नवी दिल्ली: दिल्लीच्या लाल किल्ल्याजवळ झालेल्या भीषण स्फोटाने रविवारी संध्याकाळी राजधानी हादरली. या स्फोटात 9 जणांचा मृत्यू झाला असून अनेक लोक जखमी झाले आहेत. घटनेच्या चौकशीत आता नवा धागा सापडला आहे. हरियाणातील फरीदाबाद दहशत कट प्रकरणात अटक केलेले काश्मीरमधील दोन डॉक्टर या स्फोटाशी संबंधित असल्याचा संशय व्यक्त केला जात आहे. गृहमंत्री अमित शहा यांनी सांगितले की तपास सर्व दिशांनी सुरू आहे आणि कोणतीही शक्यता नाकारली गेलेली नाही. प्राथमिक माहितीनुसार, स्फोट एका कारमध्ये झाला जी लाल किल्ला मेट्रो स्टेशनच्या गेटजवळ थांबली होती. वाहन सिग्नलवर थांबताच भीषण स्फोट झाला आणि आजूबाजूच्या गाड्यांनाही आग लागली. स्फोटानंतरच्या दृश्यांनी परिसरात भीतीचं वातावरण निर्माण झालं. रस्त्यावर विखुरलेली शरीरं आणि रक्ताचे डाग, अशा परिस्थितीने राजधानीत खळबळ उडाली आहे.
ही घटना घडण्याच्या काही तास आधीच जम्मू-कश्मीर आणि हरियाणा पोलिसांनी फरीदाबादमधील दोन ठिकाणांहून हजारो किलो स्फोटकं आणि शस्त्रसाठा जप्त केला होता. ही दोन्ही घरे डॉ. मुझम्मिल शकील, पुलवामाचा रहिवासी, याच्या नावावर भाड्याने घेतलेली होती. तपासात हे स्पष्ट झाले आहे की शकील हा एक व्हाईट कॉलर टेरर नेटवर्क म्हणजेच शिक्षित आणि व्यावसायिक लोकांचा वापर करून चालवल्या जाणाऱ्या दहशतवादी संघटनेचा महत्त्वाचा भाग होता.
हेही वाचा: Red Fort blast: स्फोटाबाबत धक्कादायक माहिती समोर! अमित शाह म्हणाले 'संबंधित पुरावे…
शकील व्यतिरिक्त दुसरा आरोपी डॉ. आदिल अहमद रदर याला श्रीनगर पोलिसांनी अटक केली. त्याच्या लॉकरमधून AK-47 रायफल सापडल्यावर चौकशीतून मोठा खुलासा झाला आहे. रदरच्या कबुलीजबाबानंतरच पोलिसांनी शकीलला 30 ऑक्टोबर रोजी पकडलं आणि त्याच्या घरातून मोठ्या प्रमाणावर स्फोटके हस्तगत केली. फरीदाबादच्या धोज परिसरातील शकीलच्या भाड्याच्या खोलीतून पोलिसांना 350 किलो स्फोटके, 20 टाइमर, रायफल्स आणि दारुगोळा सापडला.
दुसऱ्या ठिकाणी फतेहपूर टागा गावात पोलिसांनी 2563 किलो संशयास्पद स्फोटके जप्त केली. तपासात असेही आढळले की शकील गेल्या साडेतीन वर्षांपासून या ठिकाणी राहत होता आणि तो अल फलाह मेडिकल कॉलेज आणि हॉस्पिटल, फरीदाबाद येथे डॉक्टर म्हणून कार्यरत होता. या सगळ्या पार्श्वभूमीवर लाल किल्ला स्फोट प्रकरण आणि फरीदाबादमधील या दहशतवादी कारवायांमध्ये संबंध असण्याची शक्यता तपासली जात आहे. सूत्रांच्या माहितीनुसार, जप्त केलेल्या स्फोटकांमध्ये अमोनियम नायट्रेट असल्याचा संशय आहे. सध्या दिल्ली पोलिस, एनआयए आणि केंद्रातील तपास संस्था एकत्रितपणे तपास करत आहेत. केंद्र सरकारने या घटनेला देशाच्या सुरक्षेशी संबंधित गंभीर बाब म्हटले असून, लवकरच मोठा कट उघडकीस येण्याची शक्यता व्यक्त केली जात आहे.
