Hidden Treasure News : खोल जमिनीत मोठा सोन्या-चांदीचा खजिना, जिल्हा प्रशासनानं थेट मागवला जेसीबी आणि…

Hidden Treasure in Rajasthan : राजस्थानच्या टोंक जिल्ह्यातील सीदरा गावात गेल्या शनिवारी एका घटनेने संपूर्ण परिसराचे लक्ष वेधून घेतले. एका मोकळ्या जागेवर गुलाबाच्या पाकळ्या, अगरबत्ती आणि पूजेचे साहित्य पाहून ग्रामस्थांमध्ये खजिन्याची चर्चा सुरू झाली. काही दिवसांपासून येथे गुप्त धन असल्याची अफवा वाऱ्यासारखी पसरली होती, त्यामुळे गावकरी मोठ्या संख्येने त्या ठिकाणी गोळा झाले. परिस्थितीचे गांभीर्य ओळखून जिल्हा प्रशासनाने तातडीने घटनास्थळी धाव घेतली आणि यंत्राच्या साह्याने खोदकाम सुरू करण्याचा निर्णय घेतला.

दोन फुटी घडा आणि सोन्याच्या विटांचा भास
खूप वेळ खोदकाम केल्यानंतर जमिनीखाली साधारण 2 फूट उंचीचा एक भलामोठा घडा सापडला. घडा दिसताच गावकऱ्यांनी "सोनं मिळालं" अशी एकच आरोळी ठोकली. काही महिलांनी असा दावा केला की, त्यांनी घड्यात पिवळ्या रंगाच्या धातूच्या साबणाच्या आकाराच्या विटा पाहिल्या आहेत. गर्दी एवढी अनावर झाली होती की, एका अधिकाऱ्याला सुरक्षिततेसाठी थेट घड्यावर पाय ठेवून उभे राहावे लागले. अखेर पोलिसांनी लाठीमार करून गर्दी पांगवली आणि तो घडा सीलबंद करून सरकारी कार्यालयात जमा केला.

रात्रभर खोदकाम पण हाती फक्त निराशा
प्रशासनाने घडा ताब्यात घेतल्यावर गावकऱ्यांची खात्रीच पटली की त्या ठिकाणी खजिना आहे. यामुळे उत्साही गावकऱ्यांनी रात्रभर त्या खड्ड्यात आणखी खोल खोदकाम केले, मात्र त्यांच्या हाती काहीच लागले नाही. सोमवारी सकाळी जेव्हा अजमेरहून आलेल्या पुरातत्व विभागाच्या अधिकाऱ्यांनी सीलबंद घडा उघडला, तेव्हा सर्वांचेच डोळे पांढरे झाले. प्रचंड उत्सुकतेने उघडलेल्या त्या घड्यात सोन्याऐवजी केवळ माती भरलेली होती. सोन्याच्या विटांच्या अफवा केवळ लोकांमधील भ्रम असल्याचे सिद्ध झाले.

हेही वाचा – Viral Video : चांगलीच जिरली! घरातील एक्झॉस्ट फॅनमध्ये अडकला चोर; व्हिडिओ तुफान व्हायरल

'तत्काल अघोरी महाराज' आणि फसवाफसवीचा पर्दाफाश
या प्रकरणाचा सखोल तपास केल्यावर पोलिसांच्या हाती धक्कादायक माहिती लागली. स्थानिक पोलीस अधीक्षक रवी प्रकाश शर्मा यांनी सांगितले की, ही सर्व एका 'कॉन आर्टिस्ट गँग'ची चाल होती. पोलिसांनी मुकेश मीणा (32) आणि अभिषेक मीणा (24) या दोन तरुणांना अटक केली आहे. मुकेशने फेसबुकवर 'तत्काल अघोरी महाराज' नावाचे एक बनावट पेज चालवले होते. लोकांमध्ये गुप्त धनाच्या अफवा पसरवून त्यांना लुटणे हाच या टोळीचा मुख्य व्यवसाय होता.

अशी होती टोळीची 'मोडस ऑपरेंडी'
या टोळीचे सदस्य स्वतःच मातीचे घडे आणि पितळी विटा जमिनीखाली पुरून ठेवायचे. त्यानंतर लोकांना खजिना असल्याचा दावा करून माहिती देण्याच्या नावाखाली लाखो रुपये उकळायचे. सीदरा गावातही त्यांनी पूजेचा बनाव करून लोकांचा विश्वास संपादन केला होता. पोलिसांनी आरोपींकडून सोन्यासारख्या दिसणाऱ्या पण प्रत्यक्षात पितळी असलेल्या विटा जप्त केल्या आहेत. अशा प्रकारे, खजिन्याच्या शोधात असलेल्या गावकऱ्यांची केवळ अंधश्रद्धा आणि अफवांच्या जोरावर फसवणूक केली जात असल्याचे उघड झाले.

हेही वाचा – रस्त्यावर 'चांदीच चांदी!' हायवेवर प्रवाशांची ही झुंबड आणि.. सत्य जाणून पोलीसही चक्रावले