. याशिवाय, शाळेतील शिक्षक रवींद्र शिरोळे यांची तातडीने बदली करण्यात यावी, या मागणीवरही ग्रामस्थ ठाम आहेत.

हेही वाचा – Maharashtra School News : राज्यात कडक ऊन त्यातच मान्सून लांबला, शाळांच्या वेळेचा पेच उभा; मुख्याध्यापक महामंडळाने केली 'ही' मागणी

प्रशासनाकडून आधी तात्पुरती मलमपट्टी; 'जैसे थे' परिस्थितीमुळे सरपंच संतप्त
मनेगावचे सरपंच अण्णासाहेब गांगवे यांनी प्रशासनाचा निषेध करताना सांगितले की, शिक्षकांच्या कमतरतेमुळे विद्यार्थ्यांच्या शैक्षणिक गुणवत्तेवर थेट आणि विपरीत परिणाम होत असून, याची संपूर्ण जबाबदारी प्रशासनानेच घेतली पाहिजे. यापूर्वीही गावात असाच प्रश्न निर्माण झाला होता, तेव्हा ग्रामस्थांनी आंदोलनाचा इशारा देताच प्रशासनाने तात्पुरत्या स्वरूपात 2 शिक्षकांची नियुक्ती केली होती, अशी माहिती शाळा व्यवस्थापन समितीचे अध्यक्ष पांडुरंग कोल्हे यांनी दिली. मात्र, काही दिवस उलटताच त्या दोन्ही शिक्षकांची पुन्हा बदली करण्यात आल्याने शाळेतील परिस्थिती 'जैसे थे' झाली असून, प्रशासनाच्या या भूमिकेमुळे पालकांचा संयम सुटला आहे.

प्रशासनाकडून चर्चेची फेरी; ठोस निर्णयाशिवाय आंदोलन मागे न घेण्याचा इशारा
पालकांच्या या आक्रमक आंदोलनाची दखल घेत पंचायत समिती प्रशासनाने केंद्रप्रमुखांना मनेगाव येथे ग्रामस्थांशी चर्चेसाठी पाठवले. यावर कोपरगावच्या प्रभारी गट शिक्षणाधिकारी शबाना शेख यांनी स्पष्ट केले की, तात्पुरती सोय म्हणून उद्यापासून 1 शिक्षक या ठिकाणी पाठवला जात आहे, तसेच पदवीधर शिक्षकांच्या बदल्यांची प्रक्रिया पूर्ण झाल्यानंतर आणखी 1 शिक्षक मिळणे शक्य होईल; त्यामुळे पालकांनी सहकार्य करावे. मात्र, केवळ पोकळ आश्वासनांवर न थांबता जोपर्यंत नवीन शिक्षकांची प्रत्यक्ष नियुक्ती होऊन ठोस लेखी निर्णय होत नाही, तोपर्यंत हे शाळा बंद आंदोलन मागे घेणार नसल्याचा आक्रमक इशारा ग्रामस्थांनी प्रशासनाला दिला आहे.

हेही वाचा – Chandrashekhar Bawankule : महिला बचत गटांना मिळणार 1 हेक्टर सरकारी जमीन आणि 1 लाखांचे अनुदान; महसूलमंत्र्यांची घोषणा