मुंबई: ऑनलाइन किराणा आणि दैनंदिन वस्तू मागवणाऱ्या ग्राहकांसाठी महत्त्वाची बातमी आहे. क्विक कॉमर्स प्लॅटफॉर्म Zepto ने फ्री डिलिव्हरीशी संबंधित आपल्या नियमांमध्ये बदल केला आहे. यापुढे मोफत डिलिव्हरीचा लाभ घेण्यासाठी ग्राहकांना आधीपेक्षा जास्त रकमेची खरेदी करावी लागू शकते.
यापूर्वी 149 रुपयांपासूनच्या ऑर्डरवर मोफत डिलिव्हरी मिळत होती. आता ही मर्यादा वाढवून 199 रुपये करण्यात आली आहे. त्यामुळे 199 रुपयांपेक्षा कमी किमतीची ऑर्डर केल्यास ग्राहकांना डिलिव्हरी चार्ज लागू होण्याची शक्यता आहे.
पीक अवर्समध्ये खर्च आणखी वाढू शकतो
Zepto च्या नव्या नियमातील आणखी एक महत्त्वाची बाब म्हणजे ग्राहकांची मागणी मोठ्या प्रमाणावर असलेल्या वेळेत किमान ऑर्डरची मर्यादा अधिक वाढू शकते. पीक अवर्समध्ये फ्री डिलिव्हरीसाठी 299 रुपयांपर्यंतची ऑर्डर आवश्यक ठरू शकते.
याचा सर्वाधिक परिणाम छोट्या ऑर्डर्स करणाऱ्या ग्राहकांवर होण्याची शक्यता आहे. उदाहरणार्थ, एखाद्याला घरासाठी केवळ 100 किंवा 150 रुपयांच्या वस्तू तातडीने हव्या असतील, तर फ्री डिलिव्हरीसाठी त्याला कार्टमध्ये आणखी वस्तू जोडाव्या लागू शकतात. अन्यथा स्वतंत्र डिलिव्हरी शुल्क भरावे लागू शकते.
कंपनीचा नेमका उद्देश काय?
क्विक कॉमर्स व्यवसायात ग्राहकाला काही मिनिटांत वस्तू पोहोचवण्यासाठी मोठी लॉजिस्टिक्स व्यवस्था काम करते. ऑर्डर स्वीकारण्यापासून ती वेअरहाऊसमध्ये तयार करणे, पॅकिंग करणे आणि डिलिव्हरी पार्टनरमार्फत ग्राहकापर्यंत पोहोचवणे, या प्रत्येक टप्प्यावर खर्च होतो.
छोट्या ऑर्डरवरही जवळपास समान प्रक्रिया पार पडत असल्याने त्यातून कंपनीला मिळणारे उत्पन्न तुलनेने कमी राहू शकते. त्यामुळे किमान ऑर्डरची मर्यादा वाढवून प्रत्येक ऑर्डरची सरासरी किंमत वाढवण्याचा प्रयत्न असल्याचे मानले जात आहे.
या बदलामुळे Zepto ची फ्री डिलिव्हरीची बेस लिमिट आता इतर प्रमुख क्विक कॉमर्स प्लॅटफॉर्मच्या तुलनेत जवळ येत आहे. ग्राहकांनी ऑर्डर करण्यापूर्वी आपल्या कार्टची एकूण किंमत आणि लागू होणारे डिलिव्हरी शुल्क तपासणे महत्त्वाचे ठरणार आहे.
Zomato ग्राहकांनाही बसू शकतो अतिरिक्त खर्च
दरम्यान, ऑनलाइन फूड डिलिव्हरी क्षेत्रातही ग्राहकांच्या खर्चात वाढ होण्याची शक्यता आहे. पर्यावरणपूरक आणि बायोडिग्रेडेबल पॅकेजिंगचा वापर वाढल्यास फूड ऑर्डरच्या किमतीवर अतिरिक्त भार पडू शकतो.
सध्या प्लास्टिक पॅकेजिंगचा वापर मोठ्या प्रमाणावर केला जातो. त्याऐवजी पर्यावरणपूरक साहित्य वापरल्यास कंपन्यांचा पॅकेजिंग खर्च वाढण्याची शक्यता आहे. हा अतिरिक्त खर्च काही प्रमाणात ग्राहकांकडून वसूल केला जाऊ शकतो.
म्हणजेच, क्विक कॉमर्स आणि फूड डिलिव्हरी वापरणाऱ्या ग्राहकांसाठी छोट्या ऑर्डर्स भविष्यात पूर्वीपेक्षा महाग पडण्याची शक्यता आहे. कंपन्या आता केवळ ऑर्डर्सची संख्या वाढवण्याऐवजी प्रत्येक ऑर्डरमधून मिळणारे उत्पन्न आणि डिलिव्हरीच्या खर्चाचे व्यवस्थापन यावर अधिक भर देताना दिसत आहेत.
