Vishal Sikka Hang Ten Systems : इन्फोसिसचे माजी सीईओ विशाल सिक्का यांची तंत्रज्ञान जगतात मोठी झेप; AI क्षेत्रातील नव्या स्टार्टअपची केली घोषणा
Vishal Sikka Hang Ten Systems : जागतिक तंत्रज्ञान क्षेत्रात सध्या आर्टिफिशिअल इंटेलिजन्स म्हणजेच एआयची मोठी लाट आली असून सर्वच दिग्गज कंपन्यांमध्ये या तंत्रज्ञानाचा वापर वाढवण्यासाठी चुरस लागली आहे. अशातच देशातील अग्रगण्य आयटी कंपनी इन्फोसिसचे माजी मुख्य कार्यकारी अधिकारी विशाल सिक्का यांनी या क्षेत्रात स्वतःचे नवीन पाऊल टाकले आहे. बुधवारी 24 जून 2026 रोजी त्यांनी आपल्या ‘हँग टेन सिस्टीम्स’ या नवीन एआय केंद्रित स्टार्टअपची अधिकृत घोषणा केली. हे नवीन स्टार्टअप जागतिक स्तरावरील मोठ्या कॉर्पोरेट कंपन्यांना एआय तंत्रज्ञानाचा योग्य विस्तार करण्यासाठी आणि ते आत्मसात करण्यासाठी तांत्रिक मदत पुरवणार आहे.
सर्फिंगच्या जगप्रसिद्ध संज्ञेवरून प्रेरणा घेऊन ठेवले हँग टेन नाव
विशाल सिक्का यांनी आपल्या या नवीन उपक्रमाची माहिती देताना सोशल मीडिया प्लॅटफॉर्म X वर एक अतिशय रंजक पोस्ट शेअर केली आहे. त्यांनी लिहिले की, अनेक वर्षांपूर्वी मला मिळालेल्या शिकवणीनुसार जेव्हा आजूबाजूला तंत्रज्ञानाच्या मोठ्या लाटा असतात, तेव्हा त्यावर सर्फिंग करणे हाच सर्वोत्तम मार्ग असतो. या स्टार्टअपच्या नावामागील संकल्पना स्पष्ट करताना त्यांनी सांगितले की, हँग टेन हे नाव सर्फिंग खेळातील एका अत्यंत कठीण आणि प्रसिद्ध कौशल्यावरून प्रेरित होऊन ठेवण्यात आले आहे. जेव्हा एखादा निष्णात सर्फर पाण्याच्या प्रचंड मोठ्या लाटेवर नियंत्रण मिळवून सर्व्फबोर्डच्या अगदी पुढच्या टोकावर आपले दोन्ही पाय ठेवून संतुलन साधतो, तेव्हा त्याला हँग टेन म्हटले जाते. हे नाव केवळ नवीन तंत्रज्ञानाचा स्वीकार करणे नव्हे, तर आव्हानात्मक परिस्थितीवर पूर्णपणे नियंत्रण मिळवण्याचे प्रतीक मानले जाते.
जर्मनीतील बड्या कंपन्यांशी करार आणि एआय मधील त्रुटी दूर करण्याचे उद्दिष्ट
कंपनीची नवीन स्थापना झाली असली, तरी हँग टेनने जागतिक पातळीवरील अतिशय नामांकित आणि दिग्गज कंपन्यांसोबत थेट व्यावसायिक भागीदारी सुरू केली आहे. यामध्ये जर्मनीची प्रसिद्ध हेल्थकेअर क्षेत्रातील अग्रगण्य कंपनी फ्रेसिनियस आणि ऊर्जा क्षेत्रातील अग्रेसर संस्था सीमेन्स एनर्जी यांचा प्रामुख्याने समावेश आहे. विशाल सिक्का यांच्या मते, सध्या एआयच्या मदतीने पूर्वी वर्षभर लागणारे काम अवघ्या काही मिनिटांत पूर्ण करणे शक्य झाले आहे. परंतु अद्यापही अनेक मोठ्या संस्थांना या तंत्रज्ञानाचा अचूक वापर कसा करावा हे उमजलेले नाही, ज्यामुळे त्यांचे नुकसान होत आहे. हीच मोठी दरी किंवा त्रुटी भरून काढण्याचे मुख्य काम हे स्टार्टअप करणार असून त्यासाठी जगभरातून कुशल तंत्रज्ञांची मोठी भरती सुरू करण्यात आली आहे.
Hello World! I'm excited to share the launch of Hang Ten Systems, a new endeavor to help enterprises thrive in the age of AI. AI is upon us all like a massive new wave. And I learned a long time ago that when there are big waves around, it is time to surf. Not just to surf, but… — Vishal Sikka (@vsikka) June 24, 2026
सौदी अरामको आणि सिलिकॉन व्हॅलीतील दिग्गज गुंतवणूकदारांचे मोठे आर्थिक पाठबळ
सिक्का यांच्या या महत्त्वाकांक्षी आणि नवीन उपक्रमाला जागतिक स्तरावरील अत्यंत बलाढ्य संस्था आणि गुंतवणूकदारांनी मोठ्या प्रमाणावर आर्थिक बळ दिले आहे. या स्टार्टअपमधील मुख्य गुंतवणूकदार आणि संचालकांची माहिती पाहायला गेल्यास जगातील सर्वात मोठी ऊर्जा कंपनी असलेल्या सौदी अरेबियाच्या सौदी अरामको कंपनीच्या धोरणात्मक गुंतवणूक विभागाने यात मोठी भांडवली गुंतवणूक केली आहे. स्टॅनफोर्ड युनिव्हर्सिटीतील सिक्का यांचे जुने मित्र नवीन चड्ढा यांच्या मालकीच्या मेफिल्ड या व्हेंचर कॅपिटल फर्मने यामध्ये भरीव आर्थिक गुंतवणूक केली आहे. याव्यतिरिक्त सिलिकॉन व्हॅलीतील अनेक ख्यातनाम गुंतवणूकदारांचा यात थेट सहभाग असून याहू कंपनीचे सह-संस्थापक जेरी यांग हे हँग टेनच्या संचालक मंडळावर मुख्य सदस्य म्हणून काम पाहणार आहेत.
आगामी काळात इन्फोसिस आणि हँग टेन सिस्टीम्स आमनेसामने येण्याची चिन्हे
भविष्यात हँग टेन सिस्टीम्स हे स्टार्टअप थेट इन्फोसिस कंपनीला मोठी टक्कर देण्याची शक्यता तंत्रज्ञान विश्लेषकांकडून वर्तवली जात आहे, कारण दोन्ही कंपन्यांचे उद्दिष्ट आणि लक्ष्यित ग्राहक वर्ग बऱ्याच अंशी सारखाच आहे. मंगळवारी 23 जून 2026 रोजी झालेल्या इन्फोसिसच्या वार्षिक सर्वसाधारण बैठकीत कंपनीचे अध्यक्ष नंदन निलेकणी यांनीही नेमका हाच मुद्दा मांडला होता. निलेकणी यांनी स्पष्ट केले होते की, मोठ्या कॉर्पोरेट कंपन्यांमध्ये एआय तंत्रज्ञानाची प्रत्यक्ष अंमलबजावणी करताना मोठी दरी दिसून येत असून ती दूर करण्याचे काम इन्फोसिस करत आहे. नेमक्या याच व्यवसायावर विशाल सिक्का यांच्या स्टार्टअपचेही मुख्य लक्ष असल्याने आगामी दिवसांत या दोन बलाढ्य कंपन्यांमध्ये मोठी व्यावसायिक स्पर्धा पाहायला मिळू शकते.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.