विजय चिडे, प्रतिनिधी
छत्रपती संभाजीनगर : गेल्या काही दिवसांपासून छत्रपती संभाजीनगर जिल्ह्यात मांजर चावल्यानंतर शासकीय वैद्यकीय महाविद्यालय आणि रुग्णालयात (जीएमसीएच) उपचार घेणाऱ्या लोकांची संख्या वाढत आहे. जुलै महिन्यात जीएमसीएचमध्ये तब्बल 217 लोकांवर उपचार करण्यात आले. म्हणजेच दररोज सरासरी सात रुग्ण दाखल झाले. शहरात मोकाट कुत्र्यांचे हल्ले वाढत असतानाच, मांजर चावण्याच्या घटनाही चिंतेचा विषय बनल्या आहेत. अनेकदा किरकोळ जखम म्हणून दुर्लक्षित केल्या जाणाऱ्या मांजराच्या चाव्यामुळे संसर्ग होऊ शकतो. त्यामुळे वेळेवर उपचार करणे महत्त्वाचे ठरते.
पुरुषांना सर्वाधिक चावे बसले असल्याचे आकडेवारीनुसार समजते. 217 रुग्णांपैकी 125 पुरुष आणि 92 महिला होत्या. ही आकडेवारी घरांमध्ये सामान्यपणे आढळणाऱ्या मांजरांच्या बाबतीतही सावधगिरी बाळगण्याची गरज अधोरेखित करते. मांजराच्या चाव्याचा धोका काय आहे? पिसाळलेले मांजर चावण्याने किंवा ओरखड्याने विषाणूचा प्रसार करू शकते. एकदा लक्षणे दिसू लागल्यावर रेबीज जवळजवळ नेहमीच प्राणघातक ठरतो. परंतु वेळेवर प्रतिबंधात्मक उपचार केल्यास हा आजार टाळता येतो. मांजराचे पातळ दात त्वचेत खोलवर घुसत असल्यामुळे मांजराच्या चाव्यामुळे संसर्ग देखील होऊ शकतो, असे तज्ञ सांगतात.
